ភ្នំពេញៈ គណៈកម្មាធិការជាតិរៀបចំការបោះឆ្នោត(គ.ជ.ប) បានចេញលិខិតមួយឆ្លើយបំភ្លឺទៅនឹងអនុសាសន៍របស់អង្គការសង្កេតការបោះឆ្នោត Comfrel ស្តីពីតម្លាភាពការពិនិត្យបញ្ជីឈ្មោះ និងចុះឈ្មោះបោះឆ្នោត។
Wednesday, 03 October 2012
លាង ផាន់ណារ៉ា
ភ្នំពេញ ប៉ុស្តិ៍
ប្រជាពលរដ្ឋកំពុងពិនិត្យឈ្មោះបោះឆ្នោតរបស់ខ្លួន ។ រូបថត Derek Stout
លិខិតដែល គ.ជ.ប បានផ្ញើរទៅ Comfrel និងបណ្តេញសារព័ត៌មានក្នុងស្រុកបានលើកឡើងថា៖
– ករណីស្នើសុំថតចម្លងបញ្ជីឈ្មោះ ដែលមេឃុំ ចៅសង្កាត់ បានចេញលិខិតបញ្ជាក់អត្តសញ្ញាណសម្រាប់បម្រើឲ្យការបោះឆ្នោត។ មេឃុំ ចៅសង្កាត់ ពុំបានធ្វើបញ្ជីឈ្មោះអ្នកសុំលិខិតបញ្ជាក់អត្តសញ្ញាណដែលមេឃុំ ចៅសង្កាត់ បានចេញលិខិតបញ្ជាក់អត្តសញ្ញាណ សម្រាប់បម្រើឲ្យការបោះឆ្នោតជូនប្រជាពលរដ្ឋទេ មេឃុំ ចៅសង្កាត់ បានចេញតែរបាយការណ៍ ចំនួនលិខិតបញ្ជាក់អត្តសញ្ញាណ ដែលបានផ្ដល់ជូនប្រជាពលរដ្ឋប៉ុណ្ណោះ។ របាយការណ៍នេះ ត្រូវចេញជាពីរលើក នៅឆ្នាំដែលមានការបោះឆ្នោត៖
-លើកទី១ ក្រោយពីបញ្ចប់ការពិនិត្យបញ្ជីឈ្មោះ និងចុះឈ្មោះបោះឆ្នោត
-លើកទី២ មុនថ្ងៃបោះឆ្នោតមួយថ្ងៃ
-ករណីពិនិត្យគល់បញ្ជីលិខិតបញ្ជាក់អត្តសញ្ញាណ សម្រាប់បម្រើឲ្យការបោះឆ្នោត អង្គការសង្កេតការណ៍បោះឆ្នោត គណបក្សនយោបាយអាចទំនាក់ទំនងជាមេឃុំ ចៅសង្កាត់រៀងរាល់ម៉ោងធ្វើការ ដើម្បីសុំពិនិត្យគល់បញ្ជីលិខិតបញ្ជាក់អត្តសញ្ញាណ សម្រាប់បម្រើឲ្យការបោះឆ្នោត នៅសាលាឃុំ សង្កាត់។ ទម្រង់លិខិតបញ្ជាក់អត្តសញ្ញាណនេះ ត្រូវបានបោះពុម្ពជាសៀវភៅ ដែលមានគល់បញ្ជី និងចុងសន្លឹក ដែលគល់បញ្ជីនេះ មិនអាចថតចម្លងបាន ហើយម្យ៉ាងទៀតការថតចម្លងឯកសារអត្តសញ្ញាណរបស់ប្រជាពលរដ្ឋណាម្នាក់ អាចធ្វើឲ្យប៉ះពាល់ដល់សិទ្ធិបុគ្គល។
– ករណីស្នើសុំអនុញ្ញាតថតចម្លងបញ្ជីឈ្មោះដែលត្រូវលុប និងថតចម្លងនូវបញ្ជីឈ្មោះ ដែលស្មៀនឃុំ សង្កាត់ បានចុះឈ្មោះរួចហើយ ជារៀងរាល់សប្ដាហ៍។ នីតិវិធី គ.ជ.ប តម្រូវឲ្យស្មៀនឃុំ សង្កាត់ បិទផ្សាយបញ្ជីបោះឆ្នោតដំបូងជាសាធារណៈ នៅតាមសាលាឃុំ សង្កាត់ និងនៅទីប្រជុំជន ដែលមានឈ្មោះអ្នកបោះឆ្នោត ដែលបានចុះឈ្មោះថ្មី ឈ្មោះអ្នកបោះឆ្នោត ដែលត្រូវលុប និងឈ្មោះដែលបានកែតម្រូវ។
សេចក្តីប្រកាសដដែល របស់គ.ជ.ប. បានបង្ហាញថា គណបក្សនយោបាយ ត្រូវទំនាក់ទំនងជាមួយស្មៀនឃុំ សង្កាត់ដោយផ្ទាល់មាត់ នៅពេលបញ្ចប់ការចុះឈ្មោះបោះឆ្នោតក្នុងឃុំ សង្កាត់ ដើម្បីសុំទិញបញ្ជីបោះឆ្នោតដំបូង នៃឃុំសង្កាត់ តាមតម្លៃផលិត ដោយត្រូវបង់ប្រាក់ជាមុន ១០០ ភាគរយ។ ការស្នើសុំទិញបញ្ជីបោះឆ្នោតដំបូង ត្រូវជូនដំណឹងទៅក្រុមប្រឹក្សាឃុំ សង្កាត់ ឲ្យបានមុនថ្ងៃទី១២ ខែតុលា ឆ្នាំ២០១២។
– ករណីបង្កើតយន្ដការសម្រាប់ធ្វើអន្តរាគមន៍ ចំពោះអ្នកដែលត្រូវស្មៀនបដិសេធ មិនចុះឈ្មោះបោះឆ្នោត ព្រោះខ្វះឯកសារបញ្ជាក់ទីលំនៅ បញ្ហានេះ អ្នកសុំចុះឈ្មោះត្រូវទៅជួបមេឃុំ ចៅសង្កាត់ ដើម្បីសុំលិខិតបញ្ជាក់ទីលំនៅក្នុងឃុំ សង្កាត់ (ទម្រង់ ១០១៩) ដែលការងារនេះ ត្រូវអនុវត្តតាមនីតិវិធី និងបែបបទណែនាំរបស់ក្រសួងមហាផ្ទៃ។
សូមបញ្ជាក់ថា អនុសាសន៍របស់អង្គការ Comfrel ដែលមានចំនួន ៦ចំណុច ហើយត្រូវបានបញ្ជូនមក គ.ជ.ប នៅថ្ងៃទី២៥ ខែកញ្ញា ឆ្នាំ២០១២ ក្នុងគោលបំណង ដើម្បីបង្កើនតម្លាភាពក្នុងការពិនិត្យបញ្ជីឈ្មោះ និងចុះឈ្មោះបោះឆ្នោត។
គណៈកម្មាធិការជាតិរៀបចំការបោះឆ្នោត គ.ជ.ប. បានប្រកាសថា រយៈពេល ១ ខែ គិតចាប់ពីថ្ងៃទី១ ខែកញ្ញា ឆ្នាំ២០១២ គ.ជ.ប. បានចុះឈ្មោះអ្នកបោះឆ្នោតជិត ៦សែននាក់ ដែលស្មើនឹងជាង ៩៤% នៃផែនការ ដែលមានចំនួនប៉ាន់ស្មាន អ្នកត្រូវចុះឈ្មោះ ចំនួន ៦១៩.៦៣០ នាក់។ ក្នុងនោះ គ.ជ.ប. បានលុបឈ្មោះអ្នកបោះឆ្នោត ចេញពីបញ្ជីបោះឆ្នោត បានចំនួន ២០៣.៦៨៤ នាក់ និងកែតម្រូវទិន្នន័យអ្នកបោះឆ្នោត បានចំនួន ៥៦.៦៧៦ នាក់។ដំណើរការ ពិនិត្យបញ្ជីឈ្មោះ និងចុះឈ្មោះបោះឆ្នោត ឆ្នាំ២០១២ បានចាប់ផ្តើម តាំងពីថ្ងៃទី១ ខែកញ្ញា ឆ្នាំ២០១២ ហើយនឹងត្រូវបិទបញ្ចប់នៅថ្ងៃទី១២ ខែតុលា ឆ្នាំ២០១២។