ភ្នំពេញ: ដើម្បីអបអរសាទរបុណ្យភ្ជុំបិណ្ឌ ព្រមទាំងបួងសួងសុំសេចក្តីសុខដល់អ្នកភូមិ និងសត្វពាហនៈ ក្រុមអ្នកភូមិ នៅវត្តព្រះវិហារសួគ៌ ក្នុងស្រុកខ្សាច់កណ្តាល ខេត្តកណ្តាល បានប្រារព្ធពិធីប្រណាំង ឬការបំបោលក្របី សេះ នៅចំថ្ងៃបុណ្យភ្ជុំបិណ្ឌ ថ្ងៃ១៥រោច ជារៀងរាល់ឆ្នាំ។ ឆ្នាំនេះ ត្រូវនឹងថ្ងៃទី១៥ ខែតុលា ឆ្នាំ២០១២។
ថ្ងៃទី 14 តុលា 2012
ដោយ: លី សិលា
CEN
ក្របី ត្រូវបានអ្នកស្រុកវិហារសួគ៌ ប្រើប្រាស់ ដើម្បីភ្ជួររាស់ ធ្វើស្រែស្រូវ។ រីឯសេះ ក៏ត្រូវបានប្រើប្រាស់ ដើម្បីដឹកទំនិញ សម្រាប់រកចំណូលចិញ្ចឹមជីវិតប្រចាំថ្ងៃរបស់ប្រជាកសិករ។
ក្របី ដែលចូលរួមពិធីប្រចាំឆ្នាំនោះ ត្រូវបានគេតុបតែង ដោយមានរបាំងមុខ រចនាពីក្រណាត់ចម្រុះពណ៌ មានឌិនគ្រាប់អង្កាំ នៅលើក្បាល និងស្រោបស្នែងដោយស្បង់លោក ទុកចន្លោះនៅត្រឹមមាត់ ច្រមុះ និងភ្នែកទាំងពីរតែប៉ុណ្ណោះ។ សេះ ដែលគេនាំមកបំបោលប្រណាំងក៏ត្រូវបានតុបតែងដូចគ្នា។
ការប្រារព្ធពិធីបំបោលក្របីនេះ ធ្វើឡើងជាប្រពៃណីប្រចាំឆ្នាំរបស់អ្នកភូមិវិហារសួគ៌ ដើម្បីបួងសួងសុំឲ្យអ្នកតាម្ចាស់ស្រុក និងបារមីព្រះអង្គវត្តវិហារសួគ៌ ថែរក្សាការពារអ្នកភូមិ និង សត្វពាហនៈពីជម្ងឺដង្កាត់នានា។ ពិធីបំបោលក្របីនេះ ក៏ដើម្បីឧទ្ទិសដល់ដួងវិញ្ញាណក្ខន្ធ លោកតាម្ចាស់ស្រុក ដែលមានបារមី នៅក្នុងវត្តព្រះវិហារសួគ៌ ដ៏សក្តិសិទ្ធិផងដែរ។
ក្នុងព្រឹត្តិការណ៍ប្រចាំឆ្នាំ នៅវត្តវិហារសួគ៌ ក្នុងថ្ងៃបុណ្យភ្ជុំបិណ្ឌ ក្រៅតែពីការបំបោលក្របី និងសេះ ក៏មានកីឡាបោកចំបាប់ ដែលជាការបង្ហាញនូវក្បាច់គុណបុរាណខ្មែរ បុក្កតោ និងគុណដំបង ជាដើម។ កីឡាករ ជាកូនចៅអ្នកភូមិវិហារសួគ៌ ដែលបានស្ម័គ្រចិត្តចុះឈ្មោះ ចូលរួមប្រកួត ដើម្បីថែរក្សានូវកេរ្តិ៍មរតកក្បាច់គុណបុរាណខ្មែរ៕
ពិធីបំបោលក្របី នៅវត្តព្រះវិហារសួគ៌ ក្នុងថ្ងៃបុណ្យភ្ជុំបិណ្ឌកន្លងមក
