ភ្នំពេញ: ស្ថានទូត​សហរដ្ឋអាមេរិក ប្រចាំ​កម្ពុជា បានប្រកាសថា ចាប់ពី​ថ្ងៃ​ទី​២២ ខែតុលា ដល់​ថ្ងៃ​ទី​២៦ ខែតុលា ឆ្នាំ​២០១២ កងទ័ពជើងទឹក​សហ​រដ្ឋ​អាមេរិក នៅ​លើ​នាវា​អាមេរិក​ឈ្មោះ​ថា USS Vandegrift និង​នាវា USNS Salvor នឹង​ចូលរួម​ជាមួយ​ក​ង​ទ័ពជើង​ទឹក​កម្ពុជា ក្នុង​លំ​ហាត់​សមយុទ្ធ និង​ប្រតិបត្តិ​ការត្រៀម​ជាស្រេច នៅលើ​លំហ​សមុទ្រ (CARAT) លើក​ទី​៣ នៅ​ទីក្រុង​ព្រះសីហនុ នៃ​ប្រទេស​កម្ពុជា​។

ថ្ងៃទី 20 តុលា 2012
ដោយ: CEN

សេចក្តីប្រកាស ចុះ​ថ្ងៃ​ទី​២០ ខែតុលា ឆ្នាំ​២០១២ បង្ហាញថា លំ​ហាត់​សមយុទ្ធ​នេះ នឹង​ផ្តោត​លើ​ការលើក​កំពស់​ជំនាញ​រក្សា​សន្តិសុខ​ដែនសមុទ្រ តាមរយៈ​សកម្មភាព​នានា ដូច​ជា​ការទប់ស្កាត់​នៅលើ​លំហ​សមុទ្រ ការ​មុជទឹក និង​ប្រតិបត្តិការ​ជួយសង្គ្រោះ ការ​បំលាស់​ទី និង​ការឆ្លើយតប​នឹង​គ្រោះមហន្តរាយ ជាដើម​។

បន្ថែម​លើ​នេះ​ទៀត សេចក្តីប្រកាស បាន​កត់សម្គាល់​ថា លំ​ហាត់​សមយុទ្ធ CARAT នៅ​ប្រទេស​កម្ពុជា ឆ្នាំ​២០១២ មានបំណង​បង្កើន​កិច្ចសហប្រតិបត្តិការ លើក​កំពស់​ការយល់ដឹង និង​បង្កើន​ការទុកចិត្ត​គ្នា​រវាង​កងទ័ពជើងទឹក​សហរដ្ឋអាមេរិក និង​កងទ័ពជើងទឹក​កម្ពុជា តាមរយៈ​ការលេង​កីឡា និង​កម្មវិធី​សង្គម​នានា​។
​
សេចក្តីប្រកាស​ដដែល បាន​លើកឡើង​ថា លំ​ហាត់​សមយុទ្ធ CARAT ឆ្នាំ​២០១២ ក៏​នឹង​ធ្វើអោយ​ប្រសើរ​ផង​ដែរ​នូវ​ទំនាក់ទំនង​ជាមួយ​សហ​គ​មន៍​ស៊ីវិល តាមរយៈ គំរោង​ផ្តល់​សេវា​ដល់​សហគមន៍​។ ក្រុម​តន្ត្រី​នៃ​កង​នាវា ទី​៧ ក្នុង​កងទ័ពជើងទឹក​សហរដ្ឋអាមេរិក នឹង​ធ្វើ​ការប្រគំ​តន្ត្រី​ជូន​ទស្សនា​ដោយ​ឥតគិតថ្លៃ នៅ​រង្វង់​មូល​ក្នុង​ទី​រួម​ខេត្តកំពត ជិត​ពហុកីឡាដ្ឋាន នៅ​ថ្ងៃ​ពុធ ទី​២៤ ខែតុលា ឆ្នាំ​២០១២ វេលា​ម៉ោង​៧ យប់​។​

​សេចក្តីប្រកាស បាន​លើកឡើង​ថា នៅ​ឆ្នាំ​២០១០ ប្រទេស​កម្ពុជា​បាន​ចូលរួម​ក្នុង​សមយុទ្ធ CARAT ជា​លើកដំបូង​។ ប្រទេស​ដ៏ទៃទៀត​ដែល​បាន​ចូលរួម​ក្នុង​សមយុទ្ធ CARAT រួមមាន​ប្រទេស​បង់​ក្លា​ដែស ប្រ៊ុយណេ ឥណ្តូនេស៊ី ម៉ាឡេស៊ី ហ្វីលីពីន សឹង្ហ​បូរី ថៃ និង​ប្រទេស​ទីម័​រខាង​កើត​។ ចាប់តាំងពី​ឆ្នាំ ១៩៩៥ មក សមយុទ្ធ CARAT ប្រព្រឹត្ត ទៅ​ជា​រៀងរាល់ឆ្នាំ នៅ​តំបន់​អាស៊ីអាគ្នេយ៍​៕​