កំពត: នារសៀលថ្ងៃទី២០ ខែតុលា ឆ្នាំ២០១២ ដែលជាថ្ងៃកាន់ទុក្ខទីបួន របស់ប្រជាជនកម្ពុជា ទូទាំងប្រទេស ចំពោះការចូលទិវង្គតរបស់ព្រះបាទ សម្តេចព្រះ នរោត្តម សីហនុ ព្រះមហាវីរក្សត្រ ព្រះវររាជបិតាឯករាជ្យ បូរណភាពទឹកដី និងឯកភាពជាតិខ្មែរ សិស្ស និងនិស្សិត មកពីគ្រឹះស្ថានឯកជនបី រួមមាន: សាលាចំណេះទូទៅឯកជនវឌ្ឍនវិជ្ជា សកលវិទ្យាល័យឯកទេស នៃកម្ពុជាសាខាខេត្តកំពត និងសកលវិទ្យាល័យអង្គរខេមរា ប្រមាណជិតពីរពាន់នាក់ បានចូលរួមគោរពព្រះវិញ្ញាណក្ខន្ធ ព្រះបរម សព នៅវេទិការង្វង់មូលកណ្តាលក្រុងកំពត ដោយក្តីក្រៀមក្រំបំផុត។
ថ្ងៃទី 21 តុលា 2012
ដោយ: ឌីណា
CEN
នេះជាគំនិតផ្តួចផ្តើមនៃអ្នកគ្រប់គ្រងគ្រឹះស្ថានសិក្សាទាំងបី បំណងឱ្យសិស្សនិស្សិតរបស់ខ្លួនសម្តែងការដឹងគុណនូវមហាគុណូបការៈ នៃអង្គសម្តេចឳ សម្តេចតា ដែលព្រះអង្គបានសាងក្នុងជីវិត តាមរយៈការលះបង់គ្រប់បែបយ៉ាងដើម្បីបុព្វហេតុជាតិ មាតុភូមិ ដើម្បីកូនចៅ ចៅទួត របស់ព្រះអង្គ និងជាឱកាសផ្តល់ជូនសិស្ស និស្សិតបាន គោរពនូវព្រះវិញ្ញាណក្ខន្ធព្រះបរមសព ដែលព្រះអង្គលាចាកទៅគ្មានថ្ងៃវិលត្រឡប់មកវិញនោះ។
តំណាងឱ្យលោកគ្រូ អ្នកគ្រូ សិស្ស និស្សិត ដែលបានចូលរួមក្នុងឱកាសនេះ យុវសិស្សសាលា ចំណេះទូទៅឯកជនវឌ្ឍនវិជ្ជា បានអានសារលិខិតរំលែកទុក្ខដូចមានខ្លឹមសារថា ទូលបង្គំ យើងខ្ញុំជា គណៈគ្រប់គ្រងសាលា ព្រមទាំងសិស្ស និស្សិត ជាកូន ជាចៅ ចៅទួត មានសេចក្តីសោកសៅ ក្រៀម ក្រំស្តាយស្រណោះអាឡោះអាល័យ និងរន្ធត់ក្តុកក្តួលក្នុងចិត្តយ៉ាងខ្លាំង ក្រោយពីបានទទួលដំណឹងថា ព្រះករុណាព្រះបាទសម្តេច ព្រះនរោត្តម សីហនុ ព្រះមហាវីរក្សត្រ ព្រះវររាជបិតាឯករាជ្យ បូរណភាពទឹកដី និងឯកភាពជាតិខ្មែរ ដែលត្រូវជាសម្តេចឳ សម្តេចតា សម្តេចតាទួត ជាទីសក្ការៈដ៏ខ្ពង់ខ្ពស់បានយាងចូលទិវង្គតនៅថ្ងៃទី១៥ រោជ ខែភទ្របទ ឆ្នាំរោង ចត្វាស័ក ព.ស ២៥៥៦ ត្រូវនឹងថ្ងៃទី១៥ ខែតុលា ឆ្នាំ២០១២ វេលាម៉ោង១ និង២០នាទី រំលងអធ្រាត ក្នុងព្រះជន្មាយុ៩០ព្រះវស្សា ដោយព្រះជរាពាធនៅ មន្ទីរពេទ្យក្រុងប៉េកាំង នៃសាធារណរដ្ឋប្រជាមានិតចិន។ ទូលព្រះបង្គំជាខ្ញុំ ខ្ញុំម្ចាស់សូមលើកហត្ថាប្រ ណម បួងសួង ចំពោះគុណបុណ្យព្រះរតនត្រ័យ ព្រមទាំងទេវតាទាំងមួយម៉ឺនលោកធាតុ សូមជួយដង្ហែព្រះវិញ្ញាណក្ខន្ធរបស់ព្រះករុណា ព្រះបាទសម្តេច ព្រះនរោត្តម សីហនុ ឱ្យបានយាងទៅដល់ព្រះរាជសុគតិភពកុំបីខាន។
ជាមួយគ្នានេះដែរ តំណាងអ្នកចូលរួមក៏បានរៀបរាប់ពីព្រះរាជស្នាព្រះហស្ថរបស់មហាវីរក្សត្រ ព្រះបាទ នរោត្តម សីហនុ ក្នុងដំណាក់កាល នៃការតស៊ូរំដោះទឹកដីពីក្រោមអាណានិគមនិយមបារាំង ការទាមទារទឹកដីពីការឈ្លានពានរបស់ប្រទេសជិតខាង និងការកសាងកើតចេញជានូវសមិទ្ធផលសំខាន់ៗ ដោយបន្សល់ទុករហូតដល់សព្វថ្ងៃដែលធ្វើឱ្យប្រជារាស្ត្រខ្មែរជាកូន ជាចៅ ចៅទួត ចៅលួត របស់ព្រះអង្គមិនអាចបំភ្លេចបានអស់មួយជីវិតរៀងៗខ្លួន៕
