ភ្នំពេញ: សម្តេចអគ្គមហាពញាចក្រី ហេង សំរិន ប្រធានរដ្ឋសភា នៃព្រះរាជាណាកច្រកម្ពុជា បានថ្លែងបើកវេទិកាសភាស្តីពី “ការលើកកម្ពស់ និងកិច្ចការពារសិទ្ធិពលករទេសន្តប្រវេសន៍” នៅថ្ងៃទី១២ ខែវិច្ឆិកា ឆ្នាំ២០១២ ឯសណ្ឋាគារកាំបូឌីយ៉ាណា រាជធានីភ្នំពេញ ដោយលើកឡើងថា ទេសន្តប្រវេសន៍ការងារ បានក្លាយជាចំណោទមួយ ក្នុងបណ្តាបញ្ហាសកល ដែលកើតមាននៅដើមសតវត្សទី២១។
ថ្ងៃទី 12 វិច្ឆិកា 2012
ដោយ: វឿន សាវុធ
CEN
សម្តេចអគ្គមហាពញាចក្រី ហេង សំរិន បានបន្តឲ្យដឹងទៀតថា បច្ចុប្បន្ន ស្ទើរគ្រប់ប្រទេសសុទ្ធតែមានការងារធ្វើទេសន្តប្រវេសន៍ ក្នុងឋានៈជាប្រទេសបញ្ជូន ជាប្រទេសឆ្លងកាត់ និងជាប្រទេសទទួលពលករ ឬអាចស្ថិតក្នុងស្ថានភាពទាំងបីតែម្តង (បញ្ជូន ឆ្លងកាត់ និងទទួលពលករ)។ និន្នាការប្រជាសាស្ត្រ គម្លាតប្រាក់ចំណូល ស្ថានភាពសង្គម និងនយោបាយ ព្រមទាំងឱកាសការងារ អាចជាមូលហេតុនាំឲ្យមានលំហូរ នៃការធ្វើទេសន្តប្រវេសន៍។
សម្តេចអគ្គមហាពញាចក្រី ហេង សំរិន បានបន្ថែមថា ទេសន្តប្រវេសន៍ការងារ បានរួមចំណែកយ៉ាងសំខាន់ដល់ដំណើរការអភិវឌ្ឍសេដ្ឋកិច្ច និងសង្គម ក្នុងបរិបទដែលការធ្វើទេសន្តប្រវេសន៍ការងារ មានការគ្រប់គ្រងត្រឹមត្រូវ។ ចំពោះប្រទេសបញ្ជូនពលករ បានទទួលត្រលប់មកវិញ នូវលំហូររូបិយប័ណ្ណ ការផ្ទេរបច្ចេកវិទ្យា និងចំណេះដឹង។ ចំណែកប្រទេសទទួលពលករ បានបំពេញនូវតម្រូវការទីផ្សារការងារ និងជំនាញ ដើម្បីជំរុញសកម្មាភសេដ្ឋកិច្ច។
សម្តេចអគ្គមហាពញាចក្រី ហេង សំរិន បានមានប្រសាសន៍ថា ការពិតណាស់ពលករទេសន្តប្រវេសន៍ បានចូលរួមចំណែកយ៉ាងសំខាន់ និងជាសមាសភាគ ពុំអាចខ្វះបាននៅក្នុងជីវភាពសេដ្ឋកិច្ច និងសង្គមក៏ដោយ ក៏ប៉ុន្តែពលករទេសន្តប្រវេសន៍ បានស្ថិតក្នុងប្រជាពលករងាយរងគ្រោះ។ ស្របពេលដែលចរន្តនៃការធ្វើទេសន្តប្រវេសន៍បានកើនឡើង ក៏មានរបាយការណ៍បង្ហាញពីការរំលោភសិទ្ធិពលករទេសន្តប្រវេសន៍។ ការធ្វើទេសន្តប្រវេសន៍ ពុំត្រឹមត្រូវតាមច្បាប់នៅតែបញ្ហាប្រឈម។ លើសពីនេះ អំពើជួញដូរមនុស្ស និងអំពើធ្វើអាជីវកម្មផ្លូវភេទ បានកើតមានបញ្ហាជាញឹកញាប់នៅក្នុងបរិបទ នៃការធ្វើទេសន្តប្រវេសន៍ពុំរៀបរយ។ ជាលទ្ធផលពលករទេសន្តប្រវេសន៍ទាំងនោះ ត្រូវបានកេងប្រវ័ញ្ច បង្ខំឲ្យធ្វើការក្នុងស្ថានភាពខ្វះអនាម័យ លំបាក គ្រោះថ្នាក់ និងខុសច្បាប់ ដោយមិនគិតដល់ការរំលោភបំពានលើពលករស្ត្រីបំរើការងារក្នុងផ្ទះ ដែលកើតមានជាញឹកញាប់នៅកន្លែងមួយចំនួនទៀតផង។
សម្តេចអគ្គមហាពញាចក្រី ហេង សំរិន បានបញ្ជាក់ថា ដើម្បីឆ្លើយតមទៅនឹងបញ្ហានេះ រាជរដ្ឋាភិបាលកម្ពុជា បានបង្កើននូវកាលានុវត្តភាព ជូនប្រជាពលរដ្ឋតាមរយៈការពង្រីកមុខរបរ និងទីផ្សារការងារក្នុងស្រុកជូនប្រជាពលរដ្ឋក្នុងវិស័យកសិកម្ម ឧស្សាហកម្ម សេវាកម្ម ទេសចរណ៍ និងសំណង់ ជាដើម។ ទោះបីជាយ៉ាងណាក្តី នៅមានប្រជាពលរដ្ឋជាច្រើន ដែលមិនអាចចាប់យកឱកាសទាំងនេះបាន ហើយបានជ្រើសរើសយកការងារទេសន្តប្រវេសន៍ ដើម្បីការងារនៅក្រៅប្រទេស ស្របពេលដែលរាជរដ្ឋាភិបាល កំពុងស្វែងរកដំណោះស្រាយឲ្យបានសមស្របសម្រាប់ការពារសិទ្ធិ និងផលប្រយោជន៍ដល់ពលករទេសន្តប្រវេសន៍ទាំងក្នុងប្រព័ន្ធរៀបរយ និងមិនរៀបរយ។
សម្តេចប្រធានរដ្ឋសភា ក៏បានលើកឡើងថា ស្របតាមយុទ្ធសាស្ត្រចតុកោណដំណាក់កាលទី២ និងផែនការយុទ្ធសាស្ត្រក្រសួងការងារ និងបណ្តុះបណ្តាលវិជ្ជាជីវៈ រាជរដ្ឋាភិបាលបានលើកទឹកចិត្តការនាំចេញពលកម្មជាផ្លូវការត្រឹមត្រូវតាមច្បាប់ ដើម្បីបង្កើនសុខុមាលភាព និងធ្វើឲ្យប្រសើរឡើងនូវជំនាញ កាត់បន្ថយភាពគ្មានការងារធ្វើ និងបង្កើនប្រាក់ចំណូលរបស់ប្រជាពលរដ្ឋ។
សម្តេចអគ្គមហាពញាចក្រី ហេង សំរិន បានបន្តថា ពាក់ព័ន្ធនឹងការគ្រប់គ្រងការបញ្ជូនពលករទៅធ្វើការនៅបរទេសនេះ រាជរដ្ឋាភិបាលបានចាត់វិធានការសមស្របជាច្រើនសំដៅការពារ និងទប់ស្កាត់អំពើជួញដូរមនុស្ស ការរត់ពន្ធមនុស្ស ការរំលោភលើរូបរាងកាយ និងផ្លូវភេទ និងការកេងប្រវ័ញ្ចនានា ដូចជា៖
១) ការចេញអនុក្រឹតស្តីពី ការគ្រប់គ្រងលើការបញ្ជូនពលករខ្មែរ ទៅធ្វើការនៅក្រៅប្រទេស តាមរយៈទីភ្នាក់ងារជ្រើសរើសឯកជន
២) ការបង្កើនគណៈកម្មាធិការជាតិ ដឹកនាំការបង្ក្រាបអំពើជួញដូរមនុស្ស ការរត់ពន្ធធ្វើអាជីវកម្ម ពលករលើមនុស្ស និងអាជីវកម្មផ្លូវភេទលើស្ត្រី និងកុមារដែលជាយន្តការអន្តរក្រសួង
៣) ការបង្កើតគណៈកម្មាធិការបណ្តុះបណ្តាល និងបញ្ជូនពលករទៅធ្វើការនៅបរទេស ដែលជាទីភ្នាក់ងារជ្រើសរើសសាធារណៈ ដើម្បីជ្រើសរើស បណ្តុះបណ្តាល បញ្ជូន និងគ្រប់គ្រងពលករទៅធ្វើការនៅបរទេស ជាពិសេសការងារនៅសាធារណៈរដ្ឋកូរ៉េ តាមប្រព័ន្ធអនុញ្ញាតមុខរបរ
៤) ការបង្កើតគោលនយោបាយស្តីពី ទេសន្តប្រវេសន៍ការងារ
៥) ឯកសារណែនាំតម្រង់ទិសមុនចេញដំណើរ
៦) សៀភៅ “ធ្វើដំណើរដោយភាពវៃឆ្លាត-ធ្វើការងារដោយភាពវៃឆ្លាត”
៧) ប្រព័ន្ធទិន្នន័យទេស្តប្រវេសន៍ការងារ គំរូកិច្ចសន្យា និងសេវារកការងារ។ល។
សម្តេចអគ្គមហាពញាចក្រី ហេង សំរិនបន្ថែមទៀតថា ក្រៅពីនេះ កម្ពុជា បានចុះកិច្ចព្រមព្រៀង និងអនុស្សរណៈ នៃការយោគយល់ជាមួយបណ្តាប្រទេសក្នុងតំបន់ និងអន្តរជាតិ ព្រមទាំងជាហត្ថលេខីនៃសេចក្តីប្រកាស និងអនុសញ្ញាអន្តរជាតិ ដូចជា សេចក្តីប្រកាសអាស៊ាន ស្តីពី ការលើកកម្ពស់ និងកិច្ចការពារសិទ្ធិពលករទេសន្តប្រវេសន៍ អនុសញ្ញាស៊ី-ដ និងអនុសាសន៍ទូទៅលេខ ២៦ ស្តីពីពលករទេសន្តប្រវេសន៍ជាស្ត្រី អនុសញ្ញាអន្តរជាតិស្តីពី កិច្ចការពារពលករទេសន្តប្រវេសន៍ និងសមាជិកគ្រួសារ ដែលជាមូលដ្ឋានគតិយុត្ត សម្រាប់កិច្ចការពារសិទ្ធិពលករទេសន្តប្រវេសន៍។
សម្តេចអគ្គមហាពញាចក្រី ហេង សំរិន បានបន្តថា ការលើកកម្ពស់ និងកិច្ចការពារសិទ្ធិពលករទេសន្តប្រវេសន៍ គឺចំណែកសំខាន់បំផុត នៃការការពារ និងលើកស្ទួយសិទ្ធិមនុស្ស។ សភាមានតួនាទីសំខាន់ណាស់នៅក្នុងការរួមចំណែកការងារ និងការលើកកម្ពស់សិទ្ធិពលករទេសន្តប្រវេសន៍ សំដៅធ្វើយ៉ាងណាឲ្យទេសន្តប្រវេសន៍ការងារដំណើរការលើមាគ៌ាមានរបៀបរៀបរយ សុខុមានភាព និងត្រឹមត្រូវតាមច្បាប់ ដោយអនុម័តច្បាប់ស្តីពី ការអនុម័តព្រមព្រៀងជាមួយរដ្ឋាភិបាលនៃបណ្តាប្រទេសក្នុងតំបន់ស្តីពីការគ្រប់គ្រងការប្រើប្រាស់ហត្ថពលកម្ម។ តាមដានយោគយល់ទាំងទ្វេភាគី និងពហុភាគី។
សម្តេចអគ្គមហាពញាចក្រី ហេង សំរិន បានបន្តទៀតថា ទន្ទឹមនឹងនេះ សភាបានបង្កើតកិច្ចសន្ទនា និងធ្វើការគាំទ្រមតិ ទាំងនៅថា្នក់ជាតិ និងតំបន់លើបញ្ហាទេសន្តប្រវសេន៍ការងារ ជាពិសេសនៅក្នុងក្របខ័ណ្ឌ នៃមហាសន្និបាតអន្តរអាស៊ាន (អាយប៉ា) ព្រមទាំងជំរុញកិច្ចសហប្រតិបត្តិការអន្តរសភា និងផ្នែកពាក់ព័ន្ធ នៃបណ្តាប្រទេសបញ្ជូន ប្រទេសទទួល និងប្រទេសសំចត ដើម្បីផ្លាស់ប្តូរព័ត៌មាន និងមេរៀនពិសោធន៍ល្អៗ ក្នុងគោលដៅបង្កើនការគ្រប់គ្រងពលករទេសន្តប្រវេសន៍ប្រកបដោយប្រសិទ្ធភាពខ្ពស់។
សម្តេចអគ្គមហាពញាចក្រី ហេង សំរិន បានប្រសាសន៍ថា “ជាមួយគ្នានេះ ខ្ញុំសូមក្រសួងពាក់ព័ន្ធទាំងអស់ ជំរុញអនុវត្តកិច្ចព្រមព្រៀង និងអនុស្សរណៈ នៃការយោគយល់ ដែលមានស្រាប់ និងពិនិត្យលទ្ធភាពក្នុងផ្ទាល់សច្ចាប័ន លើអនុញ្ញាអន្តរជាតិដែលពាក់ព័ន្ធ ដើម្បីជាមូលដ្ឋានគតិយុត្ត ការពារសិទ្ធិពលករទេសន្តប្រវេសន៍”។
សម្តេចអគ្គមហាពញាចក្រី ហេង សំរិន បានបញ្ជាក់ទៀតថា ក្រសួងមានសមត្ថកិច្ច ក៏ដូចជាទីភ្នាក់ងារជ្រើសរើសពលករ គួរផ្តល់ព័ត៌មានចាំបាច់ពីប្រពៃណី ទំនៀមទម្លាប់ ស្ថានភាពច្បាប់ និងគោលនយោបាយ នៃបណ្តាប្រទេសទទួលពលករ ដើម្បីឲ្យពលករយើងអាចសម្របខ្លួនមុន ចេញដំណើរទៅធ្វើការនៅបណ្តាប្រទេសទាំងនោះ៕