Monday, 11 February 2013
សេត គឹមសឿន
ភ្នំពេញ ប៉ុស្តិ៍
កណ្តាលៈ ទូងឆាង ទូងឆាង ទូឆាង ទូឆាង! ខណៈពេលដែលសំឡេងបទភ្លេងលោតម៉ុងសាយកំពុងបន្លឺឡើងយ៉ាងក្លៀវក្លា ផ្សែងធូបទៀនឆេះត្របាញ់ឡើងលើដង្គោល អ្នកជាប់សែស្រឡាយចិនកំពុងប៉ាយសំពះឱនងើបៗនៅក្នុងបរិយាកាសដ៏រីករាយនៃពិធីបុណ្យចូលឆ្នាំចិន-វៀតណាម ឆ្នាំម្សាញ់ នោះ ស្រាប់តែព័ត៌មានដ៏រន្ធត់មួយបានបន្លឺឡើងថា ផ្ទះរបស់តារាកំប្លែងល្បីឈ្មោះប្រចាំប្រទេស លោក ជួង ជី ហៅ កុយ កំពុងត្រូវបានអណ្តាតភ្លើងលេបត្របាក់ ដែលធ្វើឲ្យទស្សនិកជនមួយចំនួនដែលកំពុងតែរីករាយនោះ ភ្ញាក់ខ្លួនក្រញាងតែម្តង ប៉ុន្តែលោក ជួង ជី ហៅ កុយ បានបញ្ជាក់ថា មានការឆេះតិចមែន ប៉ុន្តែមិនធ្ងន់ធ្ងរដូចគេនិយាយទេ។
ក្នុងថ្ងៃសែនចិន គ្រប់ក្រុមគ្រួសារដែលមានជាប់សែស្រឡាយចិនទាំងអស់បានរៀបចំសែនព្រេនដូនតារបស់ខ្លួនយ៉ាងយកចិត្តទុកដាក់ ប៉ុន្តែភ្លាមនោះ ខណៈកំពុងតែរីករាយនឹងកម្មវិធីនេះ ស្រាប់តែមានការនិយាយតៗគ្នាថា ផ្ទះរបស់តារាកំប្លែងនាយ កុយ មានអគ្គិភ័យកើតឡើង។ ជាមួយគ្នានោះ វិទ្យុ ABC ក៏បានធ្វើការផ្សាយភ្លាមៗសម្រាប់ជាដំណឹងដល់មហាជនផងដែរ ដែលព័ត៌មាននេះបានបង្កឲ្យមានក្តីបារម្ភមិនតិចទេដល់បណ្តាទស្សនិកជន ពិសេសអ្នកដែលធ្លាប់តែគាំទ្រតារាកំប្លែងជើងចាស់ដ៏មានឈ្មោះបោះសំឡេងម្នាក់នេះ។
អ៊ំស្រី ម៉ាក់ វ៉ុន វ័យ៥៣ឆ្នាំ ជាអ្នកស្រឡាញ់ចូលចិត្តនាយ កុយ និយាយថា៖«ខ្ញុំបានឮគេនិយាយពីមាត់មួយទៅមាត់មួយថា ផ្ទះនាយកុយឆេះ អូយខ្ញុំភ័យណាស់ មិនដឹងគាត់យ៉ាងណាហើយទេ បើគេថា ផ្ទះគាត់ឆេះខ្លាំងដែរ។ ខ្ញុំក៏មិនបានដឹងច្បាស់ដែរថា វាបណ្តាលមកពីអ្វី តែឮគេថា មកពីអុជធូបទៀនមិនប្រយ័ត្ន។ ឥឡូវនេះ មិនដឹងជាយ៉ាងណាទេ»។
ផ្ទះរបស់តារាកំប្លែងលំដាប់ល្បីឈ្មោះជាប់ៗគ្នាជាច្រើនជំនាន់រូបនេះត្រូវបានគេដឹងថា មានអាសយដ្ឋានស្ថិតនៅក្នុងឃុំព្រែកតាជ្រូក ស្រុកស្អាង ខេត្តកណ្តាល។
ជាមួយការនិយាយតៗគ្នាមិនចេះចប់ជុំវិញព័ត៌មាននេះ លោក ជួង ជី ហៅ នាយ កុយ ក៏មិនទុកឲ្យការចង់ដឹងចង់ឮរបស់ទស្សនិកជននេះស្ថិតនៅក្នុងមន្ទិលដែរ ដោយលោកបានចេញមុខមកបញ្ជាក់កាលពីល្ងាចម្សិលមិញ(ថ្ងៃទី១០ មករា) ថា ផ្ទះរបស់លោកពិតជាមានអគ្គិភ័យឆាបឆេះមែន ប៉ុន្តែស្ថានភាពមិនធ្ងន់ធ្ងរខ្លាំងដូចអ្វីដែលគេផ្អើលនិយាយពីមួយទៅមួយនោះទេ។
តារាកំប្លែងលោក ជួង ជី ហៅកុយ បានមានប្រសាសន៍ថា៖ «ការពិតអ៊ីចេះទេ វាឆេះជំនាងផ្ទះនៅពេលយើងអុជធូបសែនហ្នឹង គឺយើងអុជធូបចោល ហើយខ្ញុំបានចេញមកក្រៅអស់ ពេលនោះវាក៏ឆេះឡើងតែម្តង តែសំណាងល្អ ពេលបងខ្ញុំគាត់ឡើងទៅឃើញ ក៏ផ្អើលនាំគ្នាពន្លត់តែម្តងទៅ តែអត់មានអ្វីខ្លាំងក្លានោះទេ»។
លោកបានបន្តថា៖«ការឆេះហ្នឹងអត់មានអីធំដុំទេ តែខាងវិទ្យុ ABC នោះបានផ្សាយដែរ គឺគេផ្សាយពង្រីកឲ្យកាន់តែធំឡើង តាមពិតអត់ទេ»។
តារាកំប្លែងដែលកំពុងវក់វីនឹងការច្រៀងកាត់សក់កូនកំលោះក្រមុំនៅរដូវរៀបមង្គលការរូបនេះបានបញ្ជាក់ថា អគ្គិភ័យនេះមិនបានបង្កការខូចខាតអ្វីនោះទេ ហើយក៏មិនមានអ្នកមានគ្រោះថ្នាក់នោះដែរ៕
វិទ្យុ ABC ចេះធ្វើខ្លួន “ក្អែកមួយ ជាក្អែកដប់” ទៅកើតដែរ។ ធ្វើចឹងប៉ះពាល់ដល់អ្នកទទួលព័ត៍មាន
ធ្វើឲ្យពួកគាត់វិនិច្ឆ័យសភាពការណ៏ខុស។
.
សូមបណ្តាញសារព័ត៍មានទាំងឡាយ សូមរក្សាសច្ចភាព និង សុក្រិតភាពព័ត៍មានសម្រាប់ប្រិយ
មិត្តអ្នកអាន អ្នកស្តាប់ អ្នកតាមដាន។
.
អរគុណ!
គ្រាន់បើជាងពួកអាឆ្កែហ៊ុន សែន និងកូនចៅឆ្កែរបស់វា ដែលតែងតែបិទបាំងអំពីរលាមករបស់ខ្លួន ចំពោះប្រជាពលរដ្ឋដែរ អាឆ្កែ