ភ្នំពេញៈ របាយការណ៍ស្តីពីលទ្ធផលការងារប្រចាំឆ្នាំ២០១២របស់ក្រសួងមហាផ្ទៃបានបង្ហាញថា ពលរដ្ឋខ្មែរ៣០នាក់ ត្រូវទាហានថៃបាញ់ស្លាប់ ដែលចំនួននេះតិចជាងការស្រង់របស់ការិយាល័យទំនាក់ទំនងព្រំដែន។
Friday, 22 February 2013
ផាក់ ស៊ាងលី
ភ្នំពេញ ប៉ុស្តិ៍
តាមរបាយការណ៍ដែលចេញកាលពីថ្ងៃទី២០ ខែកុម្ភៈ បានឲ្យដឹងថា ពីឆ្នាំ២០១១ ពលរដ្ឋខ្មែរ១៧នាក់ ត្រូវទាហានថៃបាញ់ស្លាប់ ហើយក្នុងឆ្នាំ២០១២ មានដល់ទៅ៣០នាក់ គឺមានការកើនឡើងស្មើនឹង៧៦,៦៤ភាគរយ។
របាយការណ៍ដដែលថានៅក្នុងខេត្ត៧ ជាប់ព្រំដែនថៃ មានពលរដ្ឋខ្មែរឆ្លងដែនថៃខុសច្បាប់កើនឡើងច្រើនពីក្នុងឆ្នាំ២០១២មាន៩៧លើក មានអ្នកឆ្លងដែនចំនួន៧៣៩នាក់ ខណៈឆ្នាំ២០១១មានតែ២៦លើកមានអ្នកឆ្លងដែនតែ១០៩នាក់។ ក្រៅពីនេះ ប្រជាពលរដ្ឋខ្មែរ១៩២នាក់ ត្រូវអាជ្ញាធរថៃចាប់ឃុំនៅពន្ធនាគារ ហើយ១២៦.២២៤នាក់ ត្រូវចាប់បញ្ជូនមកវិញ ក្នុងឆ្នាំ២០១២។ តាមរបាយការណ៍នេះពុំមានករណីបាញ់ស្លាប់ទេ នៅខាងព្រំដែនជាប់ជាមួយឡាវ។
តួលេខពីការស្លាប់របស់ក្រសួងមហាផ្ទៃដែលមានចំនួន៣០នាក់ គឺវាមានចំនួនតិចជាងតួលេខ៦ខែដើមឆ្នាំ២០១២ របស់ការិយាល័យទំនាក់ទំនងព្រំដែនកម្ពុជា-ថៃ ដែលមានដល់៣៨នាក់។ តែទោះជាយ៉ាងណា លោក ពេជ្រ វណ្ណា ប្រធានការិយាល័យទំនាក់ទំនងព្រំដែនកម្ពុជា-ថៃ បានអះអាងថា ករណីស្លាប់សរុបនៅឆ្នាំ២០១២ របស់ពលរដ្ឋខ្មែរដែលត្រូវទាហានថៃបាញ់ស្លាប់ គឺមានតែជាង៣០នាក់ទេ។ លោកថា លោកមិនបានចាំពីតួលេខច្បាស់លាស់នោះទេ។
លោកបន្តថា ៖ «របាយការណ៍ពីការស្លាប់ដោយទាហានថៃបាញ់នេះខាងការិយាល័យខ្ញុំមានច្រើនជាង៣០នាក់ គឺច្រើនជាងតួលេខក្រសួងមហាផ្ទៃ។ នេះដោយសារតែការប្រមូលព័ត៌មានមិនដូចគ្នា។ ខាងក្រសួងគាត់បានពីនគរបាល តែការិយាល័យខ្ញុំបានពីមន្ត្រីច្រកទ្វារនីមួយៗ»។ លោកសម្តែងសុទិដ្ឋិនិយមថា នៅក្នុងឆ្នាំ២០១៣ករណីស្លាប់ដោយត្រូវទាហានបាញ់នឹងថយចុះ ដោយសារតែស្ថានភាពនៅដើមឆ្នាំនេះ មានលក្ខណៈល្អប្រសើរច្រើន។
លោក ចាន់ សុវ៉េត មន្ត្រីស៊ើបអង្កេតសមាគមការពារសិទ្ធិមនុស្សអាដហុកយល់ថា វាជាការល្អដែលក្រសួងបានចេញរបាយការណ៍នេះ ទោះជាមានការខុសគ្នាពីការិយាល័យផ្សេងៗទៀតក៏ដោយ។
លោកបញ្ជាក់ថា ៖ «ថៃគេថាពលរដ្ឋយើងមានអាវុធ ទើបគេបាញ់។ អ៊ីចឹងក្រសួងពាក់ព័ន្ធត្រូវធ្វើការស្រាវជ្រាវមើល ថាតើពលរដ្ឋគាត់មានអាវុធមែនទេ។ បើមានមែនតើបានពីណា? អ្នកណានៅពីក្រោយ? ត្រូវនាំជននោះទៅផ្តន្ទាទោស»។ តាមសមាគមអាដហុកស្រង់បាន ពលរដ្ឋខ្មែរ ២៩នាក់ នៅខេត្តឧត្តរមានជ័យ ត្រូវទាហានថៃបាញ់ស្លាប់ក្នុងឆ្នាំ២០១២។ ក្រៅពីនេះមាន៤នាក់នៅ ខេត្តព្រះវិហារ និង២នាក់នៅបាត់ដំបងក៏ត្រូវថៃបាញ់ស្លាប់ដែរ៕
ត្រូវតែធ្វើការអង្កេកឲ្យបានសីុជំរៅរកពីមូលហេតុអ្វីបានជាពួកគាត់ចូលទៅឲ្យគេបាញ់សំលាប់ មិនត្រូវអង្គុយចាំតែស្រង់ទិន្នយ័ពីពលរដ្ឋរបស់ខ្លួនត្រូវគេសំលាប់នោះទេ។ បើដឹងច្បាស់ពីហេតុ ផលដែលពួកគាត់ហើយនោះងាយនិងទប់ស្គាត់ពួកគាត់កុំឲ្យគេបាញ់សំលាប់ទាំងនោះ គួរឲ្យឈឺចាប់ណាស់។
ត្រូវបាញ់ពីព្រោះលួចចូលទៅកាប់ឈើគ្រញូងទឹកដីសៀម
បើសិនមិនចង់ឲ្យមានការបាញ់ប្រជាជនខ្មែរឲ្យចាប់ឃុំខ្លួន
អាជ្ញាធរនិងក្រុមហ៊ុនដែលមានផលប្រយោជន៍ពីការលក់ឈើគ្រញូង៕
គ្រាន់តែតួលេខអ្នកស្លាប់និយាយមិនត្រូវគ្នាផង ចុះកិច្ចការដទៃទៀតយ៉ាងម៉េចវិញ មើលទំនងទៅដូចជាក្រសួងមហា
ផ្ទៃខ្វះមនុស្សធ្វើការ ។ A one man band duty មិនដែលល្អសម្រាប់កិច្ចការទូទៅ វាគ្មានទាល់តែសោះ! ។
ថោកទាបជាងសត្វទៅទៀត ខ្មែរសម័យហ៊ុនសែននេះ បរទេសមើលងាយពេញពិភពលោក តែនៅមានខ្មែរមួយចំនួននៅមានមោទនភាពទៀត។
កុំគិតវែងឆ្ងាយអី មូលហេតុចំបងមកពីរដ្ឋាភិបាលក្រោមការដឹកនាំរបស់សម្ដេចហ៊ុន សែន
អស់សមត្ថភាពក្នុងការដោះស្រាយបញ្ហាភាពក្រីក្រជូនប្រជាពលរដ្ឋទេ នេះត្រឹមបញ្ហាភាពក្រីក្រ
ចុះបើគិតយកបញ្ហាផ្សេងៗជាច្រើនទៀត វាយ៉ាងម៉េចទៅ។
គេបាញ់យើងតែយើងក្រ!
គេបាញ់យើងព្រោះតែយើងក្រ!!