Friday, 08 March 2013
សេត គឹមសឿន
ភ្នំពេញ ប៉ុស្តិ៍
តារាចម្រៀងផលិតកម្មរៃមាសនាង ឡោម លក្ខិណា។ រូបថត សេត គឹមសឿន
ភ្នំពេញៈ ក្រោយពីចំណងស្នេហាផ្អែមល្ហែមស្អិតល្មួតដូចស្ករតាំងម៉ែ ដែលតែងបង្ហាញប្រាប់ឲ្យមហាជនដឹងឮជាញឹកញាប់ដើរដល់ផ្លូវបែកបាក់នោះ គេសង្កេតឃើញថា តារាចម្រៀងស្រីរបស់ផលិតកម្មរៃមាសរាងតូចល្អិត តែមានដើមទ្រូងស្អាតពើងធំបញ្ចេញសាច់ខ្ចីទ្រលុកទ្រលន់គួរឲ្យគយគន់ នាង ឡោម លក្ខិណា ហាក់ដូចជាមិនចង់រំឭកអំពីអតីតគូស្នេហ៍ដែលជាតារាចម្រៀងរ៉េប ឌីជេក្តឹប ឡើយ ដោយនាងអះអាងថា រឿងនោះនាងបានកប់ចោលបាត់ទៅហើយ។
ថ្វីដ្បិតតែមានការអះអាងពីអ្នកជិតស្និទ្ធនៅក្នុងសិល្បៈថា ពួកគេទាំងពីរបានឈានដល់ផ្លូវបែកបាក់មួយរយៈក្តី ហើយនាងហាក់ដូចជាមិនចង់ទទួលស្គាល់ពីការបែកបាក់នេះតែបើសួរនាំឲ្យស៊ីជម្រៅនោះ ឡោម លក្ខិណា ក៏មិនចង់រំឭករឿងដានដាមអនុស្សាពីអតីតកាលដែរខណៈដែលនាងប្រាប់ថា រឿងចំណងស្នេហ៍មួយនេះនាងបានកប់ចោលបាត់ទៅហើយ។ លក្ខិណា បានឲ្យសារព័ត៌មានក្នុងស្រុកដឹងថា៖«ខ្ញុំមិនចង់និយាយពីគេ (ឌីជេក្តឹប) នោះឡើយ ព្រោះខ្ញុំ និងគេ គ្មានអ្វីទាក់ទងគ្នាដែរ ពួកខ្ញុំគ្រាន់រាប់អាន និងតែងធ្វើដំណើររួមគ្នាប៉ុណ្ណោះកាលពីពេលកន្លងមក ប៉ុន្តែមួយរយៈចុងក្រោយនេះ ការងាររបស់ខ្ញុំមមាញឹកច្រើន គាត់ក៏រវល់ដូច្នេះក៏គ្មានពេលជួបគ្នាដែរ»។
អ្នករស់នៅក្នុងសង្គមសិល្បៈបានឲ្យដឹងថា ស្នេហារបស់ពួកគេទាំងពីរធ្លាប់មានការបែកបាក់គ្នាម្តងមកហើយ តែក្រោយមកក៏ជួបជុំគ្នាវិញ ប៉ុន្តែលើកនេះពួកគេពិតជាបែកគ្នាមែនទែនហើយ ហើយ ទាំង ឡោម លក្ខិណា និងនាយ ក្តឹប ក៏មិនចង់សើរើចំណងស្នេហ៍ជូរចត់នោះឡើងវិញដែរ។ ភាពឈឺចាប់នេះ ត្រូវបានគេសង្ស័យថា អាចបណ្តាលមកពីមានជនទី៣ជាអ្នកចូលមកជ្រៀតជ្រែក។
មួយរយៈនេះគេសង្កេតឃើញ ឡោម លក្ខិណា បែរជាទៅមានភាពស្និទ្ធស្នាលប្លែកជាមួយនឹងតារាចម្រៀងក្នុងក្រុមតែមួយគឺលោក រតនៈ ពិសិដ្ឋ ប៉ុន្តែការសង្ស័យនេះត្រូវបាននាង ឡោម លក្ខិណា បានធ្វើការបដិសេធភ្លាមៗ ដោយនាងប្រាប់ថា លោក រតនៈ ពិសិដ្ឋ និងរូបនាងគ្រាន់តែជាមិត្តភក្តិរួមអាជីពតែប៉ុណ្ណោះ។ ដោយឡែកតារាចម្រៀងលោក រតនៈ ពិសិដ្ឋ វិញ ក៏បានបកស្រាយដូចគ្នានឹងតារាចម្រៀងនាង ឡោម លក្ខិណា ដែរ។
តារាចម្រៀងធ្មេញចំពើសនាងឡោម លក្ខិណា បញ្ជាក់ថា៖«អត់ទេ! មានឯណា ខ្ញុំ និងបងសិដ្ឋ រាប់អានគ្នា ដូចបងប្អូន»។ រីឯរតនៈ ពិសិដ្ឋ និយាយថា ពួកខ្ញុំរាប់អានគ្នាដូចបងប្អូនហ្នឹង តែលោកនិយាយលេងសើចថា បើនាងព្រមស្រឡាញ់មែនក៏ល្អដែរ។
នៅពេលនាង និងលោក រតនៈ ពិសិដ្ឋ បដិសេធបែបនេះមានសំណួរជាច្រើនបានចោទសួរថា តើ ឡោម លក្ខិណា និងឌីជេ ក្តិប បែកគ្នាដោយសារអ្វី? ភ្លាមនោះគេនឹកឃើញថា ឡោម លក្ខិណា ទើបតែវិលត្រឡប់មកពីប្រទេសអូស្ត្រាលី នោះប្រហែលជានាងលង់ស្នេហ៍នឹងបុរសអូស្ត្រាលីណាម្នាក់ទេដឹង? ប៉ុន្តែនៅពេលឮសំណួរបែបនេះ លក្ខិណា ក៏បានបដិសេធភ្លាមផងដែរ។ តែទោះបីជាយ៉ាងណាមានប្រភពពីសិល្បៈបញ្ជាក់ថា ការបែកបាក់ប្រហែលជាបណ្តាលមកពីគ្រួសារនាង និងគ្រួសាររបស់នាយ ក្តឹប មិនសូវមានការចុះសម្រុងនឹងគ្នា៕