ភ្នំពេញៈ អង្គជំនុំជម្រះតុលាការកំពូល នៃសាលាក្តីខ្មែរក្រហម កាលពីម្សិលមិញ បានបញ្ជាឲ្យក្រឡាបញ្ជីនៃអង្គជំនុំជម្រះសាលាដំបូងរបស់ សាលាក្តី បញ្ជូនបន្តឲ្យខ្លួននូវឯកសារទាំងអស់ ដែលមានក្នុងសំណុំរឿង០០២ ដោយថ្លែងថា ខ្លួនត្រូវបានបដិសេធមិនប្រគល់ឲ្យនូវឯកសារដែលពាក់ព័ន្ធ នឹងបណ្តឹងសារទុក្ខ ដែលដាក់ដោយក្រុមមេធាវីការពារក្តី។
Wednesday, 13 March 2013
Stuart White
ភ្នំពេញ ប៉ុស្តិ៍
មន្ត្រីសាលាក្តីខ្មែរក្រហម ចូលរួមនៅក្នុងកិច្ចប្រជុំមួយ កាលពីពេលកន្លងមក។ រូបថត ហេង ជីវ័ន
នៅក្នុងសេចក្តីសម្រេចនោះ អង្គជំនុំជម្រះតុលាការកំពូល បានអះអាងថា ក្រឡាបញ្ជីបានធ្វើការបកស្រាយ វិធានផ្ទៃក្នុងរបស់តុលាការ ក្នុងវិធីមួយដែល «ភាន់ច្រឡំ និងបណ្តាលឲ្យមានភាពយឺតយ៉ាវ» ដោយបដិសេធមិនប្រគល់បន្ត ឲ្យអង្គជំនុំជម្រះនូវឯកសារសម្ងាត់ៗ ដែលពួកគេចាត់ទុកថាមិនពាក់ព័ន្ធនឹងបណ្តឹងសារទុក្ខ ដែលកំពុងត្រូវបានពិចារណាដោយស្ថាប័នថ្នាក់ខ្ពស់ជាង។
លោក Michael Karnavas មេធាវីការពារក្តីឲ្យលោក អៀង សារី ដែលបណ្តឹងសារទុក្ខរបស់លោកត្រូវបានលើកឡើងនៅក្នុងសេចក្តី សម្រេចនោះដែរ បានថ្លែងថា បញ្ហាដែលផ្តល់ឲ្យនូវលទ្ធភាពទទួលបានឯកសារកត់ត្រាទាំង អស់របស់តុលាការ«បំពាន»ទៅលើកិច្ចខិតខំប្រឹងប្រែងផ្ទាល់ ខ្លួនរបស់លោក ក្នុងការបង្កើតឯកសារកត់ត្រាពេញលេញនេះ។
លោក Michael ដែលប្តឹងសារទុក្ខចំពោះការបដិសេធរបស់ស្ថាប័នថ្នាក់ក្រោម ដែលហាមមិនឲ្យលោកធ្វើការថតវីដេអូថេបកូនក្តីរបស់លោក ដើម្បីជាភ័ស្តុតាងនៃស្ថានភាពជំងឺរបស់កូនក្តី ដោយខ្លួនលោកដើម្បីតាមដាននីតិវិធីតុលាការបានថ្លែងថា៖ «យើងបានព្យាយាមខិតខំក្នុងដំណើរការនេះដើម្បីបង្កើតការថត ឯកសារមួយ ដែលមានគោលបំណងត្រឹមត្រូវ និងអាចផ្ទៀងផ្ទាត់បាន ដែលនឹងអាចធ្វើឲ្យអង្គជំនុំជម្រះតុលាការកំពូលអាចកំណត់ ថា តើមានកំហុស… ដែលធ្វើឡើងដោយអង្គជំនុំជម្រះសាលាដំបូង»។
លោកបន្ថែមថា៖ «ថាតើតុលាការកំពូល នឹងច្រានចោលសេចក្តីសម្រេចណាមួយរបស់អង្គជំនុំជម្រះសាលាដំបូង បន្ទាប់ពីពិនិត្យមើលរាល់អ្វីៗទាំងអស់ នោះគឺជាអ្វីផ្សេងមួយទៀត។ នោះយើងមិនអាចទស្សន៍ទាយបានទេ»។
លោក Michael បានបន្តថ្លែងថា សេចក្តីសម្រេចរបស់តុលាការកំពូលបានបង្ហាញឲ្យឃើញអំពីអ្វីមួយ ដែលធ្វើឡើងដោយក្រឡាបញ្ជីរបស់អង្គជំនុំជម្រះសាលាដំបូង។
លោកបានបន្តថា៖ «ចៅក្រមត្រូវបានចោទប្រកាន់ថាធ្វើឲ្យមានកំហុសទាំងក្នុង ផ្នែកអង្គច្បាប់និងអង្គហេតុ…ជាធម្មតាមិនឲ្យជ្រើសរើស ថា តើភ័ស្តុតាងអ្វី ដែលតុលាការថ្នាក់ខ្ពស់នឹងពិនិត្យនោះទេ»។ លោកបានបន្ថែមថា៖ «ប្រហែល បើមើលទៅសេចក្តីសម្រេចនោះ [តុលាការកំពូល]កំពុងកត់សម្គាល់អ្វីមួយ ហើយពួកគេកំពុងធ្វើអ្វីមួយ»៕ PS