ពោធិ៍សាត់ៈ យ៉ាងហោចណាស់ផ្ទះប្រជាពលរដ្ឋចំនួន១៤ខ្នង ក្នុងភូមិចំនួន៧ ស្ថិតក្នុងស្រុកបាកាន ខេត្តពោធិ៍សាត់ ត្រូវបានបំផ្លាញដោយសារភ្លៀងកក់ខែ លាយឡំនឹងខ្យល់ ដែលបានធ្លាក់កាលពីថ្ងៃទី ១២ ខែ មីនា ឆ្នាំ ២០១៣ ដោយបណ្តាលឲ្យមនុស្សពីរនាក់រងរបួសផងដែរ។
Wednesday, 13 March 2013
គឹម យុទ្ធណា
ភ្នំពេញ ប៉ុស្តិ៍
លោក សៅ ដារឿន អភិបាលស្រុក បាកានបានប្រាប់ភ្នំពេញប៉ុស្តិ៍កាលពីថ្ងៃម្សិលមិញថា ឥទ្ធិពលភ្លៀងកក់ខែ លាយជាមួយនឹងខ្យល់ព្យុះដែលបានកើតឡើងកាលពីវេលាម៉ោងជាង ៣រសៀលថ្ងៃ ទី១២ បានបំបើងផ្ទះប្រជាពលរដ្ឋឲ្យរងការខូចខាតអស់ចំនួន១៤ខ្នង ក្នុងនោះ៨ខ្នងត្រូវបានបំផ្លាញទាំងស្រុង ខណៈ៦ខ្នងផ្សេងទៀតបានប៉ើងដំបូល និងជញ្ជាំង ហើយឥទិ្ធពលភ្លៀងនេះក៏បានបង្កឲ្យមនុស្សពីរនាក់រងបួសធ្ងន់ និងស្រាលផងដែរ ប៉ុន្តែមិនបណ្តាលឲ្យនរណាម្នាក់ស្លាប់នោះទេ។
លោកបញ្ជាក់ថា៖« វាករណីភ្លៀងកក់ខែលើកដំបូង នៅក្នុងស្រុកបាកាន ដែលបណ្តាលឲ្យមានផ្ទះរបស់ប្រជាពលរដ្ឋមួយចំនួនទទួលរងការខូចខាត។ យើងមានការសោកស្តាយ ប៉ុន្តែយើងបានចាត់ចែងឲ្យមានការជួយសង្គ្រោះបន្ទាន់រួចហើយ កាលពីថ្ងៃម្សិលមិញ តាមរយះកាកបាទក្រហម ខេត្ត និងស្រុក»។
បើតាមលោក កែវ វី នាយខុទ្ទកាល័យ និងជាអនុប្រធាននាយកដ្ឋានព័ត៌មាននៃគណៈកម្មាធិការជាតិគ្រប់គ្រងគ្រោះមន្តរាយបានឲ្យដឹងកាលពីថ្ងៃម្សិលមិញថា ឥទ្ធិពលភ្លៀងកក់ខែនៅដើមឆ្នាំនេះនៅមិនទាន់មានឥទ្ធិពលខ្លាំងនោះទេ វាទើបតែនឹងកើតមាន២ទៅ ៣ករណីតែប៉ុណ្ណោះនៅទូទាំងប្រទេស ដូចជានៅខេត្ត ប៉ៃលិន ខេត្តកំពត ប៉ុន្តែលោកថា នៅមិនទាន់បូកតួលេខនៃការខូចខាតនៅឡើយនោះទេ។
ប៉ុន្តែករណីរន្ទះខែប្រាំងមានចំនួនបីលើក និងបានប្រល័យជិវិតមនុស្សអស់ចំនួនពីរនាក់ ខណៈ ៥នាក់ផ្សេងទៀតបានរងបួស។ ដោយឡែក ចំនួនអ្នកស្លាប់ដោយសាររន្ទះបាញ់កាលពីឆ្នាំ ២០១២កន្លងទៅមានចំនួនរហូតដល់ទៅ ១០៣នាក់ និងអ្នករបួស៧១នាក់ និងបានបង្កឲ្យគោ ក្របី ៣៤ក្បាលងាប់ និងខូចខាតផ្ទះសម្បែងរបស់ប្រជាពលរដ្ឋអស់៥ខ្នង។