ភ្នំពេញៈ លោកនាយករដ្ឋមន្រ្តី ហ៊ុន សែន កាលពីថ្ងៃចន្ទ បានសម្តែងការពេញចិត្តចំពោះក្រុមអ្នកច្បាប់កម្ពុជា និងមេធាវីបរទេសដែលលើកទឡ្ហីករណ៍នៅក្នុងរឿងក្តីទឹកដីប្រាសាទព្រះវិហារនៅតុលាការយុតិ្តធម៌អន្តរជាតិក្នុងទីក្រុងឡាអេ កាលពីសប្តាហ៍មុន។
Tuesday, 23 April 2013
វង្ស សុខេង
ភ្នំពេញ ប៉ុស្តិ៍
ថ្លែងទៅកាន់អ្នកភូមិរាប់រយនាក់នៅក្នុងអំឡុងពិធីកាត់ឫសសីមាវិហារវត្តសិរីឧត្តម ក្នុងស្រុកស្វាយអន្ទរ ខេត្តព្រៃវែង លោកនាយករដ្ឋមន្រ្តី ហ៊ុន សែន មានប្រសាសន៍ថា សវនាការរយៈពេល៤ថ្ងៃបានផ្តោតលើចំណុចសំខាន់ពីរគឺកម្ពុជាចង់ឲ្យតុលាការបកស្រាយសាលក្រមឆ្នាំ១៩៦២ទាក់ទិននឹងទឹកដីវិវាទ និងមិនបានកំណត់ជុំវិញប្រាសាទព្រះវិហារ ចំណែកឯថៃទទូចកុំឲ្យតុលាការបកស្រាយ។
លោក ហ៊ុន សែន បានថ្លែងថា ៖ «ទោះជាយ៉ាងណា នេះជាសិទិ្ធរបស់តុលាការយុតិ្តធម៌អន្តរជាតិ យើងគ្មានសិទិ្ធទេ»។
កម្ពុជា និងថៃបានតវ៉ាគ្នាលើផ្ទៃដីទំហំ៤,៦គីឡូម៉ែត្រការ៉េតាមបណ្តោយព្រំដែនក្បែរប្រាសាទព្រះវិហារជាចំណែកទឹកដីដ៏ចម្រូងចម្រាសដែលកើតមានការប៉ះទង្គិចគ្នាស្លាប់ជីវិតមនុស្សចាប់តាំងពីឆ្នាំ២០០៨មក។ តុលាការយុតិ្តធម៌អន្តរជាតិរំពឹងថា នឹងសម្រេចលើរឿងក្តីនេះនៅពេលក្រោយ ក្នុងឆ្នាំនេះ។
នេះជាលើកទី១ ដែលលោកហ៊ុន សែន ថ្លែងអំពីសវនាការ ចាប់តាំងពីសវនាការបានបញ្ចប់កាលពីថ្ងៃសុក្រសប្តាហ៍មុន ហើយលោកបានឆ្លៀត ឱកាសអំពាវនាវឲ្យនៅស្ងប់ស្ងាត់ និងគោរពតាមសេចក្តីសម្រេចរបស់តុលាការ ទោះជាមានលទ្ធផលយ៉ាងម៉េចក៏ដោយ។
លោក ហ៊ុន សែន បានគូសបញ្ជាក់ថា៖ «ខ្ញុំបានទាក់ទងលោកស្រីនាយករដ្ឋមន្រ្តី យីងឡាក់ ស៊ីណាវ៉ាត្រា [ហើយបាននិយាយ] ថាវាមិនសំខាន់ទេថាតើតុលាការនឹងចេញសេចក្តីសម្រេចអ្វីនោះកម្ពុជា និងថៃនឹងមិនក្លាយជាសត្រូវនឹងគ្នាទេ ព្រោះកម្ពុជានិងថៃដូចអណ្តាតនិងធ្មេញ ពួកគេមិនអាចផ្តាច់ចេញពីគ្នាបានឡើយ។ យើងមិនខ្វល់ទេថាតើអ្នកណាឈ្នះ ឬអ្នកណាចាញ់»។
លោក ហ៊ុន សែន បានព្យាករថា តុលាការយុតិ្តធម៌អន្តរជាតិពិតជាបកស្រាយឡើងវិញនូវសាលក្រមឆ្នាំ១៩៦២ ជាជាងបដិសេធមិនបំភ្លឺ ឬច្រានចោលរឿងក្តីនេះ ព្រោះតុលាការត្រូវតែសម្រេចលើតំបន់គ្មានយោធាបណ្តោះអាសន្នដែលខ្លួនបានបង្កើតឡើងកាលពីឆ្នាំ ២០១១ និងទី២ ចៅក្រមតុលាការយុតិ្តធម៌អន្តរជាតិបានស្នើសុំប្រទេសទាំងពីរឲ្យដាក់ផែនទីជាមួយ នឹងនិយមន័យនៃពាក្យស្តីពីទីបរិវេណប្រាសាទដែលជាសញ្ញាបង្ហាញថា តុលាការនេះអាចប្រើសេចក្តីសម្រេចរបស់ខ្លួនដើម្បីដោះស្រាយការទាមទារជាន់គ្នា។
លោកនាយករដ្ឋមន្ត្រីបានបន្តថា តុលាការតម្រូវឲ្យមានការឆ្លើយតបជាលាយលក្ខណ៍អក្សរ ពីភាគីទាំងពីរ នៅត្រឹមថ្ងៃសុក្រគឺថ្ងៃទី ២៦ ខែមេសា ហើយភាគីទាំងពីរត្រូវដាក់ការឆ្លើយតបចំពោះនិយមន័យគ្នាទៅវិញទៅមកនៅត្រឹមថ្ងៃទី៣ខែឧសភា។
បន្ទាប់ពីបានមកដល់អាកាសយានដ្ឋានអន្តរជាតិភ្នំពេញ កាលពីម្សិលមិញ ឧបនាយករដ្ឋមន្ត្រី លោក ហោ ណាំហុង ដែលជារដ្ឋមន្រ្តីការបរទេសនិងសហប្រតិបត្តិការអន្តរជាតិដែលដឹកនាំប្រតិភូកម្ពុជាទៅកាន់ទីក្រុងឡាអេ ប្រទេសហូឡង់បានថ្លែងថា លោកបានពិភាក្សាជាមួយនឹងសមភាគីថៃលោករដ្ឋមន្ត្រីការបរទេសថៃ Surapong Tovichakchaiku ខណៈប្រទេសទាំងពីរយល់ព្រមរក្សាភាពស្ងប់ស្ងាត់ និងគោរពតាមសេចក្តីសម្រេចរបស់តុលាការដោយស្ងៀមស្ងាត់។
លោក ហោ ណាំហុង បានថ្លែងបន្តថា៖ «យើងបានផ្តល់មូលហេតុទាំងអស់រួចហើយ ហើយទុកឲ្យតុលាការយុតិ្តធម៌អន្តរជាតិចេញសេចក្តីសម្រេចក្នុងរឿងក្តីនេះ»។
នៅឯប្រទេសថៃ ក្រុមអ្នកគាំទ្រក៏បានស្វាគមន៍សមាជិកក្រុមអ្នកច្បាប់ថៃផងដែរ ក្នុងដំណើរវិលមកដល់ប្រទេសថៃវិញកាលពីថ្ងៃអាទិត្យ។
យោងតាម កាសែតបាងកក ប៉ុស្តិ៍ បានឲ្យដឹងថា ក្រុមប្រតិភូថៃបានទទួលកម្រងផ្កា និងបដាថ្លែងអំណរគុណពួកគេចំពោះការងារយ៉ាងសកម្មក្នុងការតតាំង របស់ខ្លួនចំនួនបួនថ្ងៃ ក្នុងដំណើរការនៃសវនាការរបស់តុលាការអន្តរជាតិនាទីក្រុងឡាអេ។
លោក Virachai Plisai Virachai ឯកអគ្គរាជទូតថៃប្រចាំទីក្រុងឡាអេ បានថ្លែងប្រាប់បណ្តាញសារព័ត៌មាននៅពេលមកដល់ប្រទេសថៃទៅកាន់អ្នកគាំទ្រថា៖ «ខ្ញុំបានខិតខំអស់ពីសមត្ថភាពខ្ញុំហើយ»៕ TK
បញ្ញាវ័ន្ដកូនខ្មែរអើយ!!! នេះឬប្រជាធិបតៃ របស់ប្រទេសយើង? ពេលចៅហ្វាយក្រុងឬចៅហ្វាយខេត្តចប់អាណាត់ក៏ចាប់អ្នកថ្មីមកជំនួសភ្លាមដោយគ្មានការឲ្យឈរឈ្មោះជាទូទៅសំរាប់ឲ្យរាស្រ្តប្រជាបោះឆ្នោតអញ្ចឹង???
ហើយកូននាក់ធំអាចឈរជាបេក្ខជនតំណាងរាស្រ្ត ឯបញ្ញាវ័ន្ដកូនខ្មែរទាំងឡាយគ្មានសឹទ្ធិឈរជាបេក្ខជនតំណាងរាស្រ្តមកពីហេតុអ្វីសម្ដាចម៍??? ឬក៍ឪពុកម្តាយគេមិនបានធ្វើនយោបាយជាមួយសម្ដាចម៍???………………….???