ភ្នំពេញៈ តំណាងពលរដ្ឋក្នុងសហគមន៍បុរីកីឡាម្នាក់ កាលពីម្សិលមិញបានចូលទៅឆ្លើយបំភ្លឺនៅសាលាដំបូងរាជធានីភ្នំពេញជុំវិញបណ្ដឹងចោទប្រកាន់របស់អ្នកស្រីស៊ុយ សុផាន ប្រធានក្រុមហ៊ុន ផានអ៊ីម៉ិច ជាក្រុមហ៊ុន ដែលអ្នកភូមិបានចោទថា បានប្រើកម្លាំងនិងគ្រឿងចក្រឈូសបំផ្លាញផ្ទះនិងទ្រព្យសម្បត្តិ របស់ពួកគាត់ដោយពុំមានការផ្តល់សំណង។
Thursday, 25 April 2013
ឃុត សុភចរិយា
ភ្នំពេញ ប៉ុស្តិ៍
ស្ត្រីបឹងកក់ និងបុរីកីឡាដាក់បណ្តាសាមន្ត្រីតុលាការកាលពីម្សិលមិញ។ រូបថត ម៉ៃ វីរៈ
អ្នកភូមិបុរីកីឡាដែលត្រូវបានបណ្តេញចេញពីលំនៅដ្ឋាន បានឲ្យដឹងថា ពួកគាត់បានដាក់ពាក្យបណ្តឹងប្រឆាំងនឹងអ្នកស្រីស៊ុយ សុផាន តាំងពីយូរមកហើយ ពីបទមិនគោរពកិច្ចសន្យា ក្នុងការសាងសង់អគារចំនួន១០ សម្រាប់ចែកជូនពួកគាត់ដោយសាងសង់តែ ៨ អគារ ហើយបានប្រើកម្លាំងឈូសបំផ្លាញផ្ទះសំបែង និងទ្រព្យសម្បត្តិរបស់ពួកគាត់ ក្នុងការបណ្តេញចេញដ៏ហិង្សាមួយ កាលពីដើមឆ្នាំ ២០១២។ ប៉ុន្តែមិនត្រូវបានសាលាដំបូងរាជធានីអើពើឡើយបែរជាទៅចាត់ការបណ្តឹងរបស់អ្នកស្រីស៊ុយ សុផាន ដែលជាភាគីរំលោភយកផ្ទះពួកគាត់ទៅវិញ។
អ្នកស្រី ស ស៊ន តំណាងពលរដ្ឋចំនួន ៤៥ គ្រួសារ ក្នុងសហគមន៍បុរីកីឡា ដែលបានចូលទៅបោះតង់ស្នាក់នៅបណ្ដោះអាសន្ន នៅលើដីដែលជាអតីតផ្ទះរបស់ខ្លួនដែលម្ចាស់ក្រុមហ៊ុនសាងសង់អគារផ្ទះល្វែងបុរីកីឡា បានលក់ផ្ទេរទៅឲ្យលោក ឧកញ៉ា ស៊ី គង់ទ្រីវ នោះ បាននិយាយថា អ្នកស្រី ត្រូវបានតុលាការកោះហៅឲ្យចូលទៅបំភ្លឺជុំវិញបណ្ដឹងចោទប្រកាន់មួយ របស់អ្នកស្រី ស៊ុយ សុផាន ដែលបានប្ដឹងអ្នកស្រីពីបទ «ប្រើអំពើហិង្សាលើអ្នកកាន់កាប់អចលនវត្ថុដោយសុចរិត»។ អ្នកស្រីថ្លែងថា៖«ខ្ញុំមិនតក់ស្លុតទេ ព្រោះខ្ញុំមិនបានប្រព្រឹត្តិដូចបទចោទប្រកាន់នេះឡើយ»។
អ្នកស្រីបន្តថា ទីតាំងដីដែលពួកគាត់បាននាំគ្នាចូលទៅបោះតង់ស្នាក់នៅជាបណ្ដោះអាសន្ននោះ គឺជាអតីតដីលំនៅដ្ឋានរបស់អ្នកស្រីដែលត្រូវបានម្ចាស់ក្រុមហ៊ុនផានអ៊ីម៉ិច ប្រើគ្រឿងចក្រឈូសឆាយ រំលោភយកកាលពីដើមខែមករាឆ្នាំមុន ដែលរហូតមកទល់ពេលនេះ នៅមិនទាន់មានដំណោះស្រាយអ្វីទាំងអស់។
អ្នកស្រីបានបញ្ជាក់ថា ៖«ខ្ញុំនឹងរុះរើតង់ចេញពីទីនេះភ្លាមនៅពេលខ្ញុំទទួលបានដំណោះស្រាយជាផ្ទះល្វែង»។ អ្នកស្រីបន្តថាអ្នកស្រី បានព្យាយាមទៅតុលាការតាមកាលកំណត់ ដើម្បីឆ្លើយបំភ្លឺជុំវិញពាក្យបណ្ដឹងចោទប្រកាន់នោះ ប៉ុន្តែតុលាការបែរជាមិនបានធ្វើការសាកសួរអ្វីទាំងអស់។ អ្នកស្រីបានបញ្ជាក់ថា៖«ខ្ញុំបានទៅតាមកាលកំណត់ ប៉ុន្តែលោក ស៊ឺ វណ្ណនី ព្រះរាជអាជ្ញារងតុលាការរាជធានីភ្នំពេញ ដែលបានចេញដីការកោះហៅខ្ញុំមកបំភ្លឺនោះ បានប្រាប់ថាសុំលើកពេល ហើយឲ្យខ្ញុំត្រឡប់ទៅវិញ ដោយរង់ចាំរហូតដល់មានដីការកោះជាថ្មីទៀត»។
លោក ស៊ឺ វណ្ណនី មិនអាចទំនាក់ទំនងសុំការពន្យល់បានទេ ចំពោះការពន្យារពេលនៃការសាកសួរនេះកាលពីម្សិលមិញ ប៉ុន្តែបើតាមមន្ត្រីតុលាការម្នាក់ដែលបាននិយាយក្នុងលក្ខខណ្ឌមិនបញ្ចេញឈ្មោះ បានឲ្យដឹងថា ការលើកពេលនេះ គឺបណ្ដាលមកពីអ្នកភូមិលើកគ្នាមកស្រែកឡូឡាច្រើនពេកនៅមុខតុលាការ ដែលជាការរំខានដល់ដំណើរការ ការងាររបស់តុលាការ។
ខណៈពេលដែលក្រុមប្រជាពលរដ្ឋសហគមន៍បុរីកីឡា រៀបនឹងត្រឡប់ទៅកាន់លំនៅឋានក្រោមតង់កៅស៊ូរយីករយាករបស់ពួកគាត់វិញ ក្រុមប្រជាពលរដ្ឋមកពីសហគមន៍បឹងកក់បាននាំគ្នាទូលកញ្ជើលាជ និងក្អម ដែលមានដាក់អង្ករ ម្ទេស អំបិល និងមានទាន ធូប ក្រដាស ប្រាក់ដុល្លារ [សម្រាប់ដុតសែនខ្មោច] បានមកដល់មុខតុលាការនេះ ហើយពួកគេបាននាំគ្នាស្រែកដាក់បណ្ដាសាដល់ក្រុមមន្ត្រីតុលាការមួយចំនួន ជាអ្វីដែលពួកគាត់ថា មន្ត្រីតុលាការទាំងនោះ ពុករលួយ បម្រើតែផលប្រយោជន៍របស់ក្រុមហ៊ុន និងអ្នកមានប្រាក់ ហើយធ្វើឲ្យពួកគាត់ជាប្រជាពលរដ្ឋក្រីក្រកាន់តែរងទុក្ខវេទនា៕
លេងផ្លូវច្បាប់មិនឈ្នេះមកលេងផ្លូវងងឹតហើយតើនេះ !
ព្រះមានបារមី គឺយុត្តិធម៌នៃមនុស្សមិនមែនសំរោចទៅលើបណ្តាសារនោះទេ
ការចង់ចាញ់ចងឈ្នះគ្នារវាងរដ្ឋាភិបាលនិងអ្នកក្រីក្រតោកយ៉ាក។ គ្រាន់តែមើលមួយត្រួសគឺឃើញ ភាពខុសឆ្ងាយគ្នាណាស់រវាងគូរទំនាស់ទាំងពីរនេះ មួយអ្នមហាមានអំណាចមានផ្ទះរស់នៅយ៉ាងធំៗស្កឹមស្កៃទៅឈ្លោះជាមួយអ្នកក្រីក្រដែលគ្មានអំណាចគ្មានផ្ទះសំបែងរស់នៅ។ ទីបញ្ចប់តើមួយណាអាចយកជ័យជំនៈបាន។ នេះហើយជារូបភាពពិតដែលធ្លាប់តែមានជាទ្ត្រឹស្តីគឺ (ពងមាន់កុំជល់និងថ្មរ)។ បើគ្រាន់តែមើលគឺពងមានទន់ៗហេតុអីក៍អាចជល់និងថ្មរបាន??? ហេតុអីបានជាថ្មមានសភាពរឹង ហើយនៅស្ទាក់ស្ទើរមិនហ៊ានជល់និងពងមាន់???
ស៊ឺ វណ្ណនី ជាមន្ត្រីតុលាការ ពុករលួយ បម្រើតែផលប្រយោជន៍អ្នកមានប្រាក់ មានអំណាច
Hun Sen’s government should not have allowed, to use policement or military, to force against with civilan out from their homes, without concerning the condition of being human right abuse, to your own poor people inside the country.
Why don’t in the Cambodia have Civil Law is the part of country set of laws which is concerned with private affairs of citizen, for example property ownership, rather than with crime in the country?