Wednesday, 05 June 2013
ស៊ូ វុទ្ធី
ភ្នំពេញ ប៉ុស្តិ៍
មណ្ឌលគិរីៈ ដោយភាពទាក់ទាញនៃសម្រស់ព្រៃភ្នំនិងតំបន់រមណីយដ្ឋានកម្សាន្តបែបធម្មជាតិនៃសម្រស់ទឹកដីខេត្តមណ្ឌលគិរីនោះបានជំរុញឲ្យក្រុមគ្រួសារអ្នកនិយមដំណើរទេសចរណ៍តាមបណ្តាខេត្តនានាមួយគ្រួសារបានសម្រេចបោះទុនរាប់ម៉ឺនដុល្លារភ្លាមៗ បង្កើតជារមណីយដ្ឋានធម្មជាតិនិងសណ្ឋាគារមួយកន្លែងយ៉ាងល្អប្រណីតផុសឡើងនៅលើទឹកដីកំពូលភ្នំពណ៌បៃតងនៃខេត្តមណ្ឌលគិរីដែលមានឈ្មោះថា សណ្ឋាគារនិងរមណីយដ្ឋាន ម៉ាយូរ៉ា ហៀល ។
ថ្លែងនៅក្នុងពិធីបើកសម្ពោធ កាលពីថ្ងៃទី១ខែមិថុនា ជាថ្ងៃទិវាកុមារអន្តរជាតិកន្លងមកនេះលោក ហូ សិទ្ធីគុណ នាយកសណ្ឋាគារ និងរមណីយដ្ឋាននេះបានឲ្យដឹងថា៖«ម៉ាយូរ៉ា ហៀលនេះ បើនិយាយទៅវាកើតឡើងដោយភាពចៃដន្យទេ គឺកើតឡើងដោយសារសម្រស់ និងមន្តស្នេហ៍ធម្មជាតិរបស់ខេត្តមណ្ឌលគិរីនេះតែម្តង»។ លោកបានរំឭកប្រវត្តិថា៖«កាលពីអំឡុងមុនឆ្នាំ២០០០ខ្ញុំនិងក្រុមគ្រួសារបានធ្វើដំណើរមកកម្សាន្ត នៅខេត្តមណ្ឌលគិរីនេះ ហើយទទួលបានអារម្មណ៍ថា ទឹកដីនេះមានទេសភាពដ៏សែនមនោរម្យ និងមានខ្យល់អាកាសបរិសុទ្ធល្អគ្មានខេត្តណាប្រៀបបាននោះទេ និងរួមទាំងមានរមណីយដ្ឋានបែបធម្មជាតិជាទីទាក់ទាញភ្ញៀវទេសចរមកកម្សាន្តជាច្រើនផងនោះក៏កើតចិត្តដាក់ទុនបង្កើតជារមណីយដ្ឋាននិងសណ្ឋាគារ នេះឡើងទៅ»។
លោក ហូ សិទ្ធីគុណបានបញ្ជាក់ថា៖«សណ្ឋាគារនិងរមណីយដ្ឋានម៉ាយូរ៉ា ចាប់ផ្តើមផុសរូបរាងនៅលើទឹកដីខេត្តមណ្ឌលគិរី ដែលមានទីតាំងនៅក្នុងភូមិដើមស្រល់ ក្រុងសែនមនោរម្យកាលពីឆ្នាំ២០១០»។
ជាមួយការលើកឡើងនេះ លោកហូ សិទ្ធីគុណ ក៏បានឲ្យដឹងដែរថា សណ្ឋាគារ និងរមណីយដ្ឋាន ម៉ាយូរ៉ា ហៀល មានចំនួន ១៤ បឹងកាឡូ ដាច់ពីគ្នា ដោយបន្ទប់នីមួយៗរចនាឲ្យមានភាពស្រស់ប្រណីតខុសៗពីគ្នា ដែលបំពាក់ទៅដោយគ្រឿងបរិក្ខារទំនើបៗ និងប្រកបទៅដោយផាសុកភាពខ្ពស់។ លោកបានបន្តថា នៅក្នុងរមណីយដ្ឋានម៉ាយូរ៉ា ហៀល នេះត្រូវបានបែងចែកជា៣ប្រភេទ ដែលមានជម្រើសគ្រែ១ និងគ្រែ២ ។ ប្រភេទទី១ superior villa មានចំនួន១០ បឹងកាឡូ។ ប្រភេទទី២ Family villa មានចំនួន៣ បឹងកាឡូ ដែលមានពីរបន្ទប់គេង និងបន្ទប់ទទួលភ្ញៀវធំសម្រាប់គ្រួសារ។ចំណែកឯប្រភេទទី៣ Deluxe villa មានចំនួន៣បឹងកាឡូ ដែលបានរចនាម៉ូដយ៉ាងប្រណីតខុសពីបឹងកាឡូផ្សេងៗ»។
បន្ថែមលើសនេះទៀតលោក ហូ សិទ្ធីគុណ ក៏បានឲ្យដឹងទៀតថា៖«សណ្ឋាគារនិងរមណីយដ្ឋាន ម៉ាយូរ៉ា ក៏មានបម្រើនូវ សេវាកម្មជាច្រើនទៀតជូនដល់អតិថិជន មានដូចជាភោជនីយដ្ឋាន អាហារបែបខ្មែរ និងអឺរ៉ុបកន្លែងកម្សាន្តសម្រាប់កុមារ អាងហែលទឹកតារាងបាល់ទះតារាងបាល់ទាត់ ការរៀបចំដំណើរកម្សាន្តជូនដល់ភ្ញៀវ រួមទាំងបម្រើនូវសេវាកម្មផ្សេងទៀតផងដែរ»។
លោកបានបញ្ជាក់ទៀតថា៖«នៅពេលឆាប់ៗខាងមុខនេះសណ្ឋាគារ និងរមណីយដ្ឋានម៉ាយូរ៉ាហៀល យើងខ្ញុំនឹងដាក់បម្រើបងប្អូនអតិថិជននូវកន្លែងជិះសេះនិងកន្លែងហាត់ប្រាណ ដែលមានបំពាក់នូវឧបករណ៍សម្រាប់ហាត់ប្រាណដ៏ទំនើបជាច្រើន»។
យ៉ាងណាក៏ដោយការបង្កើតឲ្យមានសណ្ឋាគារនិងរមណីយដ្ឋាន ម៉ាយូរ៉ា នៅលើទឹកដីដែលប្រកបដោយសក្តានុពលទេសចរណ៍ទាក់ទាញយ៉ាងសម្បូរបែបនៅលើទឹកដីខេត្តមណ្ឌលគិរីនេះ ត្រូវបាននាយកសណ្ឋាគារដែលទើបប្រសូតរូបនេះអះអាងថាការបង្កើតរមណីយដ្ឋានធម្មជាតិនេះ មិនមែនសំដៅតែលើផលចំណេញនៃមុខជំនួញតែមួយមុខនោះឡើយ។ លោកហូ សិទ្ធីគុណ បានបញ្ជាក់ថា៖«ទាំងនេះក៏ជាការរួមចំណែកអភិវឌ្ឍនៅខេត្តមណ្ឌលគិរីនេះផងដែរ ហើយក៏ជាការសម្រួលនូវរាល់សេវាផ្សេងៗដល់ភ្ញៀវជាតិនិងអន្តរជាតិដែលបានមកកម្សាន្តនៅទីនេះ»៕