Monday, 10 June 2013
ស៊ូ វុទ្ធី
ភ្នំពេញ ប៉ុស្តិ៍
ភ្នំពេញៈ ទើបតែពន្លត់ពាក្យចចាមអារ៉ាមរឿងភ្ជាប់ពាក្យស្ងាត់ៗជាមួយអតីតតារាសម្តែងលោក កែវ កុសល មិនទាន់បានស្ងប់រលត់ស្រួលបួលផង ក៏ស្រាប់តែផ្ទុះឡើងសាជាថ្មីថា ពេលនេះ កញ្ញា នីមុន្នីនាថ កំពុងត្រៀមចិត្ត ត្រៀមកាយលាភាពក្រមុំចូលរោងការប្រណាំងមិត្តចិត្តមួយថ្លើមមួយនៅចុងឆ្នាំ២០១៣នេះដែរ។ ប៉ុន្តែយ៉ាងណា ជុំវិញរឿងរ៉ាវផ្ទុះឡើងផ្ទួនៗនោះ ត្រូវនាងនីមុន្នីនាថ ចេញមកអះអាងថា ថ្ងៃកំណត់ទទួលផ្កាស្លា លាភាពនៅក្រមុំរបស់នាងនៅមិនទាន់ខិតជិតទេ លុះណាតែនាងបង់រំលស់ប្រាក់ធនាគាររួច ទើបនាងគិតរឿងនេះ។
ទន្ទឹមនឹងការប្រកាសជំហរបែបនេះ ទាំងអារម្មណ៍បែបមួហ្មងមិនសប្បាយចិត្តនឹងពាក្យចចាមអារ៉ាម ដែលតែងតែបោកខ្ទប់មកលើកិត្តិយសខ្លួនជាស្រ្តីក្រមុំនោះ នី មុនី្ននាថនិយាយយ៉ាងច្បាស់លាស់ថា៖«រឿងយកប្តីសី សម្រាប់ខ្ញុំក៏ដូចជាស្រ្តីឯទៀតដែរ គ្មាននរណាម្នាក់អាចប្រកែកនឹងច្បាប់ធម្មជាតិនេះទេ ឲ្យតែធំពេញវ័យនិងមានសមត្ថភាពគ្រប់គ្រាន់ត្រូវតែមានគូនិងរៀបការមានប្តីសីហើយ»។ ប៉ុន្តែនាង បានលើកឡើងថា៖«ដ្បិតថា ច្បាប់ធម្មជាតិ មិនអាចប្រកែកបាន តែពេលវេលាយើងអាចប្រកែកបានតើ? ហើយខ្ញុំនេះក៏មិនមែនថាកន្លងមកមិនមានអ្នកស្រឡាញ់និងចង់ស្តីដណ្តឹងរៀបការនោះទេគឺមានតែខ្ញុំតែប្រាប់គេថា ពេលវេលានេះមិនទាន់ស័ក្តិសមសម្រាប់ខ្ញុំក្នុងការទទួលប្តីសីទេ»។
បន្ថែមលើហេតុផលនេះ តារាសម្តែងដែលគ្រងតំណែងតួឯកបន្តបន្ទាប់នាងនី មុន្នីនាថ បាននិយាយទៀតថា៖«ខ្ញុំគ្មានហេតុផលណា ចង់ប្រណាំងប្រជែងមិត្តភក្តិណាម្នាក់ទេ មិនថាតែការប្រជែងគ្នាយកប្តីនោះ សូម្បីតែការសម្តែងក៏ដូចគ្នាភាពលេចធ្លោ និងការគាំទ្រទៅកើតលុះណាតែយើងមានសមត្ថភាពដែរ»។
យ៉ាងណាមិញ ខណៈដែលថ្ងៃកំណត់ចូលរោងការរបស់ នាង សក្ខណា កាន់តែខិតជិតដល់នោះក៏ស្រាប់តែដំណឹងថ្មីរបស់នាងនី មុន្នីនាថផ្ទុះឡើងដែរ ដែលថា នាថ ក៏ត្រៀមខ្លួនចូលរោងការចុងឆ្នាំនេះ ដូចសក្ខណា ដែរ។ ឆ្លើយតបនឹងរឿងដ៏គួរឲ្យភ្ញាក់ផ្អើលនេះ នី មុន្នីនាថ បានបញ្ជាក់ថា៖«ខ្ញុំគ្មានដែលបានភ្ជាប់ពាក្យជាមួយបុរសណា ហើយក៏គ្មានគម្រោងចូលរោងការចុងឆ្នាំនេះ ប្រណាំងសក្ខណាដែរ ។ ខ្ញុំគ្មានទេ បើមានរឿងនេះមែននោះខ្ញុំមិនលាក់បាំងទេ តែនេះវាមិនមាន»។ នាងបានបន្ថែមថា៖«ពេលនេះអំរែកបំណុលខ្ញុំមិនទាន់សងធនាគាររួចទេ បើខ្ញុំគិតរឿងគូស្រករនេះ លុះណាតែខ្ញុំសងបំណុលធនាគាររួចនោះប្រហែលជាអាចដល់ពេលនោះ»។
ដូចគ្នានោះ អ្នកស្រីសុភាលី ដែលជាម្តាយ នីមុនី្ននាថ ក៏បានថ្លែងទាំងហួសចិត្តផងដែរ ដោយអ្នកស្រីលើកឡើងថា៖«ខ្ញុំឆ្ងល់ណាស់ថា កូនខ្ញុំធ្លាប់ទៅភ្ជាប់ពាក្យនិងត្រៀមរៀបការចុងឆ្នាំនេះដូចសក្ខណាពីអង្កាល់ អ្នកណាក៏ពូកែដឹងរឿងនេះជាងខ្ញុំទៀត»។ អ្នកស្រីបន្តថា «រឿងប្តីសី អនាគតកូនខ្ញុំមិនដែលបង្ខំកូនទេ រឿងនេះកូនជាអ្នកសម្រេចខ្ញុំម្តាយឪពុកជំហានទី២ តែកូនស្រីខ្ញុំ នាថ មិនដែលរំឭកពីរឿងនេះទេ មានតែនិយាយថា ខ្ញុំមិនទាន់គិតទេ ចាំឲ្យជីវភាពធូរធារជាងនេះសិនទើបបានគិត»៕