Tuesday, 18 June 2013
សេត គឹមសឿន
ភ្នំពេញ ប៉ុស្តិ៍
ភ្នំពេញ : ទើបតែមកពីសម្តែងច្រៀងនៅលើទឹកដីអាមេរិករយៈពេល៣ខែហើយបានកុម៉្មង់រថយន្តស៊េរីទំនើបមួយគ្រឿងមកជាមួយផងមិនទាន់នឹងបានប៉ុន្មាននោះ នៅពេលនេះ តារាចម្រៀងដែលគ្រងតំណែងកំពូលជាង១០ឆ្នាំលោក ព្រាប សុវត្ថិ នឹងត្រូវបោះពួយចេញទៅច្រៀងនៅលើទឹកដីប្រទេសអូស្ត្រាលីជាលើកទី៥ នៅក្នុងខែកក្កដាខាងមុខនេះ។
ពិតជាខ្ញីចាស់កាន់តែហឹរមែន អស់រយៈពេលជិត១៥ឆ្នាំមកហើយ ដែលតារាចម្រៀង ព្រាប សុវត្ថិ ឈរនៅតំណែងកំពូលគ្មានអ្នកណាខ្លាំងជាងលោកនោះ។ តាមរយៈភាពខ្លាំងរបស់តារារូបនេះ គេបានដឹងថា លោក ព្រាប សុវត្ថិ អាចរកប្រាក់បានយ៉ាងច្រើនក្រាស់ក្រែល ខណៈនៅក្នុងរដូវក្តៅលោករវល់ស្ទើរគ្មានពេលទំនេរ ហើយឈានចូលរដូវធ្លាក់ភ្លៀងលោកចេញទៅច្រៀងនៅបរទេសនោះ។
តម្លៃខ្លួនរបស់លោកព្រាប សុវត្តិ បើយោងតាមអ្នករៀបចំកម្មវិធីបានឲ្យដឹងថា ពេលច្រៀងមួយកម្មវិធីលោក ព្រាប សុវត្ថិ មានតម្លៃខ្លួនចន្លោះពី៣០០០ទៅ៤០០០ដុល្លារពោលគឺមានការប្រែប្រួលទៅតាមទីតាំងជិតឆ្ងាយ ខេត្ត ឬក៏ក្រុង។ អ្នករៀបកម្មវិធីមួយចំនួនបានបង្ហើបឲ្យដឹងថា ពេលលោកព្រាប សុវត្តិច្រៀងនៅភ្នំពេញតម្លៃខ្លួនគឺ៣០០០ដុល្លារ ឬក៏ច្រើនជាងនេះ។ រីឯតម្លៃខ្លួនរបស់លោកទៅច្រៀងនៅតាមបណ្តាខេត្តវិញ គឺចន្លោះពី៣៥០០ទៅ៤០០០ដុល្លារដែលតម្លៃខ្លួននេះមានការកើនឡើងខ្ពស់។
ដោយឡែកការចេញច្រៀងនៅក្រៅប្រទេស លោកមានតម្លៃខ្លួនរាប់ម៉ឺនដុល្លារក្នុងមួយខែៗ។
ទោះជាមានការបង្ហើបពីសំណាក់អ្នករៀបចំកម្មវិធីប្រគំតន្ត្រីយ៉ាងនេះក្ដី ក៏ តារាចម្រៀងចាស់វស្សាដែលនៅតែមានឥទ្ធិពលលើស្រទាប់យុវវ័យទាំងវិស័យចម្រៀង និងម៉ូដសម្លៀកបំពាក់នោះតែងបដិសេធរបៀបដាក់ខ្លួន ដោយសុំមិនបញ្ជាក់ពីចំណូលប្រចាំខែនិងតម្លៃខ្លួនក្នុងនាមជាតារាលំដាប់កំពូលនោះឡើយ។
កន្លងមក លោកធ្លាប់និយាយថា៖«រឿងតម្លៃខ្លួន ឬចំណូលនេះ ខ្ញុំសុំមិននិយាយ ហើយខ្ញុំមិនអាចនិយាយថា តម្លៃខ្លួនខ្ញុំច្រៀងខ្ពស់ជាងអ្នកសិល្បៈដទៃឬយ៉ាងណានោះដែរ ព្រោះម្នាក់ៗសុទ្ធមានតម្លៃខ្លួនរៀងៗខ្លួន»។
ទាក់ទិននឹងតម្លៃខ្លួននេះ លោកព្រាប សុវត្ថិ ដែលកំពុងមមាញឹកពង្រីកហាងកាត់ដេរ និងកាត់សក់នោះ ហាក់មានភាពស្ទាក់ស្ទើរក្នុងការប្រាប់ពិស្តារដោយលោកបានលើកហេតុផលថា៖«បាទ សុំទោស រឿងនេះខ្ញុំមិនអាចប្រាប់ដោយបើកចំហបានទេ ខ្ញុំសុំទុករឿងនេះជារឿងសម្ងាត់»។
សម្រាប់ការឈានចូលរដូវធ្លាក់ភ្លៀង ស្ទើរគ្រប់ក្រុមហ៊ុនទាំងអស់បានបិទការចេញធ្វើកម្មវិធីតាមបណ្ដាខេត្តពិសេសនោះគឺការប្រគំតន្ត្រី ដែលរដូវនេះភាគច្រើនសិល្បករសិល្បការិនីរកច្រកចេញទៅក្រៅប្រទេស។
ដូច្នេះនៅក្នុងរដូវវស្សានេះ លោកព្រាប សុវត្ថិ នឹងត្រូវឡើងយន្តហោះទៅកាន់ដែនដីប្រទេសអូស្ត្រាលីជាលើកទី៥។
តារាចម្រៀងមានប្រពន្ធ និងកូនពីរនាក់ទៅហើយ តែនៅតែមានការគាំទ្រខ្លាំងពីគ្រប់មជ្ឈដ្ឋានលោក ព្រាប សុវត្ថិបានអះអាងថា៖«មួយរដូវក្តៅនេះ ខ្ញុំរវល់ច្រើន តែនៅពេលនេះចាប់ផ្តើមស្បើយវិញនៅពេលធ្លាក់ភ្លៀង។ ដូច្នេះនៅខែកក្កដា ២០១៣ខាងមុខនេះ ខ្ញុំត្រូវចេញទៅច្រៀងនៅប្រទេសអូស្ត្រាលី ជាលើកទី៥ រយៈពេល១ខែ»។
ជាតារាចម្រៀងរក្សាភាពល្បីបានយូររូបនេះបានចេញទៅច្រៀងនៅក្រៅប្រទេសជាញឹកញាប់ ដោយឡែកសម្រាប់ប្រទេសអូស្ត្រាលីវិញលោកថា៖«ខ្ញុំធ្លាប់បានទៅប្រទេសនេះនៅឆ្នាំ២០០២ , ២០០៤ ២០០៦ , ២០០៨ , ២០១១ ២០១២ និង២០១៣នេះ ហើយលើកនេះ ខ្ញុំក៏យកក្រុមភ្លេងផ្ទាល់ខ្លួនទៅទៀតដែរ»។
លោកបានបញ្ជាក់បន្ថែមថា៖«ការទៅអូស្ត្រាលី លើកនេះ ក៏មិនខុសពីលើកមុនដែរ គឺថវិកាមួយចំនួនដែលខ្ញុំសម្តែងបាន ខ្ញុំនឹងបង្វិលទៅជួយខាងកុមារកំព្រា និងទុរគតជន ហើយខ្ញុំពេញចិត្តនឹងធ្វើកិច្ចការជួយសង្គមបានខ្លះៗនេះ»៕