ថ្ងៃ សៅរ៍ 20 កក្កដា 2013
ដោយ ញឹម សុផល
RFI
ជនមិនស្គាល់មុខបានបាញ់ប្រហារ ចូលទីស្នាក់ការកណ្តាលរបស់គណបក្សសង្គ្រោះជាតិ ស្ថិតនៅក្នុងខ័ណ្ឌទួលគោក ក្នុងរាជធានីភ្នំពេញ កាលពីវេលាម៉ោង ៣ និង ៣០ នាទី ទៀបភ្លឺ ថ្ងៃទី២០ ខែកក្កដា ឆ្នាំ២០១៣។ សមត្ថកិច្ចនគរបាលបានចុះទៅស៊ើបអង្កេតនៅកន្លែងកើតហេតុផ្ទាល់នៅព្រឹកថ្ងៃសៅរ៍នេះ។ គ្រាប់កាំភ្លើងបានទម្លុះទ្វារកញ្ចក់ និងសម្ភារៈមួយចំនួន ក្នុងទីស្នាក់ការគណបក្សសង្គ្រោះជាតិ ប៉ុន្តែមិនបង្កឲ្យមនុស្សរងគ្រោះថ្នាក់នោះទេ។
ទ្វារកញ្ចក់គណបក្សសង្គ្រោះជាតិដែលរងការបាញ់ប្រហារ (រូបថតគណបក្សសង្គ្រោះជាតិ)
រហូតមកទល់ម៉ោង ១២ថ្ងៃត្រង់នេះ នៅមិនទាន់មានការបញ្ជាក់អះអាងណាមួយពីសមត្ថកិច្ច ទាក់ទងទៅនឹងលទ្ធផលស៊ើបអង្កេតនៃការបាញ់នៅទីស្នាក់ការកណ្តាលរបស់គណបក្សសង្គ្រោះជាតិ កាលពីទៀបភ្លឺថ្ងៃសៅរ៍នេះ។
ក្រៅពីថ្លែងប្រាប់អ្នកសារព័ត៌មានកាលពីព្រឹកថ្ងៃទី ២០កក្កដានេះ លោក ជួន ណារិន ស្នងការរងនគរបាលរាជធានីភ្នំពេញ បញ្ជាក់ថា សមត្ថកិច្ចកំពុងបន្តស៊ើបអង្កេត ហើយនឹងធ្វើតាមជំនាញនឹងតាមនីតិវិធី។ លោក ញ៉ែម បញ្ញារិទ្ធិ, អ្នកនាំពាក្យគណបក្សសង្គ្រោះជាតិ បានប្រាប់ឲ្យដឹងថាគណបក្សរបស់លោក ដែលកំពុងសហការជាមួយនឹងអាជ្ញាធរប៉ូលីស កំពុងតែរង់ចាំលទ្ធផលនៃការអង្កេតនេះ។
ដោយបង្ហាញពីការខូចខាតទ្រព្យសម្បត្តិមួយចំនួន ធ្លុះធា្លយទ្វារកញ្ចក់ជាភស្តុតាង លោក យ៉ែមបុញ្ញរិទ្ធិ ឲ្យដឹងថា នេះគឺជាហេតុការបាញ់គំរាមលើកទី ២ ហើយដែល បានកើតឡើងមកលើគណបក្សសង្គ្រោះជាតិ ដោយកាលពីលើកមុនបានកើតឡើងកាលពីដើមខែនេះនៅក្នុងការប៉ះទង្គិចគ្នាមួយអំឡុងពេលនៃការដង្ហែក្បួនឃោសនានៅផ្សារដើមថ្កូវ។ទោះជាយ៉ាងនេះក្តីអ្នកនាំពាក្យរូបនេះបញ្ជាក់ថា ហេតុការណ៍នេះនឹងមិនធ្វើឲ្យអាក់ដំណើរការឃោសនារបស់ប្រធាននិងអនុប្រធានគណបក្សសង្គ្រោះជាតិ នៅថ្ងៃនេះនៅខេត្តកំពង់ស្ពឺនិងខេត្តតាកែវ។
ជាមួយគ្នានេះ អគ្គលេខាធិការគណកម្មាធិការជាតិរៀបចំការបោះឆ្នោត គ.ជ.ប លោក
ទេព នីថា បានប្រាប់វិទ្យុបារាំង RFI ថាអ្នកជំនាញរបស់លោក កំពុងពិនិត្យវាស់វែង មើលដំណើរនៃការបាញ់ ថាបាញ់ពីខាងក្រៅ ឬក៏បាញ់ពីខាងក្នុង ហើយលោកដាក់សំណួរថា
ហេតុអ្វីបានជាសមត្ថកិច្ចនៅតំបន់នោះមិនបានដឹងអំពីការបាញ់នោះ ដោយហេតុថាសំឡេងផ្ទុះអាវុធបានកើតឡើងតាំងពីម៉ោង ៣និង៣០នាទីទៀបភ្លឺ។
មន្ត្រីស៊ើបអង្កេតជាន់ខ្ពស់នៃអង្គការការពារសិទ្ធិមនុស្ស លីកាដូ លោក អំ សំអាត, បានថ្លែងថានេះគឺជាការព្រួយបារម្ភមួយរបស់សង្គមស៊ីវិល ដោយសារហេតុការណ៍នេះបានធ្វើឡើងនៅរដូវកាលយុទ្ធនាការឃោសនាបោះឆ្នោត និងចំពេលដែលលោក សម រង្សី,ប្រធានគណបក្សសង្រ្គោះជាតិត្រលប់ចូលមកស្រុកខ្មែរ។
លោក អំ សំអាត ចាត់ទុកថាហតុការណ៍នេះគឺជាការគំរាមផ្នែកនយោបាយមួយ ហេតុដូច្នេះសមត្ថកិច្ចត្រូវតែប្រឹងប្រែងឲ្យអស់លទ្ធភាពស៊ើបអង្កេតឲ្យឃើញនិងប្រកាសលទ្ធផល ចៀសវាងរងការចោទប្រកាន់។
សូមបញ្ជាក់ថា បន្ទាប់ពីមានហេតុការណ៍នេះកើតឡើងគណបក្សសង្គ្រោះជាតិ បានចេញ
សេចក្តីថ្លែងការណ៍មួយជាបន្ទាន់ ដោយថ្កោលទោសយ៉ាងដាច់អហង្ការរាល់អំពើហិង្សា ក្នុងចេតនាបំភិតបំភ័យ ធ្វើឲ្យមានអស្ថិរភាព ចលាចល នៅក្នុងអំឡុងពេលយុទ្ធនាការឃោសនាបោះឆ្នោត៕
