Tuesday, 06 August 2013
ភ្នំពេញប៉ុស្តិ៍
ភ្នំពេញៈ ក្រុមអង្គការសង្គមស៊ីវិលបានចេញសេចក្តីថ្លែងការណ៍មួយសម្តែងការព្រួយបារម្ភយ៉ាងខ្លាំង ចំពោះបញ្ហាបំភិតបំភ័យ ការគំគួន ការគំរាមកំហែងក្នុងចំណោមប្រជាពលរដ្ឋមួយចំនួននិងបញ្ហាហិង្សាដោយពាក្យសម្ដីពីក្រុមគាំទ្រគណបក្សនយោបាយមួយទៅគណបក្សនយោបាយមួយផ្សេងទៀត ពិសេសការគំរាមកំហែងពីមន្ត្រីថ្នាក់មូលដ្ឋានដូចជាមេភូមិ មេឃុំ និងអាជ្ញាធរមួយចំនួនដែលមាននិន្នាការនយោបាយគាំទ្រគណបក្សកំពុងកាន់អំណាចទៅលើសកម្មជនគណបក្សប្រឆាំង បន្ទាប់ពីការបោះឆ្នោតជាតិ នីតិកាលទី៥ កាលពីថ្ងៃទី២៨ កក្កដា ឆ្នាំ២០១៣ត្រូវបានបញ្ចប់។
ក្នុងសេចក្តីថ្លែងការណ៍ស្តីពីបរិយាកាសក្រោយការបោះឆ្នោតជាតិនីតិកាលទី៥ឆ្នាំ២០១៣ នេះបានបញ្ជាក់ថា ក្រុមអង្គការសង្គមស៊ីវិលបានសង្កេតឃើញថា ប្រជាពលរដ្ឋនៅតំបន់មួយចំនួនកំពុងទទួលរងនូវការគំរាមកំហែងនិងការវាយប្រហារពាក្យសំដីពីសំណាក់អាជ្ញាធរមានសមត្ថកិច្ចដោយសារតែអាជ្ញាធរទាំងនោះបានចោទប្រកាន់ថា មិនបានបោះឆ្នោតជូនគណបក្សប្រជាជនកម្ពុជា។ ទង្វើបែបនេះគឺជាសកម្មភាពរំលោភច្បាប់និងរំលោភសិទ្ធិរបស់ពលរដ្ឋដែលស្ថាប័នពាក់ព័ន្ធត្រូវតែចាត់វិធានការជាបន្ទាន់ ក្នុងការទប់ស្កាត់ក៏ដូចជាការដាក់ពិន័យដល់ជនដែលបានប្រព្រឹត្តិ។
ក្រុមអង្គការសង្គមស៊ីវិលយល់ឃើញថា ដើម្បីលុបបំបាត់ការសង្ស័យ ការភ័យខ្លាច និងការគំរាមកំហែង និងដើម្បីបង្ហាញឲ្យឃើញនូវការគោរពដល់ឆន្ទៈរបស់ប្រជាពលរដ្ឋដែលជាម្ចាស់ឆ្នោត និងដើម្បីលើកតំកល់ផលប្រយោជន៍ជាតិជាធំ សូមឲ្យគណបក្សដែលបានជាប់ឆ្នោតទាំងពីរចេញប្រកាសសេចក្តីណែនាំជាសាធារណៈទៅដល់អ្នកគាំទ្ររបស់ខ្លួន ក៏ដូចជាអាជ្ញាធរសាធារណៈ កុំឲ្យប្រព្រឹត្តិអំពើដែលបង្ករនូវភាពភ័យខ្លាច ភាពរំជើបរំជួលក្នុងសង្គម និងបង្កើតឧបសគ្គផ្សេងៗ ដែលអាចបណ្តាលឲ្យប៉ះពាល់ដល់ការសាមគ្គី និងភាពសុខដុម នៃសង្គមទាំងមូលក្នុងខណៈពេលដែលប្រទេសកម្ពុជាកំពុងរៀបចំរាជរដ្ឋាភិបាលថ្មី។
ក្រុមអង្គការសង្គមស៊ីវិលសូមសំណូមពរដល់ក្រសួងមហាផ្ទៃ និងអាជ្ញាធរគ្រប់លំដាប់ថ្នាក់ ដាក់ចេញនូវវិធានការដើម្បីបញ្ឈប់ជាបន្ទាន់នូវការគំរាមកំហែងតាមគ្រប់រូបភាពការគំគួន និងការរើសអើងគ្នាទៅវិញទៅមក ដោយសារនិន្នាការនយោបាយ និងសូមឲ្យអាជ្ញាធរចាត់វិធានការទៅលើជនណាដែលប្រើរូបភាពជាអាជ្ញាធររដ្ឋក្នុងការគំរាមកំហែងប្រជាពលរដ្ឋ។ ក្រុមអង្គការសង្គមស៊ីវិលក៏សូមអំពាវនាវផងដែរដល់ប្រជាពលរដ្ឋទាំងអស់ សូមកុំឲ្យមានការរើសអើងនិន្នាការគណបក្សនយោបាយ កុំឲ្យគំគួនគ្នា ដោយប្រកាន់នូវគុណធម៌ និងការយោគយល់អធ្យាស្រ័យគ្នាទៅវិញទៅមកក្នុងនាមជាប្រជាពលរដ្ឋខ្មែរ ដែលមានចរិកថ្លៃថ្នូរ ស្រឡាញ់ជាតិ និងសន្តិភាព។