Monday, 12 August 2013
សេត គឹមសឿន
ភ្នំពេញ ប៉ុស្តិ៍
ខណៈប្រជាប្រិយភាពកម្រើកឡើងមួយប្រាវ និងចាប់បានឱកាសបណ្តើរគ្នាជាមួយពិធីករពោះម៉ាយក្តៅៗសំដីប៉ប៉ិចប៉ប៉ោច លោក អ៊ឹង រដ្ឋាហៅ ទុយ ចេញទៅកើបប្រាក់នៅឯសហរដ្ឋអាមេរិកទាំងមន្ទិលស្នេហ៍ដ៏ក្តៅគគុកជាមួយគ្នាផងនោះ។ ប៉ុន្តែពេលនេះទីផ្សារសិល្បៈរបស់អតីតតារាចម្រៀងដែលធ្លាប់មានសន្ទុះកេរ្តិ៍ឈ្មោះ និងទីផ្សារខ្ពស់គួរសម កាលពីនៅក្នុងផលិតកម្ម M កញ្ញា ស៊ឹម ថៃណា កម្រើកគួរឲ្យចាប់អារម្មណ៍ឡើយ ក្រៅពីដំណឹងថា នៅផ្ទះដេកស៊ីនោះ។
នាង ស៊ឹម ថៃណា បានទទួលស្គាល់ថា មួយរយៈកន្លងមកនេះ នាងពិតជាទំនេរពីការងារសិល្បៈ មិនដែលបានចេញថតចម្រៀង ឬក៏សម្តែងឈុតអ្វីនោះទេ ប៉ុន្តែនាងបែរជាបដិសែធ មិនពន្យល់ពីភាពអវិជ្ជមាន ពីការធ្លាក់ចុះ ចំពោះការងារសិល្បៈរបស់នាងនោះឡើយ ដោយនាងលើកហេតុផលថា នាងមិនមានអ្វីថ្មី និងមិនមានអ្វីដែលត្រូវសារព័ត៌មានសម្ភាសន៍យកទៅចេញផ្សាយដែរ ព្រោះវាជារឿងដដែលៗ។
បន្ថែមលើពាក្យសំដីចុងមាត់ចុងក បែបការវាយឫកនោះ អតីតតារាចម្រៀងដែលផ្តើមស្រអាប់ពន្លឺបន្ទាប់ពីចុះចេញពីទ្រនំ M រូបនេះ ក៏បានបញ្ជាក់ទៀតថា កន្លងមកមានទស្សនាវដ្តីច្រើនណាស់ តែងយករឿងនាងទៅចុះផ្សាយ ដោយមិនដែលបានធ្វើបទសម្ភាសជាមួយនាងឡើយ ដែលការចេញផ្សាយរបស់ពួកគេនោះមិនមែនជាការពិតផង តែចេះតែយកទៅចុះផ្សាយ។