មជ្ឈមណ្ឌលសិទ្ធិមនុស្សកម្ពុជា (CCHR) បានសំដែងនូវការព្រួយបារម្ភ បន្ទាប់ពីមានសេចក្ដីរាយការណ៍ថា មានការគំរាមកំហែងប្រជាពលរដ្ឋដែលមានវិវាទជាមួយក្រុមហ៊ុនក្នុងខេត្តមួយចំនួនក្នុងប្រទេសកម្ពុជា ក្រោយការបោះឆ្នោតជាតិ។
ដោយ យ៉ាវ សុខហ៊ីម
2013-08-14
RFA
ស្ដាប់ ឬ ទាញយកសំឡេង
មជ្ឈមណ្ឌលសិទ្ធិមនុស្សកម្ពុជានៅថ្ងៃទី១៤ សីហា បានចេញសេចក្ដីថ្លែងការណ៍បញ្ជាក់ជុំវិញសញ្ញានៃការបណ្ដេញចេញដោយបង្ខំដែលបានកើតឡើងជាថ្មីភ្លាមៗ បន្ទាប់ពីការបោះឆ្នោតជាតិ និងដំណោះស្រាយវិវាទដីធ្លីដែលបានសន្យាដោយគណបក្សនានា ក្នុងអំឡុងយុទ្ធនាការឃោសនាមុនការបោះឆ្នោតនៅពេលដែលរដ្ឋាភិបាលថ្មីត្រូវបានបង្កើតឡើង។
នៅក្នុងសេចក្ដីថ្លែងការណ៍របស់មជ្ឈមណ្ឌលសិទ្ធិមនុស្សកម្ពុជា បានបញ្ជាក់ថា មិនលើសពី ៥ថ្ងៃផងបន្ទាប់ពីការបោះឆ្នោតជាតិ មានរបាយការណ៍មួយចំនួនពីខេត្តបន្ទាយមានជ័យ ទាក់ទងនឹងការបំផ្លិចបំផ្លាញទ្រព្យសម្បត្តិ និងដំណាំរបស់កសិករម្នាក់ដែលដីរបស់គាត់កាន់កាប់ ពាក់ព័ន្ធនឹងកន្លែងធ្វើមូលដ្ឋានយោធា។
របាយការណ៍ពីខេត្តកោះកុង ពាក់ព័ន្ធនឹងអាជ្ញាធរមូលដ្ឋានមានគម្រោងបណ្ដេញអ្នកភូមិមួយចំនួនដោយបង្ខំពីផ្ទះរបស់ពួកគាត់។ ក្នុងលិខិតជូនដំណឹងរបស់អាជ្ញាធរដល់អ្នកភូមិបញ្ជាក់ថា អ្នកភូមិដែលពាក់ព័ន្ធទាំងនោះ នឹងត្រូវប្រឈមមុខនឹងការឈូសឆាយពីសំណាក់ក្រុមហ៊ុន បើសិនពួកគេខកខានមិនបានរុះរើផ្ទះសម្បែង និងទ្រព្យសម្បត្តិឲ្យទាន់នៅថ្ងៃទី២០ សីហា ឆ្នាំ២០១៣។
របាយការណ៍ពីខេត្តព្រះវិហារ ពាក់ព័ន្ធនឹងប្រជាពលរដ្ឋ ៤០គ្រួសារដែលបានរងការប្រមាថថានឹងបណ្ដេញពួកគាត់ចេញពីភូមិ និងដកកម្មសិទ្ធិពីពួកគាត់មកវិញ ជាទណ្ឌកម្មដែលពួកគាត់បានបោះឆ្នោតឲ្យគណបក្សប្រឆាំង និងរបាយការណ៍ពីរាជធានីភ្នំពេញ ជុំវិញក្រុមសន្តិសុខរបស់ក្រុមហ៊ុន ឃុន សៀ អ៊ីមផត អិចផត បានវាយកម្ទេចសម្ភារៈរបស់ស្រីអ្នកលក់បាយម្នាក់ ដោយសារតែបានបដិសេធទទួលយកសំណង ១៥.០០០ដុល្លារពីក្រុមហ៊ុនដើម្បីគ្រួសាររបស់គាត់ចាកចេញពីផ្ទះនិងដី។
មន្ត្រីសម្របសម្រួលកម្មវិធីកំណែទម្រង់ដីធ្លីនៃមជ្ឈមណ្ឌលសិទ្ធិមនុស្សកម្ពុជា លោក វណ្ណ សុផាត មានប្រសាសន៍ថា គណៈកម្មការដោះស្រាយវិវាទដីធ្លីដែលរដ្ឋាភិបាលបានបង្កើតឡើងមិនសូវមានប្រសិទ្ធភាពក្នុងការដោះស្រាយបញ្ហាវិវាទដីធ្លីនៅឡើយទេ ដោយសារតែពួកគេរុញបន្ទុកដោះស្រាយបញ្ហាឲ្យគ្នាទៅវិញទៅមក។
លោក វណ្ណ សុផាត៖ «បើសិនជាមានពាក្យបណ្ដឹងពីប្រជាពលរដ្ឋរវាងក្រុមហ៊ុន ឫអ្នកមានអំណាច រដ្ឋអីហ្នឹង ពេលណាដែលដាក់ទៅគណៈកម្មការសុរិយោដី ត្រឹមឃុំ ត្រឹមស្រុកហ្នឹង ភាគច្រើនគាត់និយាយថា ហួសពីសមត្ថភាពរបស់គាត់ ហើយគាត់បញ្ជូនមកថ្នាក់ខេត្ត។ ថ្នាក់ខេត្តក៏អ៊ីចឹងដែរ នៅពេលដែលមានការតវ៉ា ឫមួយមានការសួរនាំអីអ៊ីចឹងទៅគាត់ថា ហួសសមត្ថភាពរបស់គាត់ ក៏រុញមកថ្នាក់ជាតិ។ ដល់តែរុញមកថ្នាក់ជាតិ ប្រជាពលរដ្ឋគាត់តាមមកដល់ថ្នាក់ជាតិទៀត។ ដល់អ៊ីចឹងទៅ ថា គេហ្នឹងធ្វើលិខិតបញ្ជូនទៅថ្នាក់ខេត្តវិញហើយ។ បើតាមខ្ញុំសង្កេតឃើញមកភាគច្រើន គឺការរុញដាក់គ្នាទៅវិញទៅមក»។
វិទ្យុអាស៊ីសេរី មិនអាចទំនាក់ទំនងសុំការអធិប្បាយពីមន្ត្រីគណៈកម្មការដោះស្រាយវិវាទដីធ្លីថ្នាក់ជាតិបានទេ នៅរសៀលថ្ងៃទី១៤ ខែសីហា នេះ។
សេចក្ដីថ្លែងការណ៍របស់មជ្ឈមណ្ឌលសិទ្ធិមនុស្សកម្ពុជា ក៏បានអំពាវដល់រដ្ឋាភិបាលបច្ចុប្បន្នចាត់វិធានការទប់ស្កាត់ការរំលោភទាំងអស់នោះទៅលើសិទ្ធិរបស់ពលរដ្ឋ និងត្រូវយកចិត្តដាក់នឹងការរក្សាសន្តិភាព ព្រមទាំងគោរពការសន្យាទាំងឡាយនៅមុនការបោះឆ្នោត ថានឹងធ្វើឲ្យមានភាពប្រសើរឡើងនូវស្ថានភាពសិទ្ធិមានដីធ្លីនៅក្នុងប្រទេសកម្ពុជា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទដែលទាក់ទង
- មន្ត្រីនៅពោធិ៍សាត់រងការចោទថាគំរាមពលរដ្ឋមិនឲ្យធ្វើកសិកម្មលើដីធ្លាប់កាន់កាប់
- អ្នកមានបញ្ហាដីធ្លីទាមទារតុលាការដោះស្រាយសំណុំរឿងអ្នកស្រី យ៉ោម បុប្ផា
- មន្ត្រីសិទ្ធិមនុស្សអំពាវនាវឲ្យអាជ្ញាធរស៊ើបអង្កេតករណីរំលោភសិទ្ធិនៅមណ្ឌលគិរី
- ឯកអគ្គរដ្ឋទូតសហរដ្ឋអាមេរិក៖ កម្ពុជាត្រូវពង្រឹងសេរីភាពសារព័ត៌មាន
- សង្គមស៊ីវិលរិះគន់តុលាការខេត្តសៀមរាបថាឃុំខ្លួនស្ត្រីម្នាក់ដោយពុំមានភស្តុតាង
- សារព័ត៌មានយុវវ័យថ្មីប្រកាសផ្សាយព័ត៌មានពិតឯករាជ្យ
- ការប្រើប្រាស់ប្រព័ន្ធសង្គមហ្វេសប៊ុកកំពុងពេញនិយមនៅកម្ពុជា
- មន្ត្រីអាវុធហត្ថខេត្តរតនគិរីម្នាក់រងការចោទថាប្រើហិង្សាលើស្ត្រីពីរនាក់
- លីកាដូ៖ មន្ត្រីរដ្ឋបាលមួយចំនួននៅកំពង់ឆ្នាំងអសកម្មក្នុងការងារក្រោយបោះឆ្នោត