ដោយ៖ លោក ឡាយ សាមាន និង ស៊ុន ណារិន
ថ្ងៃពុធ ទី21 ខែសីហា ឆ្នាំ2013
http://vodhotnews.com
អតីតតារាចម្រៀងខ្មែរ កញ្ញា ទូច ស៊ុននិច នៅតែព្រួយបារម្ភពីសុវត្ថិភាពផ្ទាល់ខ្លួន ក្រោយពីការបាញ់ប្រហារកាលពីឆ្នាំ២០០៣ បើទោះបីកញ្ញាកំពុងរស់នៅសហរដ្ឋអាមេរិក ទាំងខ្លួនមានជំងឺរ៉ាំរ៉ៃ។
កញ្ញា ទូច ស៊ុននិច អាយុ៣៣ឆ្នាំ ត្រូវបានបាញ់ប្រហារ ដោយគ្រាប់កាំភ្លើងចំនួន៣គ្រាប់ កាលពីថ្ងៃទី២១ ខែតុលា ឆ្នាំ២០០៣ ខណៈពេលដែលនាង និងម្តាយ បានដើរចញពីហាងកាត់ដេរសម្លៀកបំពាក់មួយនៅក្បែរមន្ទីរពេទ្យ វិសាលសុខ ជិតផ្សារដើមគ ។
ក្រោយការបាញ់ប្រហារ កញ្ញា ទូច ស៊ុននិច នៅតែមានជំងឺរ៉ាំរៃ រហូតកម្រើកលែងបានដោយភាពឈឺចុកចាប់ត្រង់មុខរបួស ហើយប្រើម៉ាស៊ីនជួយដកដង្ហើម និងហូបអាហារដោយប្រើទុយោ។
កាលពីពីរខែមុននេះ ប្រធានសមាគមសិល្បករខ្មែរ លោក សុះ ម៉ាច បានចុះសួរសុខទុក្ខ កញ្ញា ទូច ស៊ុននិច នៅសហរដ្ឋអាមេរិក ក្នុងទីក្រុង Sacramento ។ លោកបានប្រាប់ VOD នៅថ្ងៃពុធនេះថា បើទោះជា កញ្ញា ទូច ស៊ុននិច កំពុងស្នាក់នៅសហរដ្ឋអាមេរិកក៏ដោយ ប៉ុន្តែក្រុមគ្រួសាររបស់នាងនៅតែមានការព្រួយបារម្ភចំពោះសុវត្ថិភាព ហើយមានការតឹងតែងបំផុតសម្រាប់អ្នកទៅសួរសុខទុក្ខ លើកលែងតែគេស្គាល់ច្បាស់ និងមានភាពស្និទ្ធស្នាលជាមួយនាង ទើបត្រូវបានអនុញ្ញាតឲ្យចូល។
លោក សុះ ម៉ាច បន្ថែមថា៖«ឥឡូវនេះ ទូច ស៊ុននិច អាចនិយាយបាន ស្តាប់បាន ប៉ុន្តែកម្រើកមិនបាន ហើយរង់ចាំថ្នាំម្យ៉ាង ដើម្បីជួយសង្គ្រោះនាង»។
កញ្ញា ទូច ស៊ុននិច ជាតារាចម្រៀងមានទឹកដមសំឡេងពិរោះ កាយវិការទន់ភ្លន់ និងជាអតីតតារាចម្រៀងប្រចាំផលិតកម្មហង្សមាស។ កញ្ញា ធ្លាប់គ្រងតំណែងកំពូលតារាចម្រៀងក្នុងអំឡុងឆ្នាំ២០០០។បន្ទាប់ពីការបាញ់ប្រហារ កញ្ញា ទូច ស៊ុននិច ក៏បានទទួលសិទិ្ធស្នាក់នៅសហរដ្ឋអាមេរិកពីអង្គការសិទិ្ធមនុស្សអន្តរជាតិ UNHCR ក្នុងនាមជាជនជាតិភៀសខ្លួន។
តារាចម្រៀងដែលរងការបាញ់ប្រហារដោយគ្រាប់កាំភ្លើង មានដូចជា ពិសិដ្ឋ ពីលិកា ត្រូវបានបាញ់សម្លាប់ កាលពីខែកក្កដា ឆ្នាំ១៩៩៩ និងអតីតតារាចម្រៀង កញ្ញា ពៅ បញ្ញាពេជ្រ ត្រូវបានបាញ់ប្រហារ កាលពីថ្ងៃទី២៣ ខែកុម្ភៈ ឆ្នាំ២០០៧ នៅមុខសាលាភាសាបរទេសមួយ ក្បែររបងក្រសួងឧស្សាហកម្មរ៉ែ និងថាមពល៕
សរសេរមកកាន់ លោក ឡាយ សាមាន តាមរយៈlaysamean168@yahoo.com