ដោយ៖ បូ សាវី និង អ៊ឹង ប៊ុនថន
ថ្ងៃចន្ទ ទី23 ខែកញ្ញា ឆ្នាំ2013
http://vodhotnews.com
ស្តាប់សំឡេង៖ |
ចម្លងទុក |
សម័យប្រជុំសភាដំបូងសម្រាប់អាណត្តិទី៥ (រូបថតពី ទទក)
ប្រជាពលរដ្ឋមួយចំនួន នៅខេត្ដសៀមរាប គាំទ្រការមិនចូលប្រជុំសភាលើកដំបូង របស់គណបក្សសង្គ្រោះជាតិ ដោយសារមិនទាន់មានដំណោះស្រាយពីភាពមិនប្រក្រីតីនៅថ្ងៃបោះឆ្នោត ប៉ុន្ដែពលរដ្ឋខ្លះទៀត អំពាវនាវឲ្យថ្នាក់ដឹកនាំគណបក្សជំទាស់នេះ ចូលរួមប្រជុំ ដើម្បីបញ្ចប់ជម្លោះនយោបាយ។
ពលរដ្ឋនៅតាមបណ្ដាស្រុក និងក្រុង នៃខេត្តសៀមរាប ឲ្យដឹងថា ពួកគេគាំទ្រការមិនចូលប្រជុំសភាដំបូងនៅព្រឹកថ្ងៃចន្ទនេះ ព្រោះគណបក្សនេះចង់រកយុត្ដិធម៌ជូនម្ចាស់ឆ្នោតជាមុនសិន។ ពួកគេយល់ថា ការប្រជុំសភានៅព្រឹកមិញនេះ មិនមែនជាសភាដែលកើតចេញពីពលរដ្ឋនោះទេ ៖ “ខ្ញុំពេញចិត្តគាត់ ហើយក៏ខ្ញុំគាំទ្រគាត់ដែរ មិនព្រមចូលរួមប្រជុំសភា ព្រោះអីមិនមែនជាសភារបស់ប្រជាពលរដ្ឋពិតប្រាកដ សភាដែលដឹកនាំដោយគណបក្សប្រជាជន គឺជាសភាដែលផ្តាច់ការ គោរពឆន្ទៈរាស្ត្រ មិនចូលរួមក្នុងសភា មានន័យថា លោកស្រលាញ់រាស្ត្រជាធំ មិនមែនយកអំណាច មិនមែនយកប្រាក់ មិនយកបុណ្យស័ក្តិធ្វើជាធំ គឺយករាស្ត្រ ព្រោះលោកស្រលាញ់ប្រជាធិបតេយ្យដើម្បីរាស្ត្រ”។
ដោយឡែកពលរដ្ឋខ្លះទៀត ឲ្យដឹងថា ការប្រជុំសភានេះ គឺធ្វើទៅតាមច្បាប់រដ្ឋធម្មនុញ្ញ ហើយពួកគាត់ខ្លះអំពាវនាវឲ្យគណបក្សជាប់ឆ្នោតចូលរួមប្រជុំសភា ដើម្បីបញ្ចប់ជម្លោះនយោបាយ និងរកដំណោះស្រាយជូនពលរដ្ឋម្ចាស់ឆ្នោត ៖ “យើងផ្អែកទៅលើច្បាប់ ឃើញថាការប្រជុំ៦៨រូបនេះ គឺវាស្របតាមច្បាប់ រដ្ឋធម្មនុញ្ញ ព្រោះច្បាប់គេអនុញ្ញាតថា ៦៨រូបអាចដំណើរការបាន អញ្ជឹងវាមិនបញ្ហាទេ។ ព្រោះខ្ញុំគិតថា បើចូលរួមប្រជុំទៅ អាចបញ្ចប់ជម្លោះនយោបាយ រវល់តែគណៈបក្សទាំងពីរឈ្លោះគ្នាអញ្ជឹង វាអាចបណ្តាលឲ្យបាត់បង់ភ្ញៀវចូលមកស្រុកខ្មែរយើងច្រើន។ គណបក្សកាន់អំណាចមុនៗនោះគាត់ យុត្តិធម៌ ត្រឹមត្រូវ គាត់មិនលោះបង់ ទាមទារយកអំណាច ឬក៏យកការងារនោះតែម្នាក់ឯងទេ។ ច្បាប់បោះឆ្នោតថា ៦០ថ្ងៃក្រោយថ្ងៃបោះឆ្នោត ព្រះមហាក្សត្រត្រូវកោះអញ្ជើញ បេក្ខភាពសភាដែលបានជាប់ឆ្នោត អញ្ជឹងព្រះករុណាគាត់បំពេញព្រះរាជតួនាទី របស់គាត់ទៅតាមច្បាប់”។
សម្រាប់ពលរដ្ឋមួយរូប នៅស្រុកជីក្រែង បានបញ្ចេញទស្សនៈថា កិច្ចប្រជុំសភាលើកដំបូងនេះ គឺគណបក្សប្រជាជនកម្ពុជា គ្រាន់តែចង់សាកល្បង និងចង់ដឹងពីទឹកព្រះទ័យរបស់ព្រះមហាក្សត្រថា មានភាពលំអៀងទៅរកគណបក្សនយោបាយណាមួយ ឬតាមការសំណូមពររបស់ប្រជាពលរដ្ឋ ៖ "គឺវាអត់មានន័យ មានខ្លឹមសាអីដែលធ្វើឲ្យប្រជារាស្ដ្រយើងហ្នឹង មានការភ្ញាក់ផ្អើលទេ ហើយក៏គ្មានមូលដ្ឋានអីដែលមកចោទប្រកាន់ គណបក្សសង្គ្រោះជាតិហ្នឹងមិនគោរពព្រះរាជបន្ទូលព្រះកុរណាដែរ"។
នៅក្នុងពិធីកាន់បិណ្ឌ ក្នុងវត្ដសុវណ្ណមុន្នី ហៅវត្ដគង់ម៉ុច ស្ថិតក្នុងសង្កាត់សៀមរាប នៅព្រឹកថ្ងៃចន្ទនេះ ប្រធានគណបក្សសង្គ្រោះជាតិ លោក សម រង្ស៊ី ថ្លែងទៅកាន់ពលរដ្ឋរាប់ពាន់នាក់ថា ជាសភាឯកបក្ស ខុសច្បាប់រដ្ឋធម្មនុញ្ញ ផ្ទុយទាំងស្រុងនឹងលទ្ធិប្រជាធិបតេយ្យ សេរីពហុបក្ស រំលោភលើកិច្ចព្រមព្រៀងទីក្រុងប៉ារីស ថ្ងៃទី២៣ខែតុលាឆ្នាំ១៩៩១ និងមិនគោរពឆន្ទៈពលរដ្ឋ ៖ "អាអ្វីដែលគេធ្វើព្រឹកមិញនៅរដ្ឋសភា គឺខុសច្បាប់ខុសរដ្ឋធម្មនុញ្ញផ្ទុយពីគោលការណ៍ការលិទ្ធិប្រជាធិបតេយ្យ ផ្ទុយពីកិច្ចព្រមព្រៀងទីក្រុងបារីស ជាពិសេសផ្ទុយពីឆន្ទៈប្រជារាស្រ្ដខែ្មរយើងអត់សុខចិត្ដ យើងអត់ព្រម យើងអត់ចូល" ។
សូមបញ្ជាក់ថា មុនបើកកិច្ចប្រជុំសភាលើកដំបូងមួយថ្ងៃ បេក្ខជនជាប់នៃគណបក្សសង្គ្រោះជាតិចំនួន៥៥រូប ដែល គ.ជ.ប ប្រកាស បានធ្វើពិធីស្បថ ចំពោះបារមីវត្ថុស័ក្តិសិទ្ធិ និងព្រលឹងបុព្វបុរសខ្មែរនៅខាងមុខប្រាសាទអង្គរវត្ដ ថាមិនចូលប្រជុំសភាជាលើកដំបូង តាមការកោះអញ្ជើញរបស់ព្រះមហាក្សត្រនោះឡើយ ដ៏រាបណាមិនមានដំណោះស្រាយជូនម្ចាស់ឆ្នោតជាមុន៕
សរសេរមកកាន់លោក បូ សាវី តាមរយៈ savy@vodhotnews.com
ដឹកនាំតាមចិន ឬ យួន (២អាណត្តិ=១០ឆ្នាំ).
ដឹកនាំតាម គុយបា ; ស៊ីរី គឹ តពូជ មិនព្រមចុះចេញទេ……
នេះបានចំជាមនុស្សគំរក់ផ្តាច់ការ….
It is unconstitutional assembly. It is mono party assembly which is contradict to the law of Kingdom of Cambodia. The international community won’t be able to accept it and will consider the new government unlawful.