ដោយ៖ វង្ស សុម៉ាលីន
ថ្ងៃអង្គារ៍ ទី24 ខែកញ្ញា ឆ្នាំ2013
http://vodhotnews.com
កញ្ញា លីលី និងលោក ហេង នរៈកក្កដា
ក្រោយបាត់តំណែងពិធីការិនី អស់មួយរយៈធំនៅទូរទស្សន៍ CTN ពេលនេះ តារាចម្រៀង និងជាតារាសម្ដែងល្បីឈ្មោះនាងលីលី បានវិលមកកាន់តំណែងនេះជាថ្មីវិញហើយ ដោយកំពុងចាប់ដៃជាមួយតារាសម្ដែង លោកហេង នរៈកក្កដា ក្នុងកម្មវិធីធំមួយរបស់ស្ថានីយទូរទស្សន៍អប្សរា។ ដំណើរមកកាន់ទីតាំងចាស់លើកនេះ ហាក់ផ្ដល់ជំនឿចិត្តយ៉ាងខ្លាំង ថានាងពិតជាក្លាយខ្លួនជាពិធីការិនីលេចធ្លោម្នាក់ លើសពីពេលដែលនាងក្ដាប់តំណែងនៅ CTN នោះទៅទៀត។
ចាប់ពីថ្ងៃព្រហស្បតិ៍ទី២៦ ខែកញ្ញានេះតទៅ តារាចម្រៀងលេចធ្លោរ ក្នុងក្រុម Hi Class ដ៏ល្បីឈ្មោះនាងលីលី នឹងបង្ហាញមុខជាថ្មីទៀតហើយ ក្នុងតំណែងជាពិធីការិនី។ ទោះយ៉ាងណា តំណែងដែលនាងឈោងបានមកវិញនេះ មិនមែនស្ថិតនៅក្នុងស្ថាប័នចាស់នោះទេ ប៉ុន្តែជាកម្មវិធីធំមួយ របស់ស្ថានីយទូរទស្សន៍អប្សរាទៅវិញ។ ក្រុមតារាសិល្បៈ និងក្រុមយុវវ័យភាគច្រើន សម្ដែងអារម្មណ៍ភ្ញាក់ផ្អើលមិនតិចឡើយ ដែលតារាស្រីវ័យក្មេងរូបនេះ ស្រាប់តែកញ្ឆក់បានមុខមាត់ នៅក្នុង កម្មវិធី«Next Program» ដែលជាកម្មវិធីធំ និងទើបបង្កើតថ្មីនៅលើកញ្ចក់ទូរទស្សន៍អប្សរា។ នេះជាកម្មវិធី ដែលចាក់ផ្សាយនៅរៀងរាល់ថ្ងៃព្រហស្បតិ៍ វេលាម៉ោង៦ និង១០នាទី ល្ងាច និងរៀងរាល់ថ្ងៃសៅរ៍ វេលាម៉ោង១២ថ្ងៃត្រង់ ដែលជាកម្មវិធីធំជំនួសកម្មវិធីល្បីឈ្មោះ«Nokia Lumia Show» ដែលទទួលបានការគាំទ្រច្រើនលើសលប់ក្នុងពេលចាក់ផ្សាយកន្លងមក។
មន្ត្រីជាន់ខ្ពស់ប្រចាំក្រុមហ៊ុនOne Channel Media Co.Ltd ដែលជាអ្នករៀបចំកម្មវិធីនេះ ចាក់ផ្សាយនៅលើកញ្ចក់ទូរទស្សន៍អប្សរា បានប្រាប់ឲ្យដឹងថា លីលី និងលោកហេង នរៈកក្កដា ទើបតែត្រូវទាក់ទងឲ្យមកកាន់កម្មវិធីនេះ ជំនួសនាង នេត្រ សុចរិយា និងលោកយឹម ណារ៉ា កាលពីសប្ដាហ៍មុនប៉ុណ្ណោះ បន្ទាប់ពីមើលឃើញថា តារាប្រុសស្រីទាំងពីររូប មានរូបសម្រស់វ័យក្មេងព្រមគ្នា និងមានសមត្ថភាពមិនចាញ់ ពិធីករពិធីការិនីចាស់ទាំងពីរ ដែលផុតកំណត់ការងារ។ ក្រៅពីតំណែងក្នុងកម្មវិធីមួយនេះ លីលី ក៏ត្រូវក្រុមហ៊ុន One Channel Media Co.Ltd ដែលជាក្រុមហ៊ុនធំមួយ ក្នុងការផលិតកម្មវិធីតូចធំ ដាក់ផ្សាយនៅទូរទស្សន៍ ផ្ដល់កម្មវិធី២ទៀត ដែលកំពុងរៀបចំដំណើរការនោះផងដែរ។
លីលី បានថ្លែងប្រាប់VODថា កម្មវិធី «Next Program» ដែលនាងទើបទទួលចេញមុខនោះ គឺពិតជាកម្មវិធីធំ របស់ស្ថានីយទូរទស្សន៍អប្សរាមែន ដោយកម្មវិធីនោះ មានការបង្ហាញនូវគំនិតច្នៃប្រឌិត ចំណេះដឹងថ្មី ឬស្ទីលប្លែកៗ នៅវគ្គទី១ វគ្គទី២ និងមានបទសម្ភាសន៍ដោយផ្ទាល់ជាមួយតារាប្រុសស្រីល្បីឈ្មោះ នៅក្នុងព្រះរាជាណាចក្រកម្ពុជា ដល់ផ្ទះតារាកិត្តិយស ដែលធ្វើឲ្យនាងកក់ក្ដៅយ៉ាងខ្លាំង ថាជាកម្មវិធី ដែលមិនពិបាកទទួលបានការទាក់ទាញ។ នាងនឹងបើកឆាកបង្ហាញមុខ នៅក្នុងកម្មវិធីនេះ នៅថ្ងៃព្រហស្បតិ៍ទី២៦ កញ្ញានេះ ក្រោមការចុះដល់ទីតាំងរស់នៅរបស់ពិធីការិនីល្បីឈ្មោះ នាងឌួង ហ្សូរីដា ដែលជាតារាស្រីដ៏ល្បីឈ្មោះម្នាក់។ ដំណើរហក់ចូលក្នុងតំណែងមួយនេះ លីលី អះអាងថា មិនពិបាកឲ្យនាងក្លាយខ្លួនជាពិធីការិនីលេចធ្លោក្នុងពេលដ៏ខ្លីនោះទេ ពិសេសនៅពេលនឹកដល់កម្មវិធីថ្មី២ ដែលកំពុងរៀបចំដំណើរការ ហើយតម្រូវឲ្យនាងចេញធ្វើពិធីការិនីតែម្នាក់ឯងមួយកម្មវិធី និងជាមួយនាយឆ្អឹងមួយកម្មវិធីទៀតនោះ។
ក្រុមអ្នកតាមដានពីកម្មវិធី «Next Program» អះអាងថា លីលី ត្បិតថាកន្លងមកបានបង្ហាញខ្លួនក្នុងនាមជាពិធីការិនីរបស់ស្ថានីយទូរទស្សន៍ធំ ប៉ុន្តែអ្នកខ្លះមិនបានដឹងពីការងាររបស់នាងនៅទីនោះផង ដោយសារតែកម្មវិធីដែលនាងចេញមុខត្រូវគេកត់សម្គាល់ថា លេចធ្លោតិចតួចជាងគេ និងត្រូវបាត់មុខទៅវិញ ក្រោយពីចេញផ្សាយបានតែមួយរយៈ។ លីលី បញ្ជាក់ថា នឹងប្រឹងប្រែងក្ដោបក្ដាប់តំណែងនេះ មិនឲ្យរបូតនោះទេ ដោយក្នុងរយៈពេលនេះ នាងក៏ប្រឡូកអាជីពដើរម៉ូដក្នុងក្រុមCambodia Super Model និងសម្ដែងរឿងភាគឲ្យCTNផងដែរ ដើម្បីបង្កើនភាពលេចធ្លោ៕
សរសេរមកកាន់ លោក វង្ស សុម៉ាលីន តាមរយៈ vongsomalin@yahoo.com