ដោយ៖ បូ សាវី និងដួង សុខា
ថ្ងៃសុក្រ ទី11 ខែតុលា ឆ្នាំ2013
http://vodhotnews.com
ស្តាប់សំឡេង៖ |
ចម្លងទុក |
(រូបថតដោយ សាវី)
ទឹកជំនន់ នៅខេត្តសៀមរាប ដែលបណ្តាលមកពីការបាក់ទំនប់តាកៅ ស្ថិតក្នុងតំបន់អង្គរ បានស្រកខ្លះហើយ នៅតាមបណ្តាស្រុកមួយចំនួន និងនៅក្រុងទេសចរណ៍ ចាប់ពីថ្ងៃព្រហស្បតិ៍ម្សិលមិញ ប៉ុន្តែស្រុកខ្លះនៅតែទទួលរងការលិចលង់។
ប្រជាជននៅស្រុកក្រឡាញ់ ខេត្ដសៀមរាប លោក ស៊ីម សោភ័ណ្ឌ ប្រាប់VODនៅថ្ងៃសុក្រនេះថា ជំនន់ទឹកភ្លៀងមិនទាន់ស្រកទាំងស្រុងទេ នៅស្រុករបស់លោក ដោយសារតែមានជំនន់ទឹកភ្លៀងចំនួនពីរលើក។ លោក បន្តថា ទឹកជំនន់បានធ្វើឲ្យ ឃុំចំនួន៤ ក្នុងចំណោម១០ឃុំនៃស្រុកក្រទ្បាញ់ លិចលង់ធ្ងន់ធ្ងរ និងបណ្ដាលឲ្យខូចខាតដំណាំកសិកម្មជាច្រើន។ សាលាមួយចំនួនក៏ត្រូវបានបិទទ្វារបណ្តោះអាសន្នផងដែរ ៖ "លិចតែឃុំធ្ងន់ធ្ងរ ឃុំតាអាង ជន្នៀសដៃ កំពង់ស្កូវ ក្រឡាញ់ ថ្មីៗទើបតែលិចសំបួរក្រោយទេ ក៏ប៉ុន្ដែទឹកជំនន់ឆ្នាំនេះហ្នឹង វាជន់ពីរសារ ធ្វើឲ្យផលដំណាំរបស់គាត់ ខូចទាំងស្រុងហ្នឹងច្រើន ដោយសារតែលើកទីមួយជន់មួយសារហ្នឹង រយៈពេលជិតដប់ថ្ងៃ ច្រកទៅវិញហើយ សារក្រោយនេះ យូរហ្នឹងធ្វើឲ្យរលួចខូចច្រើន" ។
កាលពីយប់ថ្ងៃទី៥ ខែតុលា ឆ្នាំ២០១៣ ទំនប់ទឹកតាកៅ ស្ថិតនៅសង្កាត់គោកចក ក្រុងសៀមរាប បានបាក់ ដែលបណ្ដាលឲ្យជនលិចលំនៅឋានពលរដ្ឋប្រមាណ១៥ភូមិ ស្មើនឹងជិត៣ ០០០គ្រូសារ ស្ថិតនៅខាងជើង និងខាងលិចក្រុងទេសចរណ៍ ក្នុងសង្កាត់គោកចក និងសង្កាត់ស្វាយដង្គំ។
ប្រជាជននៅភូមិវាល សង្កាត់គោកចក ក្រុងសៀមរាប អ្នកស្រី ថន ដាលីន ឲ្យដឹងថា ទឹកជំនន់លិចក្រុងទេសចរណ៍ ដែលបណ្ដាលពីការបាក់ទំនប់តាកៅ បានស្រកអស់ហើយនៅក្រោមផ្ទះរបស់គាត់ និងកន្លែងមួយចំនួននៅក្នុងសង្កាត់ ប៉ុន្ដែ សាលារៀនខ្លះបន្តរងការលិចលង់។
អ្នកស្រី បន្ដថា អាជ្ញាធរពាក់ព័ន្ធ មិនទាន់ផ្ដល់អំណោយ ឬស្រង់ឈ្មោះប្រជាជនរងគ្រោះដោយទឹកជំនន់ នៅក្នុងសង្កាត់មួយចំនួន ដើម្បីចែកអំណោយដល់ពួកគាត់នៅឡើយទេ ៖ "ខានធ្វើការជាងប្រាំប្រាំមួយថ្ងៃហើយ ឡើងដាច់លុយ ទិញបាយទិញអី ។ នៅអត់ទាន់បានចុះផង គេអត់ប្រាប់ផង ខ្ញុំអត់ហានទៅ ឃើញអ្នកខ្លះគេចុះ ខ្លះអត់ដឹង" ។
VODមិនអាចទាក់ទងអភិបាលខេត្ត លោក ឃឹម ប៊ុនសុង បាននៅទ្បើយទេ។ ប៉ុន្ដែសេចក្ដីអំពាវនាវរបស់គណៈកម្មាធិការសាខាកាកបាទក្រហមកម្ពុជា ខេត្ដសៀមរាប ចុះហត្ថលេខា នៅថ្ងៃទី១០ ខែតុលា ដោយអភិបាលខេត្ដ និងជាប្រធានគណៈកម្មាធិការ លោក ឃឹម ប៊ុនសុង ឲ្យដឹងថា គ្រោះមហន្ដរាយដោយទឹកជំនន់ ចាប់ពីខែកញ្ញា ដល់ខែតុលានេះ សម្លាប់មនុស្ស១៥នាក់ របួស២នាក់ ធ្វើឲ្យរលំផ្ទះ១១ខ្នង ខូចខាតស្រូវវស្សាទាំងស្រុងចំនួន ១ ២៤០ហិកតា និងលិចផ្ទះពលរដ្ឋរាប់ម៉ឺនគ្រួសារផងដែរ។
សេចក្តីអំពាវនាវ បន្តថា ទឹកជំនន់ បានប៉ះពាល់ក្រុង-ស្រុកចំនួន៩ រួមមានស្រុកក្រឡាញ់ ស្រីស្នំ វ៉ារិន អង្គរជុំ ពួក អង្គរធំ ប្រាសាទបាគង ជីក្រែង និងក្រុងសៀមរាប។
សេចក្តីអំពាវនាវឲ្យដឹងដែរ ថាអាជ្ញាធរខេត្ត គណៈកម្មាធិការគ្រប់គ្រងគ្រោះមហន្តរាយខេត្ត សាខាកាកបាទក្រហមខេត្ត បានសហការជាមួយអង្គការនានា ផ្ដល់ជំនួយបឋមដល់គ្រួសាររងគ្រោះចំនួន ៤ ៩៨៧គ្រួសារ ក្នុងស្រុកក្រទ្បាញ់ និងក្រុងសៀមរាប។
ពាក់ព័ន្ធនឹងទឹកជំនន់នៅកម្ពុជា មន្ត្រីជាន់ខ្ពស់គណៈកម្មាធិការជាតិគ្រប់គ្រងគ្រោះមហន្តរាយ ឲ្យដឹងថា គិតមកដល់ថ្ងៃទី១០ ខែតុលានេះ មនុស្សស្លាប់បានកើនដល់១០៤នាក់ហើយ ខណៈប្រជាជនជិតមួយលានប្រាំសែននាក់ រងគ្រោះដោយសារជំនន់ទឹកភ្លៀង ដែលបានពន្លិចខេត្ត-រាជធានីចំនួន២០ នៅកម្ពុជា ៕
សូមសរសេរមកកាន់ លោក បូ សាវី តាមរយៈ savy@vodhotnews.com