ថ្ងៃ អង្គារ 22 តុលា 2013
ដោយ លាង ដឺលុច
RFI
នៅរសៀលថ្ងៃអង្គារនេះ តំណាងគណបក្សសង្គ្រោះជាតិ និងសាលារាជធានីភ្នំពេញនឹងជួបគ្នាម្តងទៀត ដើម្បីជជែកអំពីបញ្ហាលំអិតទាក់ទងនឹងការដង្ហែស្នាមមេដៃទៅតាមបណ្តាស្ថានទូត ដែលគណបក្សនេះបានគ្រោង។ អ្នកនាំពាក្យសាលារាជធានីភ្នំពេញ បានពន្យល់ថា អាជ្ញាធរត្រូវការរៀបចំតម្រាយផ្លូវសម្រាប់ការដង្ហែញត្តិនេះ ដើម្បីបញ្ជៀសអសណ្តាប់ធ្នាប់ និងការពារសន្តិសុខចំពោះស្ថានទូតផង។
អ្នកគាំទ្រគណបក្សប្រឆាំងនៅក្នុងមហាបាតុកម្ម (RFI/Siv Channa)
មហាបាតុកម្មរបស់គណបក្សសង្គ្រោះជាតិចាប់ផ្តើមនៅថ្ងៃស្អែកហើយ ការជួបគ្នារវាងគណបក្សនេះ និងអាជ្ញាធររាជធានីនៅតែបន្តធ្វើរហូតដល់ថ្ងៃនេះ។ នៅ រសៀលថ្ងៃអង្គារនេះ សាលារាជធានីភ្នំពេញនឹងពិភាក្សាលំអិតអំពីគម្រោងហែក្បួនដាក់ញត្តិ ឬស្នាមដៃរបស់គណបក្សសង្គ្រោះជាតិទៅតាមបណ្តាស្ថានទូត។ នេះបើតាមការបញ្ជាក់របស់លោក ឡុង ឌីម៉ង់ អ្នកនាំពាក្យសាលារាជធានីភ្នំពេញ។
ចំនួនមនុស្សដែលចូលរួមហែរញត្តិក៏នឹងក្លាយជារបៀបវារៈនៃកិច្ចពិភាក្សាគ្នានៅរសៀលថ្ងៃនេះដែរ។ ខណៈអ្នកតំណាងរាស្ត្រគណបក្សសង្គ្រោះជាតិ លោក ហូ វ៉ាន់បានប្រាប់វិទ្យុបារាំងអន្តរជាតិថា គណបក្សលោកនឹងទទូចប្រាប់សាលារាជធានីថា អ្នកចូលរួមដង្ហែញត្តិក្នុងរយៈពេល៣ថ្ងៃខាងមុននេះ នឹងមានចំនួន១ម៉ឺននាក់ អ្នកនាំពាក្យសាលារាជធានីបានព្រលយអោយដឹងហើយថា សាលារាជធានីទំនងជានឹងអនុញ្ញាតអោយចំនួននៃអ្នកហែរញត្តិនេះ មិនអោយលើសពី១០០០នាក់ឡើយ។
មូលហេតុត្រូវបានមន្ត្រីសាលារាជធានីរូបនេះពន្យល់យោងទៅលើបញ្ហាសណ្តាប់ធ្នាប់ និងសន្តិសុខរបស់ស្ថានទូតផង។ យោងតាមមន្ត្រីដដែល គណបក្សសង្គ្រោះជាតិត្រូវទទួលការយល់ព្រមពីស្ថានទូតថា នឹងទទួលយកញត្តិពួកគេ ទើបអាជ្ញាធរធ្វើតម្រាយផ្លូវជូនពួកគេ ហើយថា ក្បួនទាំងនោះក៏មិនអាចទៅក្បែរស្ថានទូតដែរ។ គឺតម្រាយផ្លូវនេះហើយ ដែលអាជ្ញាធរសាលារាជធានីនឹងត្រូវអន្តរាគមន៍ជួយសំរួលក្នុងការធ្វើចរាចរនោះ។
លោក ហូ វ៉ាន់ ដែលទទួលបន្ទុកក្នុងការងាររៀបចំមហាបាតុកម្មរបស់គណបក្សសង្គ្រោះជាតិបានប្រាប់អោយដឹងថា នៅព្រឹកថ្ងៃទី២៣តុលា ស្នាមមេដៃស្តីពីការប្រឆាំងលទ្ធផលបោះឆ្នោតនឹងត្រូវដង្ហែទៅ ការិយាល័យសិទ្ធិមនុស្សអង្គការសហប្រជាជាតិ។ នៅព្រឹកថ្ងៃទី២៤ គណបក្សនេះនឹងដង្ហែស្នាមមេដៃទៅស្ថានទូត បារាំង អង់គ្លេស និងសហរដ្ឋអាមេរិក។ រីឯព្រឹកថ្ងៃទី២៥វិញ គណបក្សនេះនឹងដង្ហែស្នាមមេដៃទៅស្ថានទូត អូស្ត្រាលី រុស្ស៊ី ជប៉ុន ឥណ្ឌូនេស៊ី និងស្ថានទូតចិន។
តំណាងរាស្ត្រគណបក្សសង្គ្រោះជាតិលោក ហូ វ៉ាន់ ដែលនឹងមានចូលរួមក្នុងកិច្ចប្រជុំនារសៀលនេះបានប្រាប់អោយដឹងថា គណបក្សសង្គ្រោះជាតិនៅទទួចសង់រោងដើម្បីផ្តល់ជម្រកដល់បាតុករដែលមក ពីបណ្តាខេត្តចាប់ពីល្ងាចថ្ងៃអង្គារនេះហើយ។ ការសង់រោងស្នាក់នៅពេលយប់ ដែលលោកឧបនាយករដ្ឋមន្ត្រី ស ខេង រដ្ឋមន្ត្រី ក្រសួងមហាផ្ទៃបដិសេធរួចហើយ។ ការបដិសេធនេះត្រូវបានសរសេរនៅក្នុងលិខិតផ្ញើមកអភិបាលរាជធានីភ្នំពេញនៅយប់ថ្ងៃច័ន្ទ៕
The resolution for this matter will remain an obstacle if the ruling party is still resisting to accept the demand that lead to the investigation of electoral irregularities. We already knew that CPP keep playing game of the same old strategy, luring the opposition into bilateral negotiation by offering some lower positions in the parliament which is unacceptable by the CNRP. The question is, why CPP is hesitated and denied the request from the voters ? Are they satisfied with the political deadlock that lead to the social unrest and political turmoil for the long run ?