Wednesday, 06 November 2013
ឃុត សុភចរិយា
ភ្នំពេញ ប៉ុស្តិ៍
ព្រះ សីហនុៈ ពលរដ្ឋ ៩៣ គ្រួសារ នៅក្នុងភូមិ កោះតូច សង្កាត់ កោះរុង ក្រុង ព្រះសីហនុ កំពុងកើតកង្វល់អំពីការបាត់បង់ដីធ្លី ស្រែចម្ការ និងផ្ទះសម្បែងជាថ្មី បន្ទាប់ពីអ្នកភូមិបីគ្រួសារត្រូវកងសន្តិសុខក្រុមហ៊ុន រ៉ូយ៉ាល់ គ្រុប គំរាមនឹងបង្ខំឲ្យពួកគាត់រុះរើផ្ទះ ដែលបានរស់នៅជាង ២០ឆ្នាំ ហើយចាកចេញ។
លោក ព្រាប គឹមឡាយ ជាគ្រួសាររងគ្រោះម្នាក់ក្នុងបីគ្រួសារដែលរងការគំរាមបានប្រាប់ ភ្នំពេញ ប៉ុស្តិ៍ ថា កាលពីព្រឹកថ្ងៃសុក្រ ក្រុមសន្តិសុខ និងមន្ត្រីកងរាជអាវុធហត្ថចំនួនបួននាក់ បានមកហាមមិនឲ្យគាត់ជួសជុលផ្ទះដែលទ្រុឌទ្រោមទេ និងបានដកយកសម្ភារមួយចំនួនដែលប្រើក្នុងការជួសជុលផ្ទះផង។
លោកនិយាយថា៖ «ក្រោយពីការដកយករបស់ទាំងនោះពួកគេគំរាមខ្ញុំឲ្យរុះរើផ្ទះចេញ ជាមួយគ្នានឹងផ្ទះអ្នកភូមិពីរគ្រួសារទៀត ដោយសារថា ផ្ទះបីនេះសង់នៅលើដីរបស់ក្រុមហ៊ុនគេ»។
លោក សេង ហ៊ួលាង ចៅសង្កាត់រង សង្កាត់ កោះរុង បានប្រាប់ថា កោះរុង មានផ្ទៃដីជាង ៩ ពាន់ហិកតា មានប្រជាពលរដ្ឋជាង ៩០ គ្រួសាររស់នៅ ប្រកបមុខរបរនេសាទធ្វើកសិកម្ម និងបម្រើសេវាទេសចរណ៍តាំងពីឆ្នាំ ១៩៩៣។ នៅក្នុងខែ កក្កដា ឆ្នាំ ២០០៩ រាជរដ្ឋាភិបាលបានធ្វើសម្បទានដីតំបន់ កោះរុង ទំហំ ៤.៦២៨ ហិកតា ឲ្យទៅក្រុមហ៊ុន រ៉ូយ៉ាល់ គ្រុប របស់អ្នកឧកញ៉ា គិត ម៉េង ធ្វើការអភិវឌ្ឍជាមជ្ឈមណ្ឌលពាណិជ្ជកម្មនិងរមណីយដ្ឋាន អេកូ ទេសចរណ៍។
លោកបន្តថា ក្រោយពីបានអាជ្ញាប័ណ្ណពីរាជរដ្ឋាភិបាល ក្រុមហ៊ុននេះប្រើសិទ្ធិអំណាចគំរាមកំហែង និងបំភិតបំភ័យពលរដ្ឋ ដោយហាមមិនឲ្យសង់អ្វីថែមនៅលើដីខ្លួនឡើយ និងបង្ខំឲ្យអ្នកភូមិរុះរើផ្ទះសម្បែងចាកចេញពីកន្លែងធ្លាប់រស់នៅរាប់សិបឆ្នាំនេះ ដោយគ្មានសំណងអ្វីទាំងអស់។ លោកថា ពលរដ្ឋខ្លះត្រូវក្រុមហ៊ុនប្តឹងទៅតុលាការ ដោយចោទប្រកាន់ពាក់ព័ន្ធទៅនឹងការទន្ទ្រានដីក្រុមហ៊ុនទៀតផង។
លោកបន្ថែមថា៖ «កន្លងមកអាជ្ញាធរខេត្តបានសម្រេចថា អ្នកភូមិរស់នៅកន្លែងណាត្រូវរស់នៅទីនោះបន្តនិងបង្កបង្កើនផលដូចធម្មតា និងចេញបម្រាមមិនឲ្យក្រុមហ៊ុនធ្វើការគំរាមកំហែង រុះរើលំនៅឋានប្រជាពលរដ្ឋទេ រហូតដល់មានដំណោះស្រាយជាថ្មី»។
លោកឲ្យដឹងដែរថា កាលពីថ្ងៃ សុក្រ ពួកអ្នកភូមិបានរាយការណ៍ថា លោក ខៀវ សំណាង មេបញ្ជាការរងកងរាជអាវុធហត្ថខេត្ត បានដឹកនាំកម្លាំងចុះទៅគំរាមរុះរើផ្ទះពលរដ្ឋបីគ្រួសារនៅភូមិ កោះតូច ប៉ុន្តែ មិនបានសម្រេច ខណៈក្រុមអ្នកភូមិបានលើកគ្នាធ្វើការតវ៉ាប្រឆាំង ដោយមានកាន់កាំបិត និងកាន់ដំបងត្រៀមទប់ទល់ផង។ តែទោះយ៉ាងណាមិនមានប៉ះទង្គិចគ្នាដោយហិង្សាទេ។
លោក ប្រាក់ ស៊ីហារ៉ា អភិបាលរងខេត្ត ព្រះសីហនុ ទទួលបន្ទុកដីធ្លី បានបញ្ជាក់ដែរថា លោកនៅមិនទាន់ទទួលបានរបាយការណ៍ណាមួយពីអាជ្ញាធរមូលដ្ឋានជុំវិញសេចក្ដីរាយការណ៍នេះទេ។ តែទោះបីជាយ៉ាងណា ទំនាស់ដីធ្លីនៅតំបន់នោះ នៅមិនទាន់បានដោះស្រាយចប់នៅឡើយ ដូច្នេះពលរដ្ឋធ្លាប់រស់នៅកន្លែងណា គឺពួកគាត់មានសិទ្ធិរស់នៅបន្តទៀត មិនមានភាគីណាទៅរំលោភបំពានសិទ្ធិពួកគាត់បានទេ។
លោក បញ្ជាក់ថា៖ «បើភាគីក្រុមហ៊ុនមកឲ្យប្រជាពលរដ្ឋរុះរើផ្ទះទាំងបង្ខំ មែននោះ គឺពិតជាធ្វើខុសច្បាប់ទាំងស្រុងហើយ»។
ពាក់ព័ន្ធ នឹងករណីនេះ លោក ខៀវ សំណាង មេបញ្ជាការរងកងរាជអាវុធហត្ថខេត្ត ព្រះសីហនុ បានប្រាប់ ភ្នំពេញ ប៉ុស្តិ៍ ពីម្សិលមិញថា សមត្ថកិច្ចលោកមានតួនាទី ការពារសុវត្ថិភាព និងរក្សាសន្តិសុខជូនប្រជាពលរដ្ឋ និងការពារមិនឲ្យមានការរំលោភបំពានកាន់កាប់លើដីសម្បទានសេដ្ឋកិច្ចរបស់ក្រុមហ៊ុន ដែលទទួលបានពីការផ្ដល់ប្រទានកម្មពីរាជរដ្ឋាភិបាល។
លោក សំណាង បានថ្លែងថា៖ «យើងគ្រាន់តែហាមឃាត់ មិនឲ្យពួកគាត់សង់លំនៅឋានថ្មីថែមទៀត ដោយហេតុថា លំនៅឋានពួកគាត់ស្ថិតនៅក្នុងគម្រោងដីសម្បទានរបស់ក្រុមហ៊ុន។ ក្រុមអ្នកភូមិដែលបាននិងកំពុងសង់លំនៅឋានជាលក្ខណៈ ខុនដូ ដែលសមត្ថកិច្ចយើងខ្ញុំចុះទៅហាមឃាត់មុននេះ គឺជាសាច់ញាតិរបស់លោកចៅសង្កាត់រង សេង ហ៊ួលាង តែម្ដង។ យើងកំពុងតែសង្ស័យលើគាត់ ថាជាអ្នកនៅពីក្រោយខ្នងក្រុមអ្នកតវ៉ាប្រឆាំងទាំងនោះ»៕