ដោយ៖ តាំង វីដា
ថ្ងៃពុធ ទី6 ខែវិច្ឆិកា ឆ្នាំ2013
http://vodhotnews.com
ស្ថានទូតអាមេរិកប្រចាំកម្ពុជា នឹងរៀបចំវេទិកាពិភាក្សាមួយ នៅថ្ងៃព្រហស្បតិ៍ស្អែកនេះ វេលាម៉ោង ៨ព្រឹក នៅសណ្ឋាគារ Himawari នារាជធានីភ្នំពេញ ដើម្បីឲ្យសិក្ខាកាមយល់ដឹងពីទិសដៅថ្មីៗ ដែលកំពុងមានឡើងសម្រាប់ទីផ្សារការងារ និងការអភិវឌ្ឍន៍សេដ្ឋកិច្ចរបស់ប្រទេសកម្ពុជា។
សេចក្តីប្រកាសព័ត៌មានរបស់ស្ថានទូត ចេញផ្សាយនៅថ្ងៃទី៦ ខែវិច្ឆិកានេះ ឲ្យដឹងថាវេទិកានេះ ក៏មានគោលបំណងចែករំលែកព័ត៌មាន និងទស្សនៈយល់ឃើញពីសារៈសំខាន់នៃការអប់រំ បច្ចេកទេស និងការអប់រំវិជ្ជាជីវៈដែលមានគុណភាពខ្ពស់ និងដើម្បីលើកកម្ពស់ការបណ្តុះបណ្តាលវិជ្ជាជីវៈ និងបច្ចេកទេស តាមរយៈភាពជាដៃគូក្នុងចំណោមស្ថាប័នអប់រំ និងជាមួយក្រុមហ៊ុនជំនួញនានា។
សេចក្តីប្រកាសព័ត៌មាននេះ បន្តថា ឯកអគ្គរដ្ឋទូតសហរដ្ឋអាមេរិក លោក William E. Todd នឹងថ្លែងសុន្ទរកថាបើកវេទិកា ដោយមានវាគ្មិន តំណាងក្រសួងការងារ និងបណ្តុះបណ្តាលវិជ្ជាជីវៈ ក្រសួងអប់រំ សាកលវិទ្យាល័យនៅកម្ពុជា សាកលវិទ្យាល័យរបស់សហរដ្ឋអាមេរិក ក្រុមហ៊ុនក្នុងស្រុក និងក្រុមហ៊ុនអន្តរជាតិ និងធនាគារពិភពលោកចូលរួមផងដែរ៕
សូមសរសេរមកាន់លោក តាំង វីដា តាមរយៈ vida@vodhotnews.com
can I join this seminary if I am a students? I really want to know how American people do? how about they school ? how about their methods of education.