ដោយ៖ បូ សាវី និង អ៊ឹង ប៊ុនថន
ថ្ងៃពុធ ទី6 ខែវិច្ឆិកា ឆ្នាំ2013
http://vodhotnews.com
ស្តាប់សំឡេង៖ |
ចម្លងទុក |
បុគ្គលិកសណ្ឋាគារឡឹមេរីឌានអង្គរ តវ៉ាទាមទារលក្ខខណ្ឌការងារ (រូបថត បូ សាវី)
បុគ្គលិកប្រមាណជាង ១០០នាក់ នៃសណ្ឋាគារ ឡឹមេរីឌាន អង្គរ (Le Meridian Angkor) នៅខេត្ដសៀមរាប នៅព្រឹកថ្ងៃពុធនេះ ផ្ទុះការតវ៉ានៅខាងមុខកន្លែងធ្វើការរបស់ពួកគេ ស្ថិតនៅសង្កាត់ស្លក្រាម ក្រុងសៀមរាប ដើម្បីទាមទារឲ្យអ្នកគ្រប់គ្រងរបស់ខ្លួន ទទួលយកលក្ខខណ្ឌការងារ៣ចំណុច។
បុគ្គលិកម្នាក់ធ្វើការ រយៈពេល៨ឆ្នាំ និងជាសមាជិកសហជីព លោក លី លីនដា ថ្លែងថា ម្ចាស់សណ្ឋាគារ ជាជនជាតិថៃនោះ មានគម្រោងបញ្ចប់កិច្ចសន្យាការងារលោក នៅខែមករាឆ្នាំ២០១៤ ដោយសារ រើសអើងសហជីព។ លោកបន្ដថា ការបញ្ឈប់បែបនេះ ខុសច្បាប់ការងារត្រង់មាត្រា៨៣ ដែលលោកបញ្ជាក់ថា កម្មករ ដែលធ្វើការងារ បានរយៈពេលពី ពីរឆ្នាំឡើងទៅអាចធ្វើការបានដោយស្វ័យប្រវត្តិ ពោលគឺមិនបាច់ចុះកិច្ចសន្យាថ្មីឡើយ លើកលែងតែបុគ្គលនោះមានមានកំហុសឆ្គង ទើបអ្នកគ្រប់គ្រងមានសិទ្ធិបញ្ចប់បាន ៖ "ក្នុងន័យច្បាប់ យើងធ្វើការចាប់ពីពីរឆ្នាំឡើងទៅ គឺយើងគេហៅថា Open contract គឺយើងលែងមានកុងត្រាទៀតហើយ ទោះបីយើងធ្វើប៉ុន្មានទៀតក៏ដោយ បាទ លើកលែងតែយើង បុគ្គលិក កម្មករ នយោជិកគាត់ប្រព្រឹត្ដកំហុសធ្ងន់ណាមួយ ដែលទាក់ទងនឹងមាត្រ៨៣ ច្បាប់ស្ដីពីការងារ បាននិយោជក គាត់មានសិទ្ធិពិចារណា"។
បុគ្គលិកផ្នែកអាហារ និងភេសជ្ជៈ រយៈពេល៨ឆ្នាំដែរ លោក យីង ប៉េង ឲ្យដឹងថា ម្ចាស់សណ្ឋាគារបានបញ្ចប់កិច្ចសន្យាការងាររបស់លោក កាលពីខែសីហា ឆ្នាំ២០១៣នេះ ដោយសារមកធ្វើការយឺត១៥នាទី និងសង្ស័យលោកចូលជាសមាជិកសហជីព ៖ "កំហុសខ្ញុំចុងក្រោយគឺខ្ញុំមក យឺត គឺទាក់ទងនឹងច្បាប់ ខ្ញុំនិយាយជុំសហជិព គាត់ថា កំហុសនេះអត់ត្រូវដេញចេញទេ អត់ត្រូវបញ្ឈប់ទេ ចឹងទៅខ្ញុំទាមទារឲ្យគាត់ជួយ ឲ្យបានធ្វើការវិញ"។
VOD មិនអាចទាក់ទងម្ចាស់សណ្ឋាគារ ឡឺមេរីឌាន អង្គរ ជាជនជាតិថៃបាននៅឡើយទេ។ ប៉ុន្ដែបើតាម អនុប្រធានមន្ទីរការងារ និងបណ្ដុះបណ្ដាលវិជ្ជាជីវៈខេត្តសៀមរាប លោក អ៊ឹង ចំរើន ដែលបានចូលសម្រួលករណីនេះ មានប្រសាសន៍ខ្លីថា អ្នកគ្រប់គ្រងសណ្ឋាគារ នឹងដោះស្រាយរយៈពេល៥ថ្ងៃទៀត ៖ "អត់ទាន់ស្ដាប់បានទេ គេទុកឲ្យពិចារណា៥ថ្ងៃសិន យើងអត់អាចនិយាយបានឡើង" ។
ទោះជាយ៉ាងណា ប្រធានសហព័ន្ធសហជីព កម្មករនិយោជិត វិស័យទេសចរណ៍ និងសេវាកម្មកម្ពុជា ប្រចាំខេត្ដសៀមរាប លោក ម៉ម រិទ្ធី សំគាល់ថា ម្ចាស់ក្រុមហ៊ុនមួយចំនួន នៅខេត្តទេសចរណ៍ តែងគាបសង្កត់បុគ្គលិកគ្រប់រូបភាព ដោយសារបុគ្គលិកទាំងនោះចូលជាសមាជិកសហជីព។ លោកព្រមានថា នឹងធ្វើការតវ៉ាម្ដងទៀត នៅចុងខែវិច្ឆិកា ឆ្នាំ២០១៣ បើសិនមិនដំណោះស្រាយ ៖ "គាត់ធ្វើការតែម្នាក់គាត់ ជាមួយសហជីព តទល់គ្នា បើមិនបានចំណុះគាត់ទេ គ្រប់វិធីសាស្រ្ដដើម្បីយកឈ្នះគ្នាទៅវិញទៅមក បើនិយាយពីភាពជាក់ស្ដែងគ្នាមែនទែន ស្ទើតែ៧០ ទៅ៨០ភាគរយហើយ រាល់ថ្ងៃគឺមានការគាបសង្កត់ផ្លូវចិត្ដ ដូចជា កិច្ចផ្សេងៗហ្នឹង គឺទាល់តែ៧០ភាគរយ ហើយបើសិនជាអ្នកចូលសហជីព អ្នកដែលត្រៀមចូលសហជីពអីហ្នឹង មានបញ្ហាជាមួយថៅកែទាំងអស់ គឺគំរាមកំហែងបញ្ឈប់ គំរាមកំហែងទម្លាក់ដំណែង ការប្រាក់ខែ ឫក៏ប្រើវិធីសាស្ដ្រផ្សេងៗ កុំឲ្យពួកគាត់ចូលរួមជាមួយសហជីព បង្កើតសហជីពបាន "។
លក្ខខណ្ឌការងារទាំង៣ចំណុច ដែលបុគ្គលិកទាមទារនោះ រួមមាន ឲ្យម្ចាស់សណ្ឋាគារទទួលយកបុគ្គលិក២នាក់ចូលធ្វើការវិញ មានឈ្មោះ លី លីនដា និងឈ្មោះ យីង ប៉េង និងទាមទារឲ្យបញ្ចប់អ្នកគ្រប់គ្រងផ្នែកវិស្វកម្មម្នាក់ទៀត ឈ្មោះ ស្រួយ សុខុម ដែលក្រុមអ្នកតវ៉ា អះអាងថា អ្នកគ្រប់គ្រងផ្នែកនោះ បង្កបញ្ហាញឹកញាប់ បន្ទាប់ពីចូលបម្រើការងារនៅទីនោះបាន៨ខែ៕
សូមសរសេរមកកាន់ លោក បូ សាវី តាមរយៈ savy@vodhotnews.com