ដោយ៖ ពៅ មេត្តា
ថ្ងៃព្រហស្បតិ៍ ទី7 ខែវិច្ឆិកា ឆ្នាំ2013
http://vodhotnews.com
ក្រសួងធនធានទឹក និង ឧតុនិយម អំពាវនាវឲ្យប្រជាជនរស់នៅរាជធានីភ្នំពេញ និងតាមបណ្តាខេត្តមួយចំនួន បង្កើនការប្រុងប្រយ័ត្ន ចំពោះគ្រោះថ្នាក់ជាយថាហេតុ ដែលបង្កដោយ ខ្យល់ព្យុះក្រសាចាប់ពីថ្ងៃទី០៦ ដល់ថ្ងៃទី០៩ខែវិច្ឆិកា។
សេចក្តីជូនដំណឹងរបស់ក្រសួងធនធានទឹក និង ឧតុនិយម ចេញផ្សាយថ្ងៃទី០១ខែវិច្ឆិកា បានឲ្យដឹងថា ខ្យល់ព្យុះឈ្មោះក្រសា បោកបក់ពីសមុទ្រចិនខាងត្បូងមកដល់កម្ពុជានៅថ្ងៃទី០៦ដល់ថ្ងៃទី០៩ខែវិច្ឆិកា។ សេចក្តីជូនដំណឹងបានបញ្ជាក់ថា ខ្យល់ព្យុះអាចបោកបក់ប៉ះខេត្តក្រុងមួយចំនួនដូចជា រាជធានីភ្នំពេញ ព្រៃវែង ស្វាយរៀង ពោធិ៍សាត់ បាត់ដំបង តាកែវ កណ្តាល កំពង់ធំ កំពង់ឆ្នាំង បន្ទាយមានជ័យ សៀមរាប កំពត កែប និងព្រះសីហនុ។
ក្រសួងធនធានទឹក និង ឧតុនិយម អំពាវនាវឲ្យ មន្ត្រីក្រសួងស្ថាប័នពាក់ព័ន្ធមានការប្រុងប្រយ័ត្ន ពិសេសអ្នកនេសាទ និងអ្នកធ្វើដំណើរតាមផ្លូវសមុទ្រ ដើម្បីបញ្ចៀសគ្រោះថ្នាក់ ដែលអាចកើតឡើងជាយថាហេតុ៕
សូមសរសេរមកកាន់លោក ពៅ មេត្តា តាមរយៈ minpov@vodhotnews.com