ដោយ៖ បូ សាវី និង អ៊ឹង ប៊ុនថន
ថ្ងៃព្រហស្បតិ៍ ទី7 ខែវិច្ឆិកា ឆ្នាំ2013
http://vodhotnews.com
ប្រជាពលរដ្ឋដែលមានទំនាស់ដីធ្លីជាង២០នាក់ ក្នុងចំណោម ៦៥គ្រួសារ នៅស្រុកគូលេន ខេត្ដព្រះវិហារ បានប្រមូលផ្តុំគ្នានៅខាងមុខតុលាការខេត្ដ ដោយបារម្ភខ្លាចតុលាការឃុំខ្លួន តំណាងរបស់ពួកគេ បីនាក់ដែលត្រូវបានកោះហៅ សាកសួរ នៅព្រឹកថ្ងៃព្រហស្បតិ៍នេះ។
សកម្មជនដីធ្លី នៅភូមិគូលេនត្បូង ឃុំគូលេនត្បូង លោក ឈាន លឿប ប្រាប់VODថា តុលាការខេត្ដព្រះវិហារ បានកោះហៅតំណាងពួកគេបីនាក់ទៅបំភ្លឺ ពីបទរុករានដីព្រៃរដ្ឋខុសច្បាប់ តែពួកគេជាង២០នាក់ មកស្ដាប់ការសាកសួរនោះ ដើម្បីជួយជាកម្លាំងចិត្ដ និងបារម្ភខ្លាចតុលាការឃុំខ្លួនតំណាងបីនាក់មាន លោក វ៉េង អ៊ាម លោក ង៉ូយ យាន និងអ្នកស្រីហ៊ួន គឹមអៃ ៖
ពលរដ្ឋមួយរូបទៀត លោក យ៉ាប់ ផៃ ឲ្យដឹងថា ការដែលពួកគេឡើងមកទីរួមខេត្តនេះ ក៏ចង់ជំរុញឲ្យអភិបាលរងខេត្ដ លោក អ៊ុន ចិន្ដា ដោះស្រាយដីជូនពួកគាត់ទៅតាមការសន្យា កាលពីមុនពេលបោះឆ្នោតជាតិអាណត្ដិទី៥នេះ ៖
VOD មិនអាចទាក់ទងអភិបាលរង ខេត្ដព្រះវិហារ លោក អ៊ុន ចិន្ដា បាននៅឡើយ។ ប៉ុន្ដែកន្លងមកលោកធ្លាប់មានប្រសាសន៍ថា អាជ្ញាធរខេត្ដ បានសម្របសម្រួលជាមួយដើមបណ្ដឹង គឺផ្នែកខណ្ឌរដ្ឋបាលព្រៃឈើខេត្ដឲ្យដកពាក្យបណ្ដឹងលើពលរដ្ឋទាំងនោះហើយ ៖
ដោយឡែក ចៅក្រមស៊ើបសួរ នៃសាលាដំបូងខេត្ដព្រះវិហារ លោក សោ សាវុធ ក៏មិនអាចទាក់ទងបានដែរ។
កាលពីថ្ងៃទី២៨ ខែតុលា ឆ្នាំ២០១៣នេះ ប្រជាពលរដ្ឋជាង៤០នាក់ តំណាងឲ្យ៦៥គ្រួសារនោះ បានតវ៉ានៅសាលាខេត្ដព្រះវិហារ សុំឲ្យអាជ្ញាធរដោះស្រាយទំនាស់ដីធ្លី ជាមួយខណ្ឌរដ្ឋបាលព្រៃឈើខេត្ដ ក្រោយពីចៅក្រមស៊ើបសួរ ចេញដីកាកោះហៅទៅបំភ្លឺនៅថ្ងៃទី៧ ខែវិច្ឆិការនេះ។ ពេលនោះ អាជ្ញាធរខេត្តបានសន្យាថា នឹងសុំឲ្យរដ្ឋបាលព្រៃឈើដកពាក្យបណ្ដឹងលើពលរដ្ឋទាំងនោះវិញ ប៉ុន្តែតុលាការនៅតែបន្តនីតិវិធីកោះហៅទៅសាកសួរដដែល។
អ្នកសម្របសម្រួលសមាគមការពារសិទ្ធិមនុស្ស អាដហុក ប្រចាំខេត្ដព្រះវិហារ លោក ឡោ ចាន់ ធ្លាប់មានប្រសាសន៍ថា អាជ្ញាធរគួរសម្របសម្រួលទំនាស់ដីធ្លី តាមការសន្យារបស់ខ្លួន ដើម្បីឲ្យពលរដ្ឋមានជំនឿចិត្ដ បើទោះបីពលរដ្ឋទាំងនោះកាន់កាប់ដីរដ្ឋក្រោយច្បាប់ភូមិបាលចូលជាធរមានក៏ដោយ៕
សូមសរសេរមកកាន់ លោក បូ សាវី តាមរយៈ savy@vodhotnews.com