ដោយ៖ តាំង វីដា និង អ៊ឹង ប៊ុនថន
ថ្ងៃសុក្រ ទី8 ខែវិច្ឆិកា ឆ្នាំ2013
http://vodhotnews.com
លោកនាយករដ្ឋមន្ត្រី ហ៊ុន សែន(រូបភាពពី ហ្វេសប៊ុក)
រដ្ឋាភិបាលកម្ពុជា អំពាវនាវជាថ្មី ដល់ប្រជាពលរដ្ឋ និងកងទ័ពការពារតាមព្រំដែនខ្មែរ-ថៃ បន្តរក្សាភាពស្ងប់ស្ងាត់ និងអត់ធ្មត់ ខណៈដែលតុលាការអន្តរជាតិក្រុងឡាអេនឹងបកស្រាយសាលដីកា រឿងក្តីប្រាសាទព្រះវិហារឡើងវិញ នៅថ្ងៃទី១១ ខែវិច្ឆិកានេះ។
សេចក្តីថ្លែងការណ៍ចុះថ្ងៃទី៧ ខែវិច្ឆិកា ឆ្នាំ២០១៣ ជាវីដេអូផ្ទាល់មាត់របស់លោកនាយករដ្ឋមន្ត្រី ហ៊ុន សែន រយៈពេលជាង ១០នាទី បានឲ្យដឹងថា ទំនាស់នៅព្រំដែនប្រាសាទព្រះវិហារ កើតឡើងដោយសារតែការបកស្រាយផ្សេងគ្នា លើសាលដីកា ឆ្នាំ១៩៦២ ហើយការដែលកម្ពុជា ស្នើសុំឲ្យតុលាការយុត្តិធម៌អន្តរជាតិ បកស្រាយសាលដីកាឆ្នាំ១៩៦២នេះ គឺមិនមែន ដើម្បីដុតបំពកបន្ថែមនូវជម្លោះ ឬមហិច្ឆិតាដណ្តើមទឹកដី ពីប្រទេសជិតខាងនោះទេ។ តែលោកថា ចំណាត់ការនេះ ជាមធ្យោបាយមួយប្រកបដោយប្រសិទ្ធភាព និងចាំបាច់បំផុត ដើម្បីឲ្យភាគីទាំងពីរអាចឈានទៅបញ្ចប់បញ្ហា បានដោយសន្តិវិធី ក្នុងស្មារតីគោរពច្បាប់អន្តរជាតិ អធិបតេយ្យជាតិ បូរណភាពទឹកដីទៅវិញទៅមក និងរក្សាទំនាក់ទំនងជាអ្នកជិតខាងល្អ ៖ "ខ្ញុំព្រះករុណាខ្ញុំ ក៏សូមអំពាវនាវដល់ព្រះថេរានុត្ថេរៈគ្រប់ព្រះអង្គ បងប្អូនជនរួមជាតិគ្រប់រូប សូមមេត្តាបន្តរក្សាភាពស្ងប់ស្ងៀម បន្តចូលរួមរក្សាសន្តិសុខ និងសណ្តាប់ធ្នាប់សាធារណៈនៅក្នុងប្រទេស ក៏ដូចជាបន្តរក្សានិងលើកកម្ពស់ស្មារតីនៃទំនាក់ទំនងជាអ្នកជិតខាងល្អ សាមគ្គីភាព មិត្តភាព ភាពសុខដុមរមនា និងកិច្ចសហប្រតិបត្តិការ កាន់តែជិតស្និតរវាងប្រទេសនិងប្រជាជនទាំងពីរកម្ពុជា-ថៃ"។
កាសែតបាងកកប៉ុស្តិ៍ នៅថ្ងៃសុក្រនេះ បានស្រង់ប្រភពពីកងអង្គភាពមួយនៃកងទ័ពថៃដែលមានឈ្មោះថា កងកម្លាំងប្រតិបត្តិការ Suranaree មកពីកងអង្គភាពតំបន់ភូមិភាគ២ បានអះអាងថា កម្ពុជាបានបញ្ជូនទ័ពដាក់ពង្រាយនៅតាមព្រំដែនក្បែរប្រាសាទព្រះវិហារ និងបានបញ្ជូនស្បៀងជាច្រើន ទៅដល់ទីតាំងឈរជើងរបស់កងទ័ពរបស់ខ្លួន ដើម្បីជួយផ្គត់ផ្គង់កងទ័ពនឹងគ្រួសាររបស់កងទ័ព។
ប៉ុន្តែ អភិបាលរងខេត្តព្រះវិហារ លោក អ៊ុន ចិន្តា បដិសេធការលើកឡើងនេះ ដោយថា កម្ពុជា មិនបានបញ្ជូនទ័ពបន្ថែមទៅទេ គឺមានតែកងកម្លាំងប្រដាប់អាវុធ ដែលឈរជើងស្រាប់ពីមុនតែប៉ុណ្ណោះ។ លោកឲ្យដឹងថា ភាគីថៃទៅវិញទេ ដែលបានកំពុងបង្កនូវភាពចលនា តាមរយៈការចល័តទ័ព និងជម្លៀសប្រជាពលរដ្ឋរបស់ខ្លួនចេញពីតំបន់ព្រំដែន ដែលករណីនេះ បានបង្កការភិតភ័យខ្លះដល់ប្រជាពលរដ្ឋកម្ពុជា ៖
ករណីរឿងក្តីប្រាសាទព្រះវិហារនេះ ប្រធានអង្គការស្រាវជ្រាវជាតិកម្ពុជា លោក ហៀង រិទ្ធី ពន្យល់ថា តាមនីតិវិធីច្បាប់ជាតិ និងអន្តរជាតិ កម្ពុជាគប្បីប្តឹងករណីនេះ ទៅកាន់អង្គការសហប្រជាជាតិ ចាត់វិធានការទៅលើប្រទេសថៃឲ្យអនុវត្តសាលដីកា ឆ្នាំ១៩៦២ ជាជាងការស្នើបកស្រាយសាលដីកាឡើងវិញ ដែលនាំឲ្យខាតបង់ពេលវេលា និងផលប្រយោជន៍ជាតិ ៖
ការដែលតុលាការអន្តរជាតិក្រុងឡាអេ (ICJ) បកស្រាយសាលដីកាឆ្នាំ១៩៦២ឡើងវិញនេះ ដោយសារថៃអះអាងថា ដីទំហំ ៤,៦គីឡូម៉ែត្រក្រឡា នៅតំបន់ប្រាសាទព្រះវិហារជារបស់ខ្លួន ប៉ុន្តែកម្ពុជាបានទាមទារតុលាការអន្តរជាតិនេះ បកស្រាយឡើងវិញ។ នាយករដ្ឋមន្ត្រីថៃ លោកស្រី យីងឡាក់ ក៏ធ្លាប់ប្រកាសឲ្យប្រជាពលរដ្ឋ និងកងទ័ពរបស់ខ្លួន ទទួលយកសេចក្តីសម្រេចរបស់តុលាការអន្តរជាតិនេះផងដែរ៕
សូមសរសេរមកកាន់ លោក តាំង វីដា តាមរយៈ vida@vodhotnews.com
នេះហើយជាល្បិចយកសម្លេងឆ្នោតតាមយោបល់បង ថាក់ស៊ីនស៊ីណាវ៉ាត្រា របស់លោកហ៊ុនសែន តែវា បានក្លាយទៅជាដំបៅមហារីកទៅវិញ……….
អាតួសំដែងអត់មានអ្នកជួលអើយ បើរឿងជាមួយថៃវាចេញមុខ ចេញមាត់ណាស់ តែបើរឿងជាមួយ
ពួកអាយួនវាគ្មានអើតក្បាលទេ រហូតចេញមុខកាត់កោះត្រល់អោយគេ។