ដោយ៖​ សុទ្ធ គឹម​សឿន​
ថ្ងៃចន្ទ ទី16 ខែធ្នូ ឆ្នាំ2013
http://vodhotnews.com

ប្រជាសហគមន៍មកពីខេត្តមណ្ឌលគិរី កំពុងអ​ធិប្បាយ​អត្ថន័យ​ក្នុង​រូប​ភាព​(រូបថតដោយ សុទ្ធ គឹមសឿន)​

​អង្គការ​អភិវឌ្ឍន៍​សំឡេង​សហគមន៍ ​(BCV)​ នៅ​ថ្ងៃ​ចន្ទ​នេះ ដាក់​តាំងពិព័រណ៍​រូបថត​សហគមន៍​សម្រាប់​រយៈពេល​ពីរ​ថ្ងៃ ចាប់ពី​ថ្ងៃ​ទី​១៦ ​ដល់ ​ថ្ងៃ​ទី​១៧​ ខែ​ធ្នូ ​នៅ​មជ្ឈមណ្ឌល​សហប្រ​តិ​បត្តិ​ការ​កម្ពុជា-កូរ៉េ​(CKCC) ដើម្បី​ផ្ដល់​ឱកាស​ដល់​អ្នកស្ម័គ្រចិត្ត​ផលិត​ព័ត៌មាន​សហគមន៍ បាន​បញ្ចេញ​ស្នាដៃ​ថតរូប​របស់​ពួកគេ​។​

​អ្នកស្ម័គ្រចិត្ត​ផលិត​ព័ត៌មាន​សហគមន៍ បាន​បញ្ចេញ​ស្នាដៃ​ថតរូប តាមរយៈ​រូបថត​សម្រាំង​ក្រោម​ប្រធានបទ​«​សហគមន៍​ខ្ញុំ​»​។ ​ក្នុង​ការតាំងពិព័រណ៍​នេះ រូបថត​សហគមន៍​មាន​ប្រមា​ណ​​៥០ មកពី​២៤​ខេត្ត និង​ក្រុង​ទូទាំង​ប្រទេស​កម្ពុជា បាន​ចូលរួម​។

​តំណាង​សហគមន៍​និមួយៗ បាន​ដាក់​តាំង​បង្ហាញ​រូបថត ដែល​ខ្លួន​បាន​ថត ដើម្បី​ប្រកួតប្រជែង​យក​ជ័យលាភី​។ ​អត្ថន័យ​នៃ​រូបថត​និមួយៗ ឆ្លុះបញ្ចាំង​ផលវិបាក និង​បញ្ហា​ដែល​សហ​គ​មន៍​កំពុង​ជួបប្រទះ​ដូចជា​៖ បញ្ហា​រំលោភ​ដីធ្លី បណ្ដេញ​ប្រជាពលរដ្ឋ​ចេញពីផ្ទះ កាប់បំផ្លាញ​ព្រៃឈើ នេសាទ​ខុសច្បាប់ និង​កម្មវិធី​អប់រំ ប្រជាពលរដ្ឋ​តាម​មូលដ្ឋាន​ទទួលជោគជ័យ​។​

​មន្ត្រី​សម្របសម្រួល​កម្មវិធី​ផ្នែក​គាំទ្រ​ព័ត៌មាន​សហគមន៍​នៃ​អង្គការ​អភិវឌ្ឍន៍​សំឡេង​សហគមន៍ លោក រ៉​ន សុភ័ក្រ​បញ្ញា មានប្រសាសន៍ថា ការ​ដាក់​តាំងពិព័រណ៍​នេះ ជា​លើក​ទី​១​សម្រាប់​អង្គការ ដើម្បី​លើកកម្ពស់​ ការផលិត និង​ផ្សព្វផ្សាយ​ព័ត៌មាន​តាម​សហគមន៍ ដល់​អ្នកជំនាញ​ថតរូប ជំនាញ​ថត​សំឡេង ជំនាញ​សរសេរ​ព័ត៌មាន និង​ធ្វើ​បទសម្ភាសន៍ រាយ​ការណ៍​ព័ត៌មាន​ជូន​ថ្នាក់លើ ​ពេល​ដែល​នៅក្នុង​សហគមន៍​របស់​ខ្លួន​មាន​បទល្មើស​ផ្សេងៗ​។​

​ចាប់តាំងពី​ពាក់កណ្ដាល​ឆ្នាំ​២០០៨​រហូតមកដល់​បច្ចុប្បន្ន ប្រជា​សហគមន៍​ជាង​ ៣០០​នាក់​ត្រូវបាន​បណ្ដុះបណ្ដាល​លើ​ជំនាញ​ប្រមូល​ព័ត៌មាន ផលិត​ព័ត៌មាន ថតរូប ថត​សំលេង សរ​សេរ​ព័ត៌មាន និង​ជំនាញ​កុំព្យូទ័រ ជំនាញ​ផលិត​ខិតប័ណ្ណ​ផ្សព្វផ្សាយ ជំនាញ​ផលិត​កម្មវិធី​វិទ្យុ និង​ល្ខោន​វិទ្យុ​ជា​ដើម​៕

(រូបភាពពី ឡាយ សាមាន)​

​សរសេរ​មកកាន់​លោក សុទ្ធ គឹម​សឿន តាមរយៈ keomsoeunsoth@gmail.com