ដោយ៖ ស៊ុន ណារិន
ថ្ងៃព្រហស្បតិ៍ ទី19 ខែធ្នូ ឆ្នាំ2013
http://vodhotnews.com
មូលនិធិសកល (Global Fund) បានដាក់កំហិតក្រសួងសុខាភិបាលឲ្យផ្តល់ប្រាក់ប្រមាណជា៤៧ម៉ឺនដុល្លារ មកមូលនិធិវិញ ក្នុងរយៈពេល៣០ថ្ងៃ បន្ទាប់ពីរកឃើញថា គម្រោងលើផ្នែកសុខភាពមួយចំនួន មានជាប់ពាក់ព័ន្ធនឹងអំពើពុករលួយ។
ក្នុងលិខិតមួយ ដែលចុះកាលបរិច្ឆេតកាលពីថ្ងៃទី៩ខែធ្នូ ឲ្យដឹងថា មូលនិធិសាកល ស្នើក្រសួងសុខាភិបាល ឲ្យផ្តល់ប្រាក់វិញចំនួន ៤១០៧១២ដុល្លារ ដែលពាក់ព័ន្ធនឹងគម្រោងរបស់មជ្ឈមណ្ឌលជាតិប្រយុទ្ធនឹងជំងឺគ្រុនចាញ់ ប៉ារ៉ាស៊ីតសាស្ត្រ បាណកសាស្ត្រ ប្រាក់ ៤១៤០៤ដុល្លារ វិញ ដែលជាប់ពាក់ព័ន្ធនឹងគម្រោងមជ្ឈមណ្ឌលជាតិប្រយុទ្ធនឹងជំងឺអេដស៍សើស្បែក និងកាមរោគ (NCHARDS) និងប្រាក់ ២០៧២៥ដុល្លារ ដែលជាប់ពាក់ព័ន្ធនឹងគម្រោងអង្គការមេឌីខាំ (MEDiCAM)។
លិខិតរបស់មូលនិធិសកល ដែលបានផ្ញើជូនរដ្ឋមន្ត្រីក្រសួងសុខាភិបាល លោក ម៉ម ប៊ុនហេង បានដាក់កំហិតថា អង្គការនឹងទុកពេល៣០ថ្ងៃក្នុងការផ្តល់លុយមកវិញតាមធនាគារ ដោយព្រមានថា ប្រសិនបើមិនមានការផ្តល់ថវិកាមកវិញតាមការកំណត់ទេ លទ្ធផលមួយចំនួនអាចកើតឡើង។ ចំណុច ដែលព្រមាននោះ រួមមាននឹងមិនដំណើរការចុះហត្ថលេខាជាមួយកម្ពុជា ទៅលើជំនួយលើជំងឺគ្រុនចាញ់តម្លៃ១៥លានដុល្លារ ហើយជំនួយប្រមាណជា២០៩៧៤២០៥,៧៣ដុល្លារ នឹងត្រូវព្យួរទាំងអស់ ឬមួយភាគ។មូលនិធិសកល ក៏បានព្រមានថា នឹងមិនដំណើរការការចុះហត្ថលេខាលើការអនុវត្តទីពីរនៃជំនួយសម្រាប់ជំងឺអេដស៍តម្លៃប្រហែលជា៥៧៦៦៣០៧៥ដុល្លារ ប្រសិនបើមិនមានការផ្តល់ថិវកាមកវិញ តាមការដាក់កំហិត។ មូលនិធិ ក៏បានព្រមានថា ជំនួយសម្រាប់លើជំងឺគ្រុនចាញ់ ដំណាក់កាលទីពីរ តម្លៃ១២៦៣៧៥៣៣ ក៏នឹងអាចត្រូវកាត់បន្ថយដោយប្តូរទៅជាការផ្តល់សេវាសំខាន់តែប៉ុណ្ណោះ។
របាយការណ៍មួយចេញដោយមូលនិធិសកល ថ្ងៃទី១៤ ខែវិច្ឆិកា ឆ្នាំ២០១៣ បង្ហាញថា មន្ត្រីជាន់ខ្ពស់នៃមជ្ឈមណ្ឌលជាតិប្រយុទ្ធនឹងជំងឺគ្រុនចាញ់ ប៉ារ៉ាស៊ីតសាស្ត្រ បាណកសាស្ត្រ (CNM) និងមជ្ឈមណ្ឌលជាតិប្រយុទ្ធនឹងជំងឺអេដស៍សើស្បែក និងកាមរោគ(NCHARDS) ដែលស្ថិតនៅក្រោមចំណុះក្រសួងសុខាភិបាល ព្រមទាំងអង្គការមេឌីខាំជាបណ្តាញអង្គការក្រៅរដ្ឋាភិបាលដ៏ធំមួយ បានចូលរួមក្នុងបណ្តាញប្រព្រឹត្តអំពើពុករលួយមួយ ថែមទាំងទាមទារលើសការចំណាយជាក់ស្តែងដល់ទៅពីរ ឬបីដងទៀតផង។
របាយការណ៍នេះ បានស៊ើបអង្កេតលើប្រាក់ជំនួយរបស់មូលនិធិ ចំនួនជាង៨០លានដុល្លារអាមេរិក ដែលផ្តល់មកឲ្យស្ថាប័នចំណុះក្រសួងសុខាភិបាល រកឃើញនូវភស្តុតាងសំខាន់ៗជាច្រើន ដែលបញ្ជាក់ថា ការដេញថ្លៃមួយចំនួនមានភាពមិនប្រក្រតី ការកិបកេងប្រាក់ជំនួយ និងការប្រើប្រាស់ប្រាក់ជំនួយខុសគោលដៅ។
របាយការណ៍ បន្តថា អតីតប្រធានមជ្ឈមណ្ឌលជាតិ ប្រយុទ្ធជំងឺគ្រុនចាញ់ ប៉ារ៉ាស៊ីតសាស្ត្រ និងបាណកសាស្ត្រ លោក ឌួង សុជាតិ និងសហការីម្នាក់ បានទទួលប្រាក់សាគុណចំនួនជិត ៥សែនដុល្លារ ពីក្រុមហ៊ុនផ្គត់ផ្គង់មុងឈ្មោះ វេសតើហ្គាត ហ្វ្រេនសិន (Vestergaard Frandsen) របស់ប្រទេសស្វីស និងក្រុមហ៊ុន Sumitomo របស់ប្រទេសសិង្ហបុរី។ របាយការណ៍ថា ប្រាក់សាគុណជូនមន្ត្រីទាំងនេះជាថ្នូរនឹងកិច្ចសន្យាជាមួយក្រសួង សុខាភិបាល។
VOD មិនទាន់អាចទាក់ទងលោក ម៉ម ប៊ុនហេង ដើម្បីសុំការអត្ថាធិប្បាយលើបញ្ហានេះ បាននៅឡើយទេ។
អតីតប្រធានមជ្ឈមណ្ឌលជាតិប្រយុទ្ធនឹងជំងឺគ្រុនចាញ់ ប៉ារ៉ាស៊ីតសាស្ត្រ បាណកសាស្ត្រ លោក ឌួង សុជាតិ ធ្លាប់ប្រាប់VODថា របាយការណ៍មូលនិធិសកល ដែលចោទប្រកាន់ថា អំពើពុករលួយបានកើតឡើង ក្នុងដំណើរការដេញថ្លៃនោះ គឺត្រូវបានបោះពុម្ពតែមួយចំហៀងប៉ុណ្ណោះ មិនបានលើកឡើងពីសកម្មភាពទាំងស្រុងនោះទេ។ លោកថា ការពិតនោះ ការដេញថ្លៃធ្វើឡើងយ៉ាងត្រឹមត្រូវ និងថោកបំផុត ដែលនាំឲ្យក្រុមហ៊ុនទាំងពីរនោះ ទទួលបានសិទ្ធិផ្គត់ផ្តង់ ហើយលោកមិនបានកេងប្រវ័ញ្ច ឬទទួលប្រាក់កម្រៃជាថ្នូរនៃកិច្ចសន្យាពីក្រុមហ៊ុនទាំងនោះទេ ៖ "ឯកសារដេញ ថ្លៃដែលទទួលស្គាល់ដោយមូលនិធិសកលខ្លួនឯងហ្នឹង ដែលថា មាននីតិវិធីត្រឹមត្រូវហើយ ចុះមកពិនិត្យ ឈរមើលការដេញថ្លៃហ្នឹងគាត់អត់ព្រមផ្សាយ ផ្សាយតែមួយចំហៀងដល់ពេលចឹងធ្វើឲ្យម្នាក់យល់ច្រឡំថា ខ្ញុំនេះគឺ ទទួលលុយគេ តាមពិតដេញថ្លៃហ្នឹងត្រឹមត្រូវហើយថោក មែនទែន យើងដេញពីតម្លៃថ្លៃមកទាប អញ្ចឹងទៅជាថា ខ្ញុំនេះកេញប្រវ័ញ្ច យកលុយប្រាក់ចំណេញ ដែលអ្នកច្រឡំ ថា ឲ្យតែកុំម៉ុយស្យុង សុទ្ធតែប្រាក់បំប៉ោង តាមពិតប្រាក់ហ្នឹងចុះថ្លៃមែនទែន " ។
កាលពីថ្ងៃទី១៧ ខែវិច្ឆិកា ក្រសួងសុខាភិបាលចេញសេចក្តីថ្លែងការណ៍ថា ក្រសួងមិនបានដឹងពីសកម្មភាពរបស់បុគ្គលពុករលួយទាំងអស់ក្នុងពេល អនុវត្តគម្រោង ដែលប្រើប្រាស់មូលនិធិសកលឡើយ។ ក្រសួងទម្លាក់កំហុសលើភាគីទាំងអស់ដែលពាក់ព័ន្ធថា ជាអ្នកទទួលខុសត្រូវដោះស្រាយបញ្ហានេះ៕
សូមសរសេរមកកាន់ លោក ស៊ុន ណារិន តាមរយៈ sun_narin@vodhotnews.com
Tags: ពុករលួយ – ក្រសួងសុខាភិបាល – មូលនិធិសកល
2669
ពលរដ្ឋនៅភ្នំពេញថ្មីបិទផ្លូវ៩២កែងផ្លូវហាណូយមិនឲ្យរថយន្តធុនធំធ្វើចរាចរណ៍ឆ្លងកាត់
ថ្ងៃទី19 ធ្នូ 2013, ម៉ោង 05:23 PM
ប្រជាពលរដ្ឋប្រមាណជា៤០នាក់ រស់នៅភូមិត្រពាំងស្វាយ សង្កាត់ភ្នំពេញថ្មី ខណ្ឌសែនសុខ រាធានីភ្នំពេញ នៅព្រឹកថ្ងៃព្រហស្បិ៍នេះ បាននាំគ្នាបិទផ្លូវលេខ៩២ កែងនឹងផ្លូវហាណូយ មិនឲ្យរថយន្តធុនធំ ធ្វើចរាចរណ៍ ដោយសារហេតុផលណ្តាលឲ្យខូចខាតផ្លូវប៉េតុង និងប៉ះពាល់ដល់ការរកស៊ី។
ប្រជាពលរដ្ឋរងគ្រោះ អ្នកស្រី ស៊ឹម សុភាព អាយុ៤៨ ប្រាប់VODថា ជារៀងរាល់ថ្ងៃ រថយន្តធុនធំដឹកស្ករស ដឹងដី និងដឹកជ្រូក ទម្ងន់ប្រហែល៣០តោន បើកបរលើផ្លូវនោះ ហើយពេលខ្លះបង្កគ្រោះថ្នាក់ជាយថាហេតុទៀតផង។ អ្នកស្រីបន្តថា ការបិទផ្លូវនេះ ធ្វើឡើងក្នុងគោលបំណងមិនឲ្យរថយន្តធុនធំ ធ្វើចរាចរណ៍ឆ្លងកាត់ និងជាការស្នើឲ្យអាជ្ញាធរពាក់ព័ន្ធ ជួសជុលឡើងវិញ ៖ “ប្រជាពលរដ្ឋទ្រាំយូរហើយ កាលពីផ្លូវនេះនៅស្អាតទាំងអស់ ហើយឡានគ្រប់ចម្រុះទាំងអស់ ដឹកដី ដីទៅផ្លូវនេះ អញ្ជឹងដល់ពេលថ្ងៃទី១នេះ ពូនេះគាត់រងគ្រោះ គាត់អង្គុយលើកៅអី ដុំថ្មឡានដឹកដីមក ខ្ទាតមកផាំង ដាច់កៅអី ដាច់ធ្មិលតែម្តង ហើយខ្ទាតរហូតដល់បុកនឹងជញ្ជាំង ទ្វារនេះកំប៉ិត អញ្ជឹងប្រជាពលរដ្ឋមានកំហឹង បើមានសហគមន៍គាត់ចូលរួមទាំងអស់គ្នា ទៅជាបិទផ្លូវ”។
តុលាការខេត្តកណ្តាលចេញដីកាឲ្យសមត្ថកិច្ចស៊ើបអង្កេតរកព្រះសុវណ្ណកោដ្ឋ
ថ្ងៃទី19 ធ្នូ 2013, ម៉ោង 05:27 PM
សាលាដំបូងខេត្តកណ្ដាល នៅព្រឹកថ្ងៃព្រហស្បតិ៍នេះ បានចេញដីកាបង្គាប់ឲ្យសមត្ថកិច្ចគ្រប់ថ្នាក់ស៊ើបអង្កេតរកព្រះសុវណ្ណកោដ្ឋតម្កល់បរមសារីរិកធាតុព្រះពុទ្ធ ដែលបានបាត់ពីព្រះសក្យមុនីចេតិយនៅលើភ្នំព្រះរាជទ្រព្យ ឬភ្នំឧត្តុង្គ កាលពីរំលងអាធ្រាត្រឈានចូលថ្ងៃទី១០ ខែធ្នូ។
ចៅក្រមស៊ើបសួរតុលាការខេត្តកណ្តាល លោក លឹម សុគន្ថា ឲ្យដឹងថា តុលាការបានបង្គាប់ឲ្យសមត្ថកិច្ចគ្រប់ថ្នាក់ ត្រួតពិនិត្យតាមច្រកព្រំដែនទាំងអស់។ លោកថា លោកបានហាមសាធារណជនចូលទៅទីតាំងព្រះសក្យមុនីចេតិយ ៖ “គាត់ស៊ើបអង្កេតទូទាំងប្រទេសរកសាក្សីណាដែលគាត់យល់ថា មានប្រយោជន៍គាត់សួរអីសួទៅ ឆែកឆេកន្លែងណាចាំបាច់ ហើយយើងទាប់ស្កាតតាមច្រកទ្វាព្រំដែន ករណីដែលសង្ស័យចល័តរឿងគ្រឿងមាស សុវណ្ណកោដ្ឋអីចឹងណាស់” ។
លោក បន្ថែមថា រហូតមកដល់ថ្ងៃនេះ តុលាការមិនទាន់រកឃើញតម្រុយនៃការលួចព្រះបរមសារីរិកធាតុទេ។ លោកថា នៅថ្ងៃស្អែកនេះ លោកនឹងសាកសួរជនសង្ស័យទាំង៥នាក់ ជាឆ្នាំយាមនៅទីនោះ ដែលត្រូវបានឃុំខ្លួនដោយតុលាការ។
សង្គមស៊ីវិលស្នើឲ្យលោក ហ៊ុន សែន ពិចារណាពីផលប៉ះពាល់នៃការសង់ទំនប់អគ្គីសនី “ឆាយអារ៉ែង”
ថ្ងៃទី19 ធ្នូ 2013, ម៉ោង 05:11 PM
សង្គមស៊ីវិល ស្នើឲ្យលោកនាយករដ្ឋមន្ត្រី ហ៊ុន សែន ពិចារណាពីផលប៉ះពាល់នៃការសាងសង់ទុះនប់វារីអគ្គីសនី "ឆាយអារ៉ែង" ក្នុងភូមិ ព្រែកស្វាយ ឃុំថ្មបាំង ស្រុកថ្មបាំង ខេត្ដកោះកុង។
លិខិតចំហរបស់វេទិកានៃអង្គការមិនមែនរដ្ឋាភិបាលស្តីពីកម្ពុជា កាលពីថ្ងៃទី១៧ ខែធ្នូ ដាក់ជូនលោក ហ៊ុន សែន បានរកឃើញថា ប្រសិនបើសាងសង់ ប្រជាជនប្រមាណ ៣៨៩ គ្រួសារ (១.៦៤២ នាក់) និងព្រៃឈើប្រហែលជា ២០.០០០ ហិចតា នឹងរងផលប៉ះពាល់។ ជាងនេះទៅទៀត ថនិកសត្វ ប្រមាណជា ៥៧ប្រភេទ បក្សី ៩៣ប្រភេទ ល្មូន ៥៥ប្រភេទ (រួមទាំងក្រពើភ្នំ) ឧរុង្គសត្វ ២៩ប្រភេទ និងត្រី៤៣ប្រភេទ (រួមទាំងត្រីនាគ) និងត្រូវបានគំរាមកំហែងដោយសារការសាងសង់ទំនប់នេះ។
ទំនប់វារីអគ្គិសនី ឆាយអារ៉ែង ទទួលបានការវិនិយោគពីក្រុមហ៊ុន ឆាយណា ហ្គូដៀន ខូផឺរេសិន (China Guodian Corporation) ដែលត្រូវបានចុះអនុស្សរណៈយោគយល់ជាមួយរាជរដ្ឋាភិបាលកម្ពុជានៅខែវិច្ឆិកា ឆ្នាំ ២០១០ បន្ទាប់ពីការដកខ្លួនចេញរបស់ក្រុមហ៊ុន ឆាយណា សាវដិន ផាវឺគ្រីត ដោយសារតែគម្រោងអាចនឹងបង្កឲ្យមានផលប៉ះពាល់បរិស្ថានខ្លាំង។ ទំនប់នេះជាគម្រោង សាងសង់ ប្រតិបត្តិ និង ផ្ទេរ (BOT) ដែលនឹងត្រូវការពេល ៤,៥ ឆ្នាំ ដើម្បីសាងសង់ និងមានកម្រិតសមត្ថភាព ១០៨ មេហ្កាវ៉ាត់ ដោយចំណាយទឹកប្រាក់សរុប ៣២៧ លាន ដុល្លារសហរដ្ឋអាមេរិក។
CLC៖ បញ្ហាច្បាប់ នយោបាយ អំណាចទឹកប្រាក់ និងកិច្ចសន្យាខ្លី ធ្វើឲ្យសហជីពមិនអាចអនុវត្តការងារបានល្អ
ថ្ងៃទី19 ធ្នូ 2013, ម៉ោង 05:05 PM
សហភាពការងារកម្ពុជា(CLC) នៅថ្ងៃព្រហស្បតិ៍នេះ បង្ហាញថា បញ្ហាច្បាប់នយោបាយ ឥទ្ធិពលទឹកប្រាក់ និងការផ្តល់កិច្ចសន្យាខ្លីពីសំណាក់និយោជក ជាបញ្ហាដែលធ្វើឲ្យសហជីពមិនអាចអនុវត្តការងារ ឬសិទ្ធិសេរីភាពសមាគម របស់ខ្លួនបានល្អ នៅក្នុងវិស័យរោងចក្រ សហគ្រាសនានានៅក្នុងប្រទេសកម្ពុជា។
ការបង្ហាញនេះធ្វើឡើងក្នុងសិក្ខាសាលាស្តីពីឧបសគ្គ និងការអភិវឌ្ឍន៍សេរីភាពសមាគមនៅកម្ពុជា នារាជធានីភ្នំពេញ។
តុលាការខេត្តសៀមរាបឃុំខ្លួនមន្ត្រីសាខាពន្ធដារខេត្តម្នាក់ពីបទវិតិក្រម
ថ្ងៃទី19 ធ្នូ 2013, ម៉ោង 04:45 PM
សាលាដំបូងខេត្តសៀមរាប នៅរសៀលថ្ងៃព្រហស្បតិ៍នេះ សម្រេចឃុំខ្លួនបណ្តោះអាសន្ន ប្រធានផ្នែកគ្រប់គ្រងអ្នកជាប់ពន្ធមធ្យមនៃសាខាពន្ធដារខេត្តនេះ គឺលោក លីវ ប៊ុនថន បន្ទាប់ពីតំណាងអយ្យការចោទប្រកាន់រូបគាត់ ពីបទវិតិក្រម គឺការយកលុយលើសពីលុយរដ្ឋកំណត់ និងយកលុយលើសដោយខ្លួនឯង។
ប្រធានស្តីទីតុលាការខេត្តសៀមរាប លោក ឌុច សុខសារិន ប្រាប់VODថា ជនជាប់ចោទអាចប្រឈមនឹងការផ្តន្ទាទោសដាក់ពន្ធនាគារពី២ ទៅ៥ឆ្នាំ និងពិន័យជាប្រាក់ពី៤,០០០,០០០រៀល ទៅ ១០,០០០,០០០រៀល ប្រសិនបើតុលាការរកឃើញថា គាត់ពិតជាមានកំហុសមែន ៖ “បាទគាត់ឆ្លើយនៅកន្លែងអយ្យការគាត់បានសារភាពហើយនៅខាងខ្ញុំគាត់មិនទាន់ឆ្លើយទេ រង់ចាំមេធាវីរបស់គាត់សិន” ។
ក្រសួងប្រៃសណីយ៍ រក្សាជំហរលើសេចក្តីជូនដំណឹងលើប្រព័ន្ធទូរស័ព្ទ ក្រោយពីការពិភាក្សា
ថ្ងៃទី19 ធ្នូ 2013, ម៉ោង 11:25 AM
ក្រសួងប្រៃសណីយ៍ ឲ្យដឹងថា ការចេញសេចក្តីប្រកាសក្នុងការអន្តរាគមន៍លើប្រព័ន្ធទូរស័ព្ទ ជាការចូលរួមចំណែកកាត់បន្ថយហានិភ័យមួយចំនួន ដែលក្នុងនោះ គឺការលុបបំបាត់ឧក្រិដ្ឋកម្ម និងបទល្មើសនានាក្នុងវិស័យទូរគមនាគមន៍។
មន្ត្រីក្រសួងប្រៃសណីយ៍ បានពិភាក្សាកាលពីថ្ងៃទី១៣ ខែធ្នូជាថ្មីលើសេចក្តីជូនដំណឹងដែលតម្រូវឲ្យក្រុមហ៊ុនទូរស័ព្ទចល័តទាំងអស់ មិនត្រូវផ្តល់ទឹកប្រាក់បន្ថែម ដែលនាំឲ្យអត្រាការហៅចេញក្នុងប្រព័ន្ធតិចជាង៤.៥សេន/ដុល្លារ ក្នុងមួយនាទី និងតម្លៃហៅចេញក្រៅប្រព័ន្ធទាបបំផុត៥.៩៥សេនដុល្លារ ក្នុងមួយនាទី។
សេចក្តីប្រកាសព័ត៌មានរបស់ក្រសួង ចេញផ្សាយនៅថ្ងៃទី១៨ ខែធ្នូ ឲ្យដឹងថា ការបន្ទាបតម្លៃ ដែលក្រុមហ៊ុនខ្លះ ទម្លាក់មកស្ទើរសូន្យនោះ ជាការបង្ខូចតម្លៃ ដែលផ្ទុយពីបទបញ្ញត្តិនៃអង្គការពាណិជ្ជកម្មពិភពលោក ដែលកម្ពុជា ជាសមាជិក ហើយកម្ពុជាបានសន្យាជាមួយអង្គការក្នុងការធានាការប្រកួតប្រជែងដោយសេរី និងស្មោះត្រង់ចំពោះអ្នកវិនិយោគទាំងអស់។ សេចក្តីប្រកាសបន្តថា សង្គ្រាមនៃតម្លៃនេះ ធ្វើឲ្យប៉ះពាល់ដល់គុណភាពសេវា ដោយការបន្ទាបតម្លៃពុំបានគិតដល់គុណភាពសេវាដល់អ្នកប្រើប្រាស់ ធ្វើឲ្យអ្នកប្រើប្រាស់រអ៊ូរទាំ និងប៉ះពាល់ដល់ផែនការអភិវឌ្ឍន៍វិស័យទូរគមនាគមន៍រយៈពេលវែង។
To