ដោយ៖ តាំង វីដា និង ស៊ុន ណារិន
ថ្ងៃសុក្រ ទី20 ខែធ្នូ ឆ្នាំ2013
http://vodhotnews.com
អង្គការតម្លាភាពកម្ពុជា និងដៃគូរពាក់ព័ន្ធ ស្នើឲ្យក្រសួងសុខាភិបាល ត្រូវតែប្រគល់ប្រាក់មូលនិធិ ប្រមាណ ៤៧ម៉ឺនដុល្លារ ទៅកាន់មូលនិធិសកលវិញ ដើម្បីបង្ហាញពីភាពស្មោះត្រង់របស់កម្ពុជាទៅម្ចាស់ជំនួយ និងជៀសវាងការបាត់បង់មូលនិធិផ្គត់ផ្គង់សេវាសុខភាពរបស់ប្រជាពលរដ្ឋទៅថ្ងៃអនាគត។
លិខិតរបស់មូលនិធិសកល ចុះថ្ងៃទី៩ ខែធ្នូ ផ្ញើជូនរដ្ឋមន្ត្រីក្រសួងសុខាភិបាល លោក ម៉ម ប៊ុនហេង បានដាក់កំហិតឲ្យ ក្រសួងសុខាភិបាល ផ្តល់ប្រាក់វិញចំនួនជាង ៤១០៧១២ដុល្លារ ដែលពាក់ព័ន្ធនឹងគម្រោងរបស់មជ្ឈមណ្ឌលជាតិប្រយុទ្ធនឹងជំងឺគ្រុនចាញ់ ប៉ារ៉ាស៊ីតសាស្ត្រ បាណកសាស្ត្រ ប្រាក់៤១៤០៤ដុល្លារវិញ ដែលជាប់ពាក់ព័ន្ធនឹងគម្រោងមជ្ឈមណ្ឌលជាតិប្រយុទ្ធនឹងជំងឺអេដស៍សើ ស្បែក និងកាមរោគ(NCHARDS) និងប្រាក់២០៧២៥ដុល្លារ ដែលជាប់ពាក់ព័ន្ធនឹងគម្រោងអង្គការមេឌីខាំ (MEDiCAM)មកកាន់មូលនិធិវិញ ក្នុងរយៈពេល៣០ថ្ងៃ បន្ទាប់ពីរកឃើញថា គម្រោងលើផ្នែកសុខភាពមួយចំនួន មានជាប់ពាក់ព័ន្ធនឹងអំពើពុករលួយ។
លិខិត បន្តថា មូលនិធិសកល នឹងទុកពេល៣០ថ្ងៃក្នុងការផ្តល់លុយមកវិញតាមធនាគារ ដោយព្រមានថា ប្រសិនបើមិនមានការផ្តល់ថវិកាមកវិញតាមការកំណត់ទេ លទ្ធផលមួយចំនួនអាចកើតឡើង។ ចំណុច ដែលព្រមាននោះ រួមមាននឹងមិនដំណើរការចុះហត្ថលេខាជាមួយកម្ពុជា ទៅលើជំនួយលើជំងឺគ្រុនចាញ់តម្លៃ១៥លានដុល្លារ ហើយជំនួយប្រមាណជា២០៩៧៤២០៥,៧៣ដុល្លារ នឹងត្រូវព្យួរទាំងអស់ ឬមួយភាគ។ មូលនិធិសកល ក៏បានព្រមានថា នឹងមិនដំណើរការការចុះហត្ថលេខាលើការអនុវត្តទីពីរនៃជំនួយសម្រាប់ ជំងឺអេដស៍តម្លៃប្រហែលជា៥៧៦៦៣០៧៥ដុល្លារ ប្រសិនបើមិនមានការផ្តល់ថិវកាមកវិញ តាមការដាក់កំហិត។ មូលនិធិ ក៏បានព្រមានថា ជំនួយសម្រាប់លើជំងឺគ្រុនចាញ់ ដំណាក់កាលទីពីរ តម្លៃ១២៦៣៧៥៣៣ ក៏នឹងអាចត្រូវកាត់បន្ថយដោយប្តូរទៅជាការផ្តល់សេវាសំខាន់ៗតែប៉ុណ្ណោះ។
នាយកប្រតិបត្តិនៃអង្គការតម្លាភាពកម្ពុជា លោក ព្រាប កុល យល់ថា ការព្រមានផ្តាច់ជំនួយនេះ អាចប៉ះពាល់យ៉ាងធ្ងន់ធ្ងរដល់ប្រជាពលរដ្ឋ និងអង្គការក្រៅរដ្ឋាភិបាល ដែលបម្រើសេវាកម្មសុខភាពសាធារណៈនេះ ដោយសារអំពើពុករលួយ ដែលត្រូវបានចោទប្រកាន់ មិនត្រូវបានស៊ើបអង្កេតរកការពិតនៅឡើយ។ លោកថា រដ្ឋាភិបាល គួរតែឆ្លើយតបជាវិជ្ជមាន ចំពោះការទាមទាររបស់មូលនិធិនេះ ដើម្បីបង្ការការផ្តាច់ជំនួយ និងអាចឲ្យប្រភពជំនួយដទៃទៀត បន្តទ្រទ្រង់ជំនួយបន្ថែម ៖
ប្រធានគណៈកម្មាធិការកម្ពុជាឯករាជ្យប្រឆាំងអំពើពុករលួយ លោកស្រី ម៉ម ស៊ីថា ចាត់ទុកថា អំពើពុករលួយ ដែលត្រូវបានរកឃើញ ក្នុងក្រសួងសុខាភិបាលនេះ គឺជារូបភាពយ៉ាងអាក្រក់មួយ ដែលកម្ពុជា បានអនុវត្តផ្ទុយទាំងស្រុងពីបំណងរបស់ម្ចាស់ជំនួយ ៖
VOD បានព្យាយាមទាក់ទងរដ្ឋមន្ត្រីសុខាភិបាល លោក ម៉ម ប៊ុនហេង និងប្រធានអង្គការមេឌីខាំ លោក ស៊ិន សុមីនី តែលោកមិនលើកទូរស័ព្ទ ចំណែកមន្ត្រីពាក់ព័ន្ធផ្សេងទៀត បដិសេធឆ្លើយតបករណីនេះ។
របាយការណ៍ចេញដោយមូលនិធិសកល ថ្ងៃទី១៤ ខែវិច្ឆិកា ឆ្នាំ២០១៣ បង្ហាញថា មន្ត្រីជាន់ខ្ពស់នៃមជ្ឈមណ្ឌលជាតិប្រយុទ្ធនឹងជំងឺគ្រុនចាញ់ ប៉ារ៉ាស៊ីតសាស្ត្រ បាណកសាស្ត្រ(CNM) និងមជ្ឈមណ្ឌលជាតិប្រយុទ្ធនឹងជំងឺអេដស៍សើស្បែក និងកាមរោគ(NCHARDS) ដែលស្ថិតនៅក្រោមចំណុះក្រសួងសុខាភិបាល ព្រមទាំងអង្គការមេឌីខាំជាបណ្តាញអង្គការក្រៅរដ្ឋាភិបាលដ៏ធំមួយ បានចូលរួមក្នុងបណ្តាញប្រព្រឹត្តអំពើពុករលួយមួយ ថែមទាំងទាមទារលើសការចំណាយជាក់ស្តែងដល់ទៅពីរ ឬបីដងទៀតផង។
របាយការណ៍នោះ បានស៊ើបអង្កេតលើប្រាក់ជំនួយរបស់មូលនិធិ ចំនួនជាង៨០លានដុល្លារអាមេរិក ដែលផ្តល់មកឲ្យស្ថាប័នចំណុះក្រសួងសុខាភិបាល ដោយរកឃើញនូវភស្តុតាងសំខាន់ៗជាច្រើន ដែលបញ្ជាក់ថា ការដេញថ្លៃមួយចំនួនមានភាពមិនប្រក្រតី ការកិបកេងប្រាក់ជំនួយ និងការប្រើប្រាស់ប្រាក់ជំនួយខុសគោលដៅ។ ប៉ុន្តែ អតីតប្រធានមជ្ឈមណ្ឌលជាតិប្រយុទ្ធនឹង ជំងឺគ្រុនចាញ់ ប៉ារ៉ាស៊ីតសាស្ត្រ បាណកសាស្ត្រ លោក ឌួង សុជាតិ ដែលរងការចោទប្រកាន់នោះ ប្រាប់VODថា របាយការណ៍មូលនិធិសកល គឺត្រូវបានបោះពុម្ពតែមួយចំហៀងប៉ុណ្ណោះ មិនបានលើកឡើងពីសកម្មភាពទាំងស្រុងនោះទេ ក្នុងដំណើរការដេញថ្លៃនោះទេ។
អ្នកនាំពាក្យអង្គភាពប្រឆាំងអំពើពុករលួយ លោក កែវ រ៉េមី ឲ្យដឹងថា អង្គភាព បានកំពុងចាត់ការរឿងនេះ តែសម្រាប់ព័ត៌មានលម្អិត លោកជំរុញឲ្យសួរប្រធានអង្គភាពប្រឆាំងអំពើពុករលួយ លោក ឱម យិនទៀង តែVOD មិនអាចទាក់ទងសុំការអត្ថាធិប្បាយបាន ៖
កាលពីថ្ងៃទី១៧ ខែវិច្ឆិកា ក្រសួងសុខាភិបាលចេញសេចក្តីថ្លែងការណ៍ថា ក្រសួងមិនបានដឹងពីសកម្មភាពរបស់បុគ្គលពុករលួយទាំងអស់ក្នុងពេល អនុវត្តគម្រោង ដែលប្រើប្រាស់មូលនិធិសកលឡើយ។ ក្រសួងទម្លាក់កំហុសលើភាគីទាំងអស់ដែលពាក់ព័ន្ធថា ជាអ្នកទទួលខុសត្រូវដោះស្រាយបញ្ហានេះ។
អ្នកវិភាគបញ្ហាសង្គម លោក កែម ឡី ចាត់ទុករឿងនេះថា ជាបន្ទុកទាំងស្រុងរបស់ថ្នាក់ដឹកនាំក្រសួង ដែលធ្វេសប្រហែលបណ្តោយឲ្យរឿងនេះកើតឡើង ដោយមិនគួរទម្លាក់កំហុស ទៅបុគ្គលដែលមិនទាន់កំណត់អត្តសញ្ញាណបាននោះទេ៕
សរសេរមកកាន់លោក តាំង វីដា តាមរយៈ vida@vodhotnews.com
ប្រធានអង្គភាពប្រឆាំងអំពើពុករលួយ លោក ឱម យួនទៀង អើយ!ចាត់ការឲ្យបានឆាប់ៗៗទៅ។បើគេធ្វើ បាតុកម្មទាមទារយុត្តិធម៌វិញ សុទ្ធតែថា ធ្វើឲ្យប៉ះពាល់សេចក្តីថ្លៃថ្នូររដ្ឋាភិបាល!!!ករណីមន្រ្តីរាជការពុករលួយបំផ្លាញថវិកាជាតិនិងធ្វើឲ្យកេរ្តិ៍ឈ្មោះរដ្ឋាភិបាលស្អុយគគ្រុះ មិនប្រញាប់ចាត់ការទេ????
នេះជារឿងអាមាស់មួយសម្រាប់កម្ពុជា ក្នុងសម័យតេជោព្រោះតែអំពើពុករលួយ ពីថ្នាក់ក្រោមដល់ថ្នាក់លើ ដែលផលវិបាកបានធ្លាក់មកលើប្រជាជន និងសង្គមជាតិខ្មែរទាំងមូល
សង រឺមិនសង ?
-បើសងមានន័យថាខ្លួនពុករលួយមែន ជនថោកទាបគឺថ្នាក់ដឹកនាំ មុខក្រាសប៉ុនណាទៅ ?
-បើមិនសង បាត់ជំនួយដល់ទៅ១០០លានដុល្លារសម្រាប់ប្រជាជនកម្ពុជាក្រីក្រទាំងនគរ
នេះឯងជាហេតុផល ដែលប្រជាជនកម្ពុជាសឹងតែមួយនគរកំពុងតែស្រែក “ចុះចេញទៅ!!!!!!!”