Wednesday, 01 January 2014
សេត គឹមសឿន
ភ្នំពេញ ប៉ុស្តិ៍
ភ្នំពេញៈ តារាសម្តែងនាង សារ៉ាយ សក្ខណា នឹងចាកចេញពីប្រទេសកម្ពុជាឆ្ពោះទៅរស់នៅសហរដ្ឋអាមេរិកតាមប្តី នៅអំឡុងពាក់កណ្តាលខែមករា ឆ្នាំ២០១៤នេះ។ ប៉ុន្តែមុននឹងចាកចេញ សារ៉ាយ សក្ខណា បានអញ្ជើញអ្នកសារព័ត៌មានជាច្រើនរូបទៅចូលរួមពិធីជប់លៀងដ៏ធំ មួយនៅសាលាភាសាបរទេសមួយឈ្មោះថា សាលាប៊ែលលី ដែលអ្នករស់នៅម្តុំនោះបានបញ្ជាក់ថា គឺជាសាលាបង្រៀនភាសាបរទេសដែលនាងបើកដំណើរការ។
ដោយមានបិទ រូបនាង និងស្វាមីដែលទើបរៀបការថ្មីៗ ដោយពក្មេងស្រីម្នាក់ សាលាប៊ែលលី ដែលមានអាសយដ្ឋាននៅច្រកចូលវត្តសំរោងអណ្តែត ចម្ងាយប្រមាណ៤០ម៉ែត្រពីខ្លោងទ្វារ ត្រូវបានអ្នករស់នៅទីនោះនិយាយតៗគ្នាថា គេបានឃើញវត្តមានតារាសម្តែងល្បីឈ្មោះនាង សារ៉ាយ សក្ខណា ចេញចូលទីនោះញឹកញាប់បំផុត ដែលគេបានដាក់ការសង្ស័យថា សាលានោះជាកម្មសិទ្ធិនាង ហើយក្រោយពេលរៀបការនាងក៏បាននាំស្វាមីអាណិកជនអាមេរិករបស់នាងទៅ មើលទីនោះផងដែរ។
នៅក្នុងបរិយាកាសដ៏រីករាយដែលសិស្សានុសិស្ស និងឪពុកម្តាយជាច្រើនរូបចូលរួមក្នុងពិធីចែកប័ណ្ណសរសើរ និងជប់លៀងកាលពីសប្តាហ៍មុននៅសាលា ប៊ែលលី នោះ សិស្សភាគច្រើនបានឲ្យដឹងថា តារាសម្តែង សារ៉ាយ សក្ខណា តែងមានវត្តមាននៅទីនោះអត់ដាច់ឡើយ ហើយសិស្សភាគច្រើនគិតថា សាលាប៊ែលលី ពិតជាមានចំណែករបស់ សក្ខណា មិនខាន។ មានការបញ្ជាក់ពីអ្នករស់នៅម្តុំនោះថា ទំនងជា សក្ខណា បើកសាលានេះ ជាកាដូជូនឪពុកម្តាយរបស់នាងមុនពេលទៅរស់នៅអាមេរិក។
ប៉ុន្តែ យ៉ាងណា នៅពេលសួរបញ្ជាក់ឲ្យកាន់តែច្បាស់ទៅកាន់តារាសម្តែង សារ៉ាយ សក្ខណា តារារូបនេះបានឲ្យដឹងថា ជាការពិតណាស់ នាងតែងមានវត្តមានជាញឹកញាប់នៅសាលាប៊ែលលី តែនាងសុំបញ្ជាក់ថា ការលើកឡើងថា នាងជាម្ចាស់កម្មសិទ្ធិសាលាភាសាបរទេសនេះ មិនមែនជាការពិតទេ។ តាមពិតទៅសាលាបង្រៀនភាសា និងកុំព្យូទ័រនេះជាកម្មសិទ្ធិរបស់បងប្រុសរបស់នាង ហើយនាងតែងមកលេងជាញឹកញាប់ ព្រោះនាងចូលចិត្តក្មេងៗ។
ជាមួយ គ្នានោះ លោក មុំ តារា នាយកសាលាប៊ែលលី បងប្រុស សារ៉ាយ សក្ខណា បានឲ្យដឹងថា សាលានេះបើកដំណើរការ២ឆ្នាំហើយ ហើយប្អូនស្រីលោក សក្ខណា តែងមកលេងទីនេះជាញឹកញាប់ ដូច្នេះហើយទើបបណ្តាលឲ្យមានការយល់ច្រឡំ៕