ដោយ៖ តាំង វីដា និង អ៊ឹង ប៊ុនថន
ថ្ងៃសុក្រ ទី3 ខែមករា ឆ្នាំ2014
http://vodhotnews.com
ស្តាប់សំឡេង៖ |
ចម្លងទុក |
មន្ត្រីឃ្លាំមើលសិទ្ធិមនុស្ស ហៅការចោទប្រកាន់របស់តុលាការទៅលើសកម្មជនសិទ្ធិមនុស្ស ១០រូប ដែលបានចាប់ខ្លួនក្នុងហេតុការណ៍ប៉ះទង្គិច នៅតំបន់សេដ្ឋកិច្ចពិសេស កាលពីម្សិលមិញនេះ ថាជាចេតនារបស់សមត្ថកិច្ចដើម្បីបំបាក់ស្មារតី ប្រជាពលរដ្ឋដែលធ្វើបាតុកម្ម។
ក្រោយការសាកសួរអស់ពេលជិត១ព្រឹក ចៅក្រមស៊ើបសួរសាលាដំបូងរាជធានីភ្នំពេញ លោកស្រី សែម សត្កិកូឡា បានសម្រេចឃុំខ្លួនបណ្តោះអាសន្ន លោក វន់ ពៅ និងសកម្មជនសហជីព ៩នាក់ទៀត ដោយចោទប្រកាន់ពីបទហិង្សាដោយចេតនា និងបំផ្លិចបំផ្លាញទ្រព្យសម្បត្តិអ្នកដទៃ។
អ្នកគ្រប់គ្រងបច្ចេកទេសឃ្លាំមើលការរំលោភសិទ្ធិមនុស្សនៃអង្គការ លីកាដូ លោក អំ សំអាត យល់ថាការសម្រេចរបស់សាលាដំបូងរាជធានីភ្នំពេញ គឺឆ្លុះបញ្ចាំងពីដំណើរថយក្រោយនៃសិទ្ធិសេរីភាពបញ្ចេញមតិដោយសន្តិវិធី។ លោកយល់ថា ប្រព័ន្ធតុលាការពេលនេះ គឺជាឧបករណ៍របស់អ្នកនយោបាយ ក្នុងការលុបបំបាត់សំឡេងតវ៉ា ទាមទារសិទ្ធិរបស់ប្រជាពលរដ្ឋ ខណៈដែលបាតុកម្ម កំពុងកើតមានឡើងទូទាំងប្រទេស <<ខ្ញុំគិតថា វាជាឧបករណ៍របស់អ្នកនយោបាយ ពីព្រោះយើងមើលទៅបញ្ហាទាំងអស់នេះ គឺថាវាមិនត្រូវមានការចោទប្រកាន់ ណាមួយកើតឡើងទេ ពីព្រោះធាតុពិតយើងត្រូវរកឲ្យឃើញ អ្នកណា ជាអ្នកបង្កហិង្សា។ ប៉ុន្តែអ្នកទាំងអស់នោះ គ្រាន់តែធ្វើការតស៊ូមតិ ដោយអហិង្សា ប៉ុន្តែបើមានជនដែលក្លែងបន្លំ បង្កឲ្យមានហិង្សា យើងត្រូវចាប់ជនបុគ្គលនោះផ្ទាល់>>។
ប្រធានកម្មវិធីផ្នែកកម្មវិធីសិទ្ធិការងារនៃមជ្ឈមណ្ឌលអប់រំច្បាប់សម្រាប់សហគមន៍ លោក មឿន តុលា យល់ថា ការចោទប្រកាន់លើសកម្មជនទាំងនេះ គឺដើម្បីបំបាត់សំឡេងទាមទាររបស់ប្រជាពលរដ្ឋ ដោយសារមួយរយៈចុងក្រោយនេះ ពួកគេ បានលើកទឹកចិត្តប្រជាពលរដ្ឋស្ទើរគ្រប់វិស័យ តវ៉ាទាមទារសិទ្ធិ និងប្រាក់ឈ្នួលរបស់ខ្លួន <<ការទាមទារទាំងអស់នេះ គឺវាឆ្លុះបញ្ចាំងជាមួយនឹងកម្មវិធីនយោបាយ របស់គណបក្សសង្គ្រោះជាតិ អញ្ជឹងធ្វើឲ្យសន្ទុះរបស់ប្រជាពលរដ្ឋ មួយរយៈនេះមានការផ្ទុះខ្លាំង ហើយការបំបាក់នេះបើខ្ញុំយល់ ប្រហែលជាចេតនាមួយ ដាក់សំពាធទៅភាគីនយោបាយមួយទៀត មុនពេលចរចា>>។
ប្រធានផ្នែកស៊ើបអង្កេតនៃសមាគមការពារសិទ្ធិមនុស្សអាដហុក លោក នី ចរិយា យល់ថា ការចោទប្រកាន់នេះ គឺគ្មានភស្តុតាងត្រឹមត្រូវឡើយ ហើយការអនុវត្តសមត្ថកិច្ចរបស់កងកម្លាំងទ័ពឆ័ត្រយោង៩១១ និងព្រះរាជអាជ្ញា ចោទប្រកាន់លើសកម្មជនទាំងនោះ គឺសុទ្ធតែខុសច្បាប់ <<ទាហានមិនមែនជានគរបាលយុត្ដិធម៌ទេ ដូច្នេះមិនមានសិទ្ធឃាត់ខ្លួនឃុំខ្លួន ទៅតាមក្រមនីតិវិធីព្រហ្មទណ្ឌ យើងគួរឲ្យសោកស្ដាយដែរដែលមានព្រះរាជអាជ្ញារយល់អំពីច្បាប់ អំពីនីតិវិធីត្រឹមត្រូវហើយទៅជាធ្វើសកម្មភាពខុសជាមួយហ្នឹងក្រុមកងពលឆ័ត្រយោងលេខ៩១១ថែមទៅទៀត>>។
ក្នុងជំនួបចរចាបន្ទាន់រវាងប្រធានសហជីពទាំង៦ អាជ្ញាធររាជធានីភ្នំពេញ និងមន្ដ្រីឧត្តមស្នងការសហប្រជាជាតិទទួលបន្ទុកសិទ្ធិមនុស្សកម្ពុជា ស្នើឲ្យតុលាការ ដោះលែងសកម្មជនសិទ្ធិមនុស្សនិងកម្មករដែលចាប់ខ្លួនកាលពីម្សិលមិញ។ ប៉ុន្តែន្ដែអ្នកនាំពាក្យសាលារាជធានី លោក ឡុង ឌីម៉ង់ ប្រាប់ VODថា អជ្ញាធរមិនអាចដោះលែងពួកគាត់បានទេ ដោយសារមានភស្ដុតាងបទល្មើសជាក់ស្ដែង។ លោកថាសហជីពគួរតែរៀបចំ ឱ្យមានមេធាវីការពារក្តីដើម្បីដំណើរការនីតិវិធីតាមផ្លូវច្បាប់របស់ខ្លួន។ យ៉ាងនេះក្តី សហជីពទាំង៦ ក៏បានស្នើឲ្យអាជ្ញាធរបន្ធូរដៃក្នុងការបង្ក្រាបលើកម្មករដែលធ្វើបាតុកម្ម។
សាលាដំបូងរាជធានីភ្នំពេញ នៅថ្ងៃសុក្រនេះ បានឃុំខ្លួនបណ្តោះអាសន្ន លោក វ៉ន ពៅ ប្រធានសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ លោក ថេង សាវឿន អ្នកសម្របសម្រួលសម្ព័ន្ធសហគមន៍កសិករកម្ពុជា លោក ពុទ្ធិស័ក្កិ ប្រជាសហគមន៍បឹងកក់ និងសកម្មជនសហជីព មួយចំនួនទៀត ដែលត្រូវកងទ័ពឆ័ត្រយោង៩១១ ចាប់វាយនៅមុខរោងចក្រយ៉ាកជីន។ ក្នុងហេតុការណ៍នោះបានបណ្តាលឲ្យកម្មករ និងព្រះសង្ឃជាច្រើនអង្គ/នាក់រងរបួស ហើយព្រះសង្ឃចំនួន ៥អង្គត្រូវបានឃាត់ព្រះកាយជាង១០ម៉ោង ទើបមានការដោះលែង៕
សូមសរសេរមកកាន់លោក តាំង វីដា តាមរយៈ vida@vodhotnews.com
បេសកកម្មបោសសំអាតពួកអាណាធិប្បតេយ្យ គ្មានច្បាប់ គ្មានទំលាប់ ដែលតែងតែយកផ្លូវសាធារណៈមកធ្វើជាចំណាប់ខ្មាំង បំផ្លិចបំផ្លាញទ្រព្យសម្បត្តិ ឯកជន សាធារណៈ គំរាមកំហែងកម្មករអោយចូលរួមបាតុកម្ម ធ្វើអោយរំខានការធ្វើដំណើររបស់ពលរដ្ឋ រំខានការរកសីុរបស់ពលរដ្ឋ និងអ្នកវិនិយោគជាតិ អន្តរជាតិ ចាប់ចេញដំណើរហើយ! រដ្ឋាភិបាលត្រូវតែស្តារមកវិញ នូវសុខសន្តិភាព សុវត្ថិភាព ស្ថេរភាព សណ្តាប់ធ្នាប់សាធារណៈ រដ្ឋាភិបាលត្រូវតែធានាអោយប្រាកដថា ការធ្វើដំណើរតាមដងផ្លូវដោយគ្មានការរំខាន គ្មានការបិទផ្លូវ ការរកសីុរបស់ពលរដ្ឋគ្មានការរំខាន និងភ័យខ្លាច ផ្តល់ទំនុកចិត្តដល់អ្នកវិនិយោគទុនជាតិ អន្តរជាតិ 4សូន្យ ត