ដោយ៖ តាំង វីដា
ថ្ងៃសុក្រ ទី17 ខែមករា ឆ្នាំ2014
http://vodhotnews.com
ស្តាប់សំឡេង៖ |
ចម្លងទុក |
តំណាងសហព័ន្ធ និងសម្ព័ន្ធសហជីពការងារចំនួន៨ ស្នើរដ្ឋមន្ត្រីក្រសួងការងារ បើកកិច្ចចរចាជាថ្មីឡើងវិញ ពាក់ព័ន្ធនឹងបញ្ហាប្រាក់ឈ្នួលកម្មករ និងអត្ថប្រយោជន៍ផ្សេងៗ រួមនឹងទាមទារឲ្យដោះលែងកម្មករ សកម្មជនសិទ្ធិមនុស្សទាំង២៣នាក់ ដែលសមត្ថកិច្ចបានចាប់ឃុំខ្លួន កាលពីថ្ងៃទី២ និងទី៣ ខែមករា។
នៅក្នុងលិខិតរបស់សហព័ន្ធសហជីព និងសម្ព័ន្ធសហជីពទាំង៨ ផ្ញើជូន លោក អ៊ិត សំហេង រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ ចុះថ្ងៃទី១៦ ខែមករា ដែលដាក់ជូនក្រសួងការងារនៅថ្ងៃសុក្រនេះ បានឲ្យដឹងថា យោងតាមសេចក្តីប្រកាសរបស់ក្រសួងការងារ ការដំឡើងប្រាក់ឈ្នួលជូនកម្មករនិយោជិតចំនួន ១០០ដុល្លារក្នុងមួយខែ មិនអាចឆ្លើយតបទៅនឹងការរស់នៅសមរម្យឡើយ ដែលករណីនេះ ធ្វើឲ្យកម្មករផ្ទុះបាតុកម្មតវ៉ាទាមទារប្រាក់ខែអប្បបរមា ១៦០ដុល្លារ រហូតដល់មានហេតុការណ៍ហិង្សាបាញ់សម្លាប់ ចាប់ខ្លួនកម្មករ និងសកម្មជនសិទ្ធិមនុស្ស២៣នាក់។
លិខិតដដែលបានបន្តដោយស្នើរាជរដ្ឋាភិបាល ដែលមានក្រសួងការងារជាសេនាធិការ និងក្រុមហ៊ុន ត្រូវរៀបចំឲ្យមានការចរចាបញ្ហាប្រាក់ឈ្នួល និងអត្ថប្រយោជន៍ផ្សេងៗជូនកម្មករបន្តទៀត ទាមទារឲ្យមានការដោះលែងកម្មករនិងសកម្មជនសិទ្ធិមនុស្សទាំង២៣នាក់ ឲ្យមានសេរីភាពឡើងវិញដោយឥតលក្ខខណ្ឌ សងជំងឺចិត្តដល់កម្មករដែលរងរបួសជាង៤០នាក់ និងស្នើឲ្យនិយោជកដកពាក្យបណ្តឹង និងបញ្ឈប់ការប្តឹងប្តល់ថ្នាក់ដឹកនាំសហព័ន្ធ សហជីព សកម្មជន និងកម្មករនិយោជិតទាំងអស់។
លោកស្រី ម៉ម ញឹម ប្រធានសហព័ន្ធសហជីពនៃឧស្សាហកម្មវាយនភណ្ឌកាត់ដេរកម្ពុជា ដែលបានចុះហត្ថលេខាលើលិខិតស្នើសុំដែរនោះ មានប្រសាសន៍បន្ថែមថា ចំពោះសំណើពិភាក្សាបញ្ហាប្រាក់ឈ្នួល គឺសហជីពនឹងទុកពេលរហូតដល់ចុងខែមករានេះ ដើម្បីរង់ចាំការឆ្លើយតបពីមន្ត្រីរដ្ឋាភិបាល ប៉ុន្តែសហជីព នៅតែបន្តយន្តការរួមជាមួយសង្គមស៊ីវិល ដាក់ញត្តិតាមបណ្តាស្ថានទូតប្រទេសមហាអំណាច ដើម្បីជំរុញរដ្ឋាភិបាលឲ្យដោះលែងកម្មករ និងសកម្មជនសិទ្ធិមនុស្សទាំង២៣នាក់ ក្នុងហេតុការណ៍ប៉ះទង្គិចរវាងសមត្ថកិច្ច និងកម្មករកន្លងមក «ដាក់ញត្តិទៅគ្រប់ស្ថានទូត ដើម្បីសុំឲ្យមានការដោះលែង និងបញ្ឈប់ប្រើអំពើហិង្សាផ្សេងៗ។ រងការគំរាមកំហែង និងការបញ្ឈប់ជាបន្តបន្ទាប់ ប៉ុន្តែខាងខ្ញុំ មិនទាន់មានការបញ្ឈប់ណាមួយទេ ប៉ុន្តែមានការគំរាមកំហែង។ មួយទៀត មិនត្រឹមគំរាមកំហែង គំរាមដល់ឪពុកម្តាយគាត់ទៀត»។
អ្នកនាំពាក្យក្រសួងការងារ លោក ហេង សួរ ឲ្យដឹងថា លោកមិនទាន់ទទួលបានលិខិតនោះនៅឡើយទេ។ តែលោកថា ការចរចាប្រាក់ឈ្នួលកម្មករ សម្រាប់ឆ្នាំ២០១៤នេះ មិនអាចទៅរួចទេ លុះណាតែមានការពិភាក្សាត្រីភាគីថ្មីមួយទៀត ហើយមានការវាយវិភាគ និងវាយតម្លៃត្រឹមត្រូវ «ការចរចាយើងមិនដែលនិយាយថា អត់មានទេ គ្រាន់តែថាបើនិយាយពីឆ្នាំ២០១៤ គឺវាចប់ហើយ ពីព្រោះអ្វីៗបានសម្រេចចេញរួចរាល់ហើយ ប៉ុន្តែផ្លូវសម្រាបចរចា បន្តផ្ទាល់ដើម្បីគិតអំពីឆ្នាំបន្តទៀត ឬមួយក៏យ៉ាងម៉េច នោះគឺយន្តការត្រីភាគីនេះ គឺនៅមានដដែលទេ។ ក្រសួងក៏ដូចជារាជរដ្ឋាភិបាល គឺស្វាគមន៍ចំពោះដំណើរការចរចាត្រីភាគីនេះ គ្រាន់តែថា បើកាលណាយើងនិយាយពី ២០១៤ យើងឈប់ យើងមិនគួរនាំគ្នានិយាយទៀតទេ»។
ចំណែក ការស្នើដោះលែងជនជាប់ចោទទាំង២៣នាក់ ពាក់ព័ន្ធនឹងការបង្ក្រាបក្នុងគ្រាកម្មករបាតុកម្មនោះ លោក ហេង សួរ បញ្ជាក់ថា ក្រសួងការងារ បានផ្ទេរសមត្ថកិច្ចទៅក្រសួងមហាផ្ទៃ និងក្រសួងយុត្តិធម៌ហើយ។
បើតាមសេចក្តីថ្លែងការណ៍របស់អង្គភាពព័ត៌មាន និងប្រតិកម្មរហ័ស កាលពីថ្ងៃទី១០ ខែមករា លោកនាយករដ្ឋមន្ត្រី ហ៊ុន សែន បានដាក់បទបញ្ជាឲ្យ លោក គាត ឈន់ អតីតរដ្ឋមន្ត្រីក្រសួងហិរញ្ញវត្ថុ ពិភាក្សាជាមួយស្ថាប័ន និងភាគីពាក់ព័ន្ធ អំពីលទ្ធភាពនៃការដំឡើងប្រាក់បៀរវត្សរ៍ ដល់មន្ត្រីរាជការ និងប្រាក់ឈ្នួលអប្បបរមាដល់កម្មករ។ លិខិតបន្តថា គណៈកម្មការពីរទៀត ដឹកនាំដោយរដ្ឋមន្ត្រីក្រសួងមហាផ្ទៃ លោក ស ខេង ត្រូវសិក្សាពីការខូចខាតទ្រព្យសម្បត្តិ ដែលកើតចេញពីការប្រើហិង្សា និងស្រាវជ្រាវពីការប៉ះទង្គិច ដែលកើតឡើងនៅផ្លូវវ៉េងស្រេង ខណ្ឌពោធិ៍សែនជ័យ រាជធានីភ្នំពេញ៕
អត្ថបទទាក់ទង ៖
– អង្គការសង្គមស៊ីវិលចំនួន៩២ អំពាវនាវឲ្យរដ្ឋាភិបាលដោះលែងជនជាប់ឃុំទាំង២៣នាក់
សូមសរសេរមកកាន់ លោក តាំង វីដា តាមរយៈ vida@vodhotnews.com