Friday, 17 January 2014
សេត គឹមសឿន
ភ្នំពេញ ប៉ុស្តិ៍
ភ្នំពេញៈ អ្នកចម្រៀងល្បីឈ្មោះប្រចាំផលិតកម្មរស្មីហង្សមាសលោក ណុប បាយ៉ារិទ្ធ ត្រូវបានតំណាងអយ្យការអមសាលាដំបូងរាជធានីភ្នំពេញ ធ្វើការចោទប្រកាន់ជាផ្លូវការពីបទគំរាមកំហែង និងបរិហារកេរ្តិ៍ លើជនម្នាក់ឈ្មោះ ចេង រស្មីសេរីវង្ស។ នេះបើតាមការបង្ហើបឲ្យដឹងពីប្រភពសាលាដំបូងរាជធានីភ្នំពេញ កាលពីថ្ងៃទី១៦ ខែមករា ឆ្នាំ២០១៤ ម្សិលមិញនេះ។
តាមប្រភពច្បាស់ ការណ៍នោះ បានឲ្យដឹងថា បណ្តឹងលើតារាចម្រៀងពីបទគំរាមកំហែង និងបរិហារកេរ្តិ៍នេះ គឺពាក់ព័ន្ធនឹងការជួលសម្អាងការរបស់តារាចម្រៀង ណុប បាយ៉ារិទ្ធ កាលពីចុងខែធ្នូ ឆ្នាំ២០១៣។ ប្រភពនោះបានឲ្យដឹងថា ដើមបណ្តឹងឈ្មោះ ចេង រស្មីសេរីវង្ស បានជួលសម្អាងការតារាចម្រៀង ណុប បាយ៉ារិទ្ធ ក្នុងតម្លៃ២០២០ដុល្លារ ដោយកក់លុយមុនចំនួន១០០០ដុល្លារ។ ក្នុងតម្លៃនោះ ណុប បាយ៉ារិទ្ធ បានសន្យាថា រូបគេនឹងទៅច្រៀងក្នុងពិធីមង្គលការនោះ ប៉ុន្តែនៅពេលមង្គលការមកដល់ លោក ណុប បាយ៉ារិទ្ធ បែរជាមិនមានវត្តមានទៅច្រៀងនោះទេ បណ្តាលឲ្យម្ចាស់ដើមការខឹងសម្បាយ៉ាងខ្លាំង។
ប្រភពដដែលបន្តថា ដោយសារបញ្ហានេះឈ្មោះ ចេង រស្មីសេរីវង្ស ក៏បានកាត់លុយចំនួន៥០០ដុល្លារ ពីប្រាក់ចំនួន១០២០ដុល្លារដែលនៅសល់។ ចំណុចនេះហើយទើបធ្វើឲ្យលោក ណុប បាយ៉ារិទ្ធ ខឹងកំហែងគំរាម និង ជេរប្រមាថបរិហារកេរ្តិ៍។
ជាមួយគ្នានោះ ឈ្មោះ ចេង រស្មីសេរីវង្ស ក៏បានដាក់ពាក្យបណ្តឹងលើតារាចម្រៀងរូបនេះ ពី បទកំហែងគំរាម និង ជេរប្រមាថបរិហារកេរ្តិ៍។ ពាក់ព័ន្ធនឹងសំណុំរឿងនៅតុលាការនេះ ភ្នំពេញ ប៉ុស្តិ៍ មិនអាចទាក់ទង ណុប បាយ៉ារិទ្ធ បានទេកាលពីម្សិលមិញដោយសារគ្មានអ្នកលើកទូរស័ព្ទ។ រីឯអ្នកគ្រប់គ្រងតារាប្រចាំផលិតកម្មរស្មីហង្សមាស ក៏មិនអាចទាក់ទងសុំការបញ្ជាក់បានដែរ ដោយសារបិទទូរស័ព្ទ។
ប៉ុន្តែ តារារូបនេះបានប្រាប់សារព័ត៌មានមួយពាក់ព័ន្ធនឹងបណ្តឹងលើលោក នេះ ថា ទំនងជាកើតឡើងនៅពេលដែលលោកសរសេរសារមួយបង្ហោះនៅលើហ្វេសប៊ុក និយាយពីបុគ្គលម្នាក់ជួលសម្អាងការលោកហើយ តែមិនឲ្យប្រាក់។ ទោះយ៉ាងណាតារារូបនេះបានសម្តែងការភ្ញាក់ផ្អើលថា ហេតុអ្វីបានជាគេប្តឹងលោកពីបទគំរាមកំហែង និងបរិហារកេរ្តិ៍នោះ ខណៈអ្វីដែលលោកបានសរសេរមិនទាំងមានការបញ្ចេញឈ្មោះ ឬក៏រូបថតផងនោះ។
តារារូបនេះក៏បានឲ្យដឹងផងដែរថា ការអាក់ខានមិនបានចូលរួមច្រៀងនៅក្នុងមង្គលការនោះ ដោយសារលោកត្រូវចូលរួមច្រៀងនៅឯពហុកីឡដ្ឋានជាតិអូឡាំពិកថ្ងៃទី ១ ធ្នូ។
តាមប្រភពពីតុលាការបានឲ្យដឹងថា ពាក់ព័ន្ធនឹងបណ្តឹងគំរាមគំហែង និងបរិហារកេរ្តិ៍នេះ ណុប បាយ៉ារិទ្ធ នឹងចូលខ្លួនបំភ្លឺនៅក្នុងរង្វង់ក្រចកសេះតុលាការនៅពេលខាងមុខ៕
Gay!