Friday, 17 January 2014
Daniel Pye
ភ្នំពេញ ប៉ុស្តិ៍
ភ្នំពេញៈ បេសកជនសិទ្ធិមនុស្សរបស់អង្គការសហប្រជាជាតិ លោក សូរិយា ស៊ូប៊ែរឌី បានបញ្ចប់បេសកកម្មស្វែងរកការពិតរយៈពេល ៦ថ្ងៃ មកកាន់កម្ពុជាកាលពីម្សិលមិញដោយបានអំពាវនាវឲ្យមានការស៊ើបអង្កេតហ្មត់ចត់លើការបង្ក្រាបដែលបណ្តាលឲ្យមានការស្លាប់កម្មករ កាលពីដើមខែនេះ។
លោកក៏បានស្ម័គ្រចិត្តធ្វើជាអ្នកសម្របសម្រួលនយោបាយផងដែរ ប្រសិនគណបក្សប្រជាជនកម្ពុជានិងគណបក្សសង្គ្រោះជាតិ ស្នើមក។
នៅក្នុងសេចក្តីថ្លែងការណ៍លោកថ្លែងថា៖ «ខ្ញុំយល់ថា ការស៊ើបអង្កេតបច្ចុប្បន្ន ធ្វើទៅលើតែបាតុករដែលរងការចោទប្រកាន់ប៉ុណ្ណោះ មិនមែនកម្លាំងប្រដាប់អាវុធទេ។ ខ្ញុំផ្តល់អនុសាសន៍ម៉ឺងម៉ាត់ថា ការស៊ើបអង្កេតមួយគួរត្រូវបានធ្វើឡើងដើម្បីឲ្យដឹងថា តើនរណាជាអ្នកចេញបញ្ជានិងអនុវត្តការបញ្ជាឲ្យបាញ់នោះ។ ប្រសិនគ្មានការបញ្ជា ក៏មិនមានការបាញ់បាតុករដែរ។ អ្នកប្រើអាវុធបាញ់ ត្រូវតែយកមកកាត់ទោស»។
យ៉ាងហោចមានមនុស្ស ៤ នាក់ត្រូវបាញ់ស្លាប់ និងរាប់សិបនាក់រងរបួសនៅពេលកងរាជអាវុធហត្ថបើកការបាញ់គ្រាប់ពិត ទៅលើបាតុករដែលជាកម្មករកាត់ដេរ នៅផ្លូវ វ៉េងស្រេង កាលពីថ្ងៃ ទី៣ ខែ មករា។ នៅថ្ងៃបន្ទាប់នគរបាលនិងក្រុមប្រដាប់អាវុធបានបណ្តេញក្រុមបាតុករនៅទីលាន ប្រជាធិបតេយ្យរាជធានីភ្នំពេញ។ កាលពីថ្ងៃ ទី២ ខែ មករា កម្លាំងកងពលតូចឆត្រយោង ៩១១ បានបោសសម្អាតទាំងហិង្សាទៅលើក្រុមអ្នកតវ៉ា ដោយបានវាយ និងចាប់ខ្លួនសកម្មជនសិទ្ធិមនុស្សជាច្រើននាក់។
លោក ស៊ូប៊ែរឌី បានប្រាប់អ្នកកាសែតបន្ទាប់ពីការប្រកាសលទ្ធផលរកឃើញបឋមរបស់លោកថា៖ «ខ្ញុំបានសុំឲ្យរដ្ឋាភិបាលអនុវត្តការស៊ើបអង្កេតល្អិតល្អន់មួយទៅលើឧប្បត្តិហេតុដែលបានកើតឡើងនៅថ្ងៃ ទី២ ទី៣ និង ទី៤ ខែ មករា កន្លងទៅ»។
លោក ជាម យៀប តំណាងរាស្រ្តគណបក្សប្រជាជនកម្ពុជា បានថ្លែងកាលពីម្សិលមិញថា គណៈកម្មការរបស់រដ្ឋាភិបាលនឹងធ្វើការស៊ើបអង្កេតទាំងទៅលើបាតុករនិងក្រុមប្រដាប់អាវុធ។
លោកថ្លែងបន្តថា៖ «រដ្ឋាភិបាលនឹងស៊ើបអង្កេតករណីទាំងពីរនេះ គឺទាំងបាតុករ និងកម្លាំងប្រដាប់អាវុធ លើករណីបាញ់ប្រហារនោះ»។
ប៉ុន្តែលោក យឹម សុវណ្ណ អ្នកនាំពាក្យគណបក្សសង្គ្រោះជាតិ ថ្លែងថា លោកយល់ថា ការស៊ើបអង្កេតរបស់រដ្ឋាភិបាលនឹងមិនអាចរកយុត្តិធម៌សម្រាប់គ្រួសារអ្នកដែលស្លាប់បានទេ។
លោកបន្តថា៖ «យើងមិនទុកចិត្តគណៈកម្មការបង្កើតឡើងដោយរដ្ឋាភិបាលទេ។ កាលពីអតីតកាលពួកគេមិនអាចធ្វើការងារនេះបានឡើយ។ ប្រសិនបើចង់ស្វែងរកការពិត យើងត្រូវតែមានគណៈកម្មការដែលបង្កើតឡើងរួមគ្នា មានអង្គការក្រៅរដ្ឋាភិបាល និងអង្គការសហប្រជាជាតិចូលរួម»។
លោក ស៊ូប៊ែរឌី ក៏បានអំពាវនាវឲ្យអាជ្ញាធរដោះលែងមនុស្ស ២៣នាក់ ដែលបានចាប់ខ្លួននៅក្នុងការបង្ក្រាបនោះឲ្យនៅក្រៅឃុំផងដែរ។ លោកបន្តថា៖ «ខ្ញុំថ្កោលទោសការឃុំខ្លួនរយៈពេលជាច្រើនថ្ងៃ ទៅលើអ្នក ២៣ នាក់នោះ ដោយមិនអនុញ្ញាតឲ្យអ្នកផ្សេងទៅជួប ហើយជំរុញអាជ្ញាធរការពារកុំឲ្យមានការកើតឡើងនូវករណីរំលោភបំពានសិទ្ធិមនុស្សបែបនេះទៀត»។
បាតុករ និងសកម្មជនទាំង ២៣នាក់ ដែលត្រូវចោទប្រកាន់ពីបទបង្កហិង្សាដោយចេតនានិងការបង្កការខូចខាតដោយចេតនា មានស្ថានទម្ងន់ទោស បន្ទាប់ពីត្រូវចាប់ខ្លួនកាលពីថ្ងៃ ២ និង ទី៣ មករា ហើយត្រូវឃុំខ្លួននៅមណ្ឌលកែប្រែ ទី៣ ក្នុងខេត្ត កំពង់ចាម។
បេសកជនអង្គការសហប្រជាជាតិក៏បានថ្លែងដែរថា រដ្ឋាភិបាលគួរបង្ហាញអំពីមូលដ្ឋានច្បាប់ ចំពោះការហាមប្រាមការប្រមូលផ្តុំជាសាធារណៈ គួរបង្កើតយន្តការដោយផ្អែកលើភ័ស្តុតាង ដើម្បីកំណត់ប្រាក់ឈ្នួលអប្បបរមាសម្រាប់កម្មករកាត់ដេរ គួរបង្កើតស្ថាប័នសិទ្ធិមនុស្សឯករាជ្យមួយ និងដោះស្រាយក្តីបារម្ភអំពីបញ្ហាជម្លោះដីធ្លី ដែលនៅបន្តកើតមាន។
នៅក្នុងបទសម្ភាសជាមួយ ភ្នំពេញ ប៉ុស្តិ៍ កាលពីថ្ងៃពុធ លោក ស៊ូប៊ែរឌី បានថ្លែងថា លោកនាយករដ្ឋមន្រ្តី ហ៊ុន សែន បានបង្ហើបអំពីគំនិតឲ្យមានរូបលោកជាអ្នកសម្របសម្រួលក្នុងការជជែករវាងគណបក្សនយោបាយទាំងពីរដើម្បីដោះស្រាយភាពជាប់គាំងនយោបាយ។
លោកថ្លែងថា៖ «ប្រសិនបើភាគីទាំងពីរធ្វើសំណើមកខ្ញុំឬទៅអង្គការសហប្រជាជាតិ សុំឲ្យខ្ញុំធ្វើជាអ្នកសម្របសម្រួលនោះខ្ញុំនឹងពិចារណាសំណើនេះ»។ មានរចនាសម្ព័ន្ធជាច្រើននៅក្នុងប្រព័ន្ធអង្គការសហប្រជាជាតិ ដែលទាំងអស់គ្នាត្រូវពិចារណាឲ្យបានខ្លាំងក្លា»។
លោក ជាម យៀប បានថ្លែងថា លោកស្វាគមន៍ការស្ម័គ្រចិត្តរបស់លោក ស៊ូប៊ែរឌី ក្នុងការធ្វើជាអ្នកសម្របសម្រួលនេះ។ តែថា វានៅមិនទាន់មានសំណើផ្លូវការពីគណបក្សប្រជាជនទេ។
លោកបន្តថា៖ «ជាលក្ខណៈបុគ្គល ខ្ញុំស្វាគមន៍លោក ស៊ូប៊ែរឌី ដើរតួជាអ្នកសម្របសម្រួលរវាងគណបក្សទាំងពីរ ហើយគំនិតនេះ បានផ្តួចផ្តើមឡើងដោយសម្តេច ហ៊ុន សែន។ នេះគឺជាជោគជ័យមួយ»។
ប្រធានគណបក្សសង្គ្រោះជាតិលោក សម រង្ស៊ី មិនអាចទាក់ទងសុំអត្ថាធិប្បាយបានទេកាលពីម្សិលមិញ ប៉ុន្តែបន្ទាប់ពីជំនួបជាមួយលោក ស៊ូប៊ែរឌី កាលពីល្ងាចថ្ងៃពុធ លោកសរសេរសារនៅលើ ហ្វេសប៊ុក លោកថា៖ «គណបក្សសង្គ្រោះជាតិស្វាគមន៍ការសម្របសម្រួលណាពីអង្គការសហប្រជាជាតិដើម្បីបំបែកភាពជាប់គាំងនយោបាយបច្ចុប្បន្ន ប៉ុន្តែ យើងនឹងចូលរួមប្រជុំសភា លុះត្រាតែមានការធានាថា នឹងមានកំណែទម្រង់ខ្លាំងក្លាលើការបោះឆ្នោត…មុនពេលធ្វើការបោះឆ្នោតជាថ្មីនាពេលខាងមុខឆាប់ៗ»។
លោក ស៊ូប៊ែរឌី បានបន្តថា ការដោះស្រាយនយោបាយបន្ទាប់ពីការចរចាប្រកបដោយជោគជ័យ គឺជាវិធីតែមួយគត់ដើម្បីដោះស្រាយវិបត្តិនៅកម្ពុជា៕ PS
រាយការណ៍បន្ថែមៈ វង្ស សុខេង
អ្នក បាញ់ សម្លាប់ កម្មករ កម្មការីនី គ្មានអាវុធ អោយស្លាប់ និង របួសធ្ងន់ ត្រូវយកមកកាត់ទោស
ដើម្បីពង្រឹង និតិរដ្ឋ នៅកម្ពុជា ! ( ឬ ក៏ ចង់ធ្វើតាម ជនពាលត្រូវសម្លាប់អ្នកអែង សងសឹក វិញ ! )
អរគុណសម្ដេចដែលមិនទុកឲ្យពួកមនុស្សពាលធ្វើតាមតែអំពើចិត្តទៀត។ ប្រសិនបើសម្ដេចមិនធ្វើដូច្នេះទេ នោះពួកមនុស្សពាល ពួកអាណាធិបតេយ្យនឹងនៅតែបង្ករព្យុះភ្លៀង តាមតែអំពើចិត្ត។ ការធ្វើល្អ រក្សាសន្ដិសុខសង្គម ការរក្សាសេចក្ដីថ្លៃថ្នូរ ការអភិវឌ្ឍន៍ទាំងផ្លូវចិត្ត ផ្លូវគំនិត ទាំងសង្គមជាតិ ប្រទេសជាតិ មិនមែនជារឿងងាយស្រួលទេ។ គ្មានអ្នកណាអាចផ្គាប់ចិត្តមនុស្សគ្រប់គ្នាបានទេ សូម្បីតែព្រះអាទិករ ក៏មិនអាចផ្គាប់ចិត្តមនុស្សបានដែរ។ យើងខ្ញុំស្រឡាញ់សម្ដេច មានតែសម្ដេចម្នាក់ប៉ុណ្ណោះដែលអាចធ្វើឲ្យស្ថានភាពបែបនេះស្ងប់។ សូម្បីតែឪពុកក្នុងគ្រួសារ ពេលប្រដៅកូន ក៏កូនមិនសប្បាយចិត្តដែរ តែបើកូននោះខ្វះការប្រដៅ កូននោះនឹងខូច។