គ្រឹះស្ថានអប់រំនិងស្ថាប័នរដ្ឋមួយចំនួន បានបិទទ្វារនៅក្នុងពិធីបុណ្យចូលឆ្នាំប្រពៃណីចិន-វៀតណាម ឆ្នាំនេះ។ បញ្ហានេះសម្រាប់មន្ត្រីរដ្ឋាភិបាលថ្លែងថា រដ្ឋាភិបាលមិនបានប្រកាសឲ្យអ្នកធ្វើការនៅក្នុងស្ថាប័នរដ្ឋឈប់សម្រាកទេ។ ប៉ុន្តែបានបើកទូលាយដល់អ្នកមានជំនឿសាសនាផ្សេងៗ ដោយមិនមានការហាមឃាត់។
ដោយ ដែន អយុធ្យា
2014-01-30
RFA
ស្ដាប់ ឬ ទាញយកសំឡេង
ទិដ្ឋភាពនៅផ្សារថ្មីក្នុងថ្ងៃចូលឆ្នាំចិន វៀតណាម ថ្ងៃទី៣០ មករា ឆ្នាំ២០១៤។ RFA/Den Ayuthyea
លោក រ៉ុង ឈុន ប្រធានសមាគមគ្រូបង្រៀនកម្ពុជាឯករាជ្យ នៅថ្ងៃព្រហស្បតិ៍ ទី៣០ ខែមករា រិះគន់ការបិទទ្វារសាលា ឬក៏គ្រឹះស្ថានអប់រំ និងស្ថាប័នរដ្ឋខ្លះ មិនមានមនុស្សធ្វើការ។ លោកថា បញ្ហានេះដោយសារតែការគ្រប់គ្រងតាមស្ថាប័ននានា ឬថ្នាក់ដឹកនាំរដ្ឋាភិបាលមិនមានសមត្ថភាព។ លោកថា បញ្ហានេះនឹងអាចនាំឲ្យក្លាយជាទម្លាប់មួយនៅក្នុងសង្គមកម្ពុជា និងប៉ះពាល់ដល់គុណភាពនៃការអប់រំនៅថ្ងៃអនាគត ព្រោះរឿងនេះមិនមែនជារឿងថ្មីទេ។
លោក រ៉ុង ឈុន ថ្លែងថា តាមការសង្កេតនៅក្នុងពិធីបុណ្យចូលឆ្នាំចិន និងវៀតណាម ក្នុងប៉ុន្មានឆ្នាំចុងក្រោយនេះ គឺឃើញមានគ្រឹះស្ថានអប់រំនិងស្ថាប័នរដ្ឋខ្លះបានបិទទ្វារមិនដំណើរការ ដោយសារតែមិនមានមនុស្សមកធ្វើការ ឬគ្មានសិស្សមករៀនជាដើម។
ស្រដៀងគ្នាដែរ សម្រាប់លោកបណ្ឌិត សុខ ទូច អ្នកវិភាគឯករាជ្យនិងជាសកលវិទ្យាធិការនៃសកលវិទ្យាល័យខេមរៈ យល់ឃើញថា ពលរដ្ឋខ្មែរភាគច្រើនឆាប់ទទួលឥទ្ធិពលពីបរទេស និងឲ្យតម្លៃខ្ពស់ចំពោះវប្បធម៌ហូរចូលពីបរទេស។ លោកថ្លែងថា សព្វថ្ងៃនេះ ទោះបីស្ថាប័នរដ្ឋ ឬគ្រឹះស្ថានអប់រំ និងផ្នែកឯកជនផ្សេងទៀត បានបើកទ្វារដំណើរការជាធម្មតាបែបណាក្តី ក៏ប៉ុន្តែមិនមានមនុស្សមកធ្វើការ ឬក៏សិស្សសាលា និងគ្រូមកបង្រៀន ឬរៀនទេ។
លោកបណ្ឌិត សុខ ទូច បញ្ជាក់ថា លំហូរចូលនៃវប្បធម៌បរទេសនៅក្នុងសង្គមកម្ពុជា សព្វថ្ងៃនេះ ទំនងជាមិនអាចទប់ស្កាត់បានទេ។ ព្រោះថា សូម្បីតែនៅក្នុងស្ថាប័នរដ្ឋ និងស្ថាប័នពាក់ព័ន្ធឯកជនផ្សេងៗ គឺភាគច្រើន អ្នកដឹកនាំបានជាប់សែស្រឡាយកាត់ចិន ឬវៀតណាម។
លោកបណ្ឌិត សុខ ទូច បានលើកយកសាកលវិទ្យាល័យខេមរៈ ដែលលោកគ្រប់គ្រងសព្វថ្ងៃ គឺថ្នាក់ដឹកនាំសាលាមិនបានអនុញ្ញាតឲ្យគ្រូបង្រៀន ឬសិស្សឈប់សម្រាកនៅថ្ងៃបុណ្យចូលឆ្នាំចិន និងវៀតណាមទេ ប៉ុន្តែគ្រូបង្រៀននិងសិស្ស មិនបានមកបង្រៀន ឬមករៀនទេ ជាហេតុនាំឲ្យសាលាបិទទ្វារ។
បញ្ហានេះដែរ សម្រាប់សិស្សានុសិស្សចាប់ពីថ្នាក់ឧត្ដមសិក្សាដល់ថ្នាក់បឋម ភាគច្រើនបានថ្លែងថា ពួកគេបានសុំច្បាប់សាលាមិនទៅរៀនទេ ព្រោះជាប់រវល់ធ្វើពិធីសែនព្រេនដល់ដូនតាក្នុងពិធីបុណ្យចូលឆ្នាំចិន ឬវៀតណាម ជាមួយឪពុកម្ដាយរបស់ពួកគេ។
ចំណែកបុគ្គលិកបម្រើការនៅតាមក្រុមហ៊ុន ឬរោងចក្រខ្លះបានឲ្យដឹងថា ពួកគេត្រូវបានថៅកែ ឬប្រធានក្រុមហ៊ុនរបស់ខ្លួនអនុញ្ញាតឲ្យឈប់សម្រាកក្នុងអំឡុងពេលពិធីបុណ្យចូលឆ្នាំចិន វៀតណាម ដោយមិនចាំបាច់សុំច្បាប់ទេ។
វិទ្យុអាស៊ីសេរីមិនអាចទាក់ទងមន្ត្រីក្រសួងអប់រំយុវជននិងកីឡា ដើម្បីបំភ្លឺជុំវិញការបិទទ្វារគ្រឹះស្ថានអប់រំ ទាំងឯកជន និងស្ថាប័នរដ្ឋមួយចំនួននៅថ្ងៃបុណ្យចូលឆ្នាំចិន វៀតណាម បានទេ នៅថ្ងៃទី៣០ ខែមករា។ ប៉ុន្តែសម្រាប់លោក ផៃ ស៊ីផាន មន្ត្រីនាំពាក្យទីស្ដីការគណៈរដ្ឋមន្ត្រីបានថ្លែងថា រដ្ឋធម្មនុញ្ញកម្ពុជា បានបើកទូលាយជូនប្រជាពលរដ្ឋនូវការគោរព ឬប្រតិបត្តិជំនឿសាសនាផ្សេងៗ។ ទោះយ៉ាងណា ជារៀងរាល់ឆ្នាំនៅក្នុងពិធីបុណ្យចូលឆ្នាំចិន ឬវៀតណាម រដ្ឋាភិបាលមិនបានប្រកាសឲ្យស្ថាប័នរដ្ឋនានាឈប់សម្រាកទេ។
យ៉ាងណាក៏ដោយ មន្ត្រីសង្គមស៊ីវិលនិងអ្នកឃ្លាំមើលការអភិវឌ្ឍសង្គមខ្លះមើលឃើញថា នៅក្នុងឱកាសបុណ្យចូលឆ្នាំចិននិងវៀតណាម ក្នុងទសវត្សចុងក្រោយនេះ មានស្ថាប័នរដ្ឋ ឬគ្រឹះស្ថានអប់រំភាគច្រើននៅរាជធានីភ្នំពេញ បានបិទទ្វារមិនដំណើរការ ដោយសារតែមិនមានមនុស្សទៅធ្វើការ ឬមិនមានសិស្សទៅរៀនជាដើម។ ប៉ុន្តែបញ្ហានេះមិនមានប្រតិកម្មណាមួយពីថ្នាក់ដឹកនាំរដ្ឋាភិបាលទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
- អាមេរិកនិងកម្ពុជាប្រកាសដាក់ឲ្យប្រើប្រាស់សៀវភៅបំណិនជីវិត
- គ្រូបង្រៀននៅកំពង់ឆ្នាំងចោទប្រធានការិយាល័យស្រុកថាគំរាមមិនឲ្យធ្វើបាតុកម្ម
- គ្រូបង្រៀនតាមសាលាខ្លះបន្តធ្វើកូដកម្មទាមទារប្រាក់ខែ១លានរៀល
- សមាគមគ្រូបង្រៀនដាក់ឯកសារស្ដីពីគោលនយោបាយអប់រំជូនរដ្ឋាភិបាល
- គ្រូបង្រៀនជាង១ពាន់នាក់នៅឧត្តរមានជ័យមិនទាន់បើកបៀវត្សខែវិច្ឆិកា
- សាលាបឋមសិក្សាសាមគ្គីកម្ពុជា-វៀតណាមនៅខេត្តព្រៃវែង
- លោក ហ៊ុន សែន អនុញ្ញាតឲ្យជនពិការធ្វើគ្រូបង្រៀននៅឆ្នាំ២០១៤
- មន្ត្រីមជ្ឈមណ្ឌលបណ្ដុះបណ្ដាលវិជ្ជាជីវៈខេត្តព្រៃវែងរងការរិះគន់ថាពុករលួយ
- លោក ហ៊ុន សែន ជំរុញឲ្យមានកម្មវិធីអប់រំប្រឆាំងអំពើពុករលួយក្នុងសាលា
Next is to have vietnamese and chinese flags flying at king palace, national assembly, and pm office during chinese and vn new year. This way is more completed picture of cambodia today and future looks like
មិនមែនជាប្រពែណីខ្មែរទេ។
ខ្ញុំសង្កេតឃើញ ប្រជាជនខ្មែរ
ភាគច្រើនទាំង ទីក្រុង និងជនបទ
នាំគ្នាអបអរសារទរចូលឆ្នាំចិន
នាំអោយទំនិញឡើងថ្លៃ និង
ធ្វើអោយប្រពៃណី វប្បធម៌
របស់ខ្លួនធ្លាក់ចុះខ្សោយ ។
មួយទៀត រឿងសំលៀកបំពាក់
ស្តាយដេលហូរចូលពីប្រទេសគេ
ស៊ិចស៊ី កប់ក្រលៀន ខ្លះដូចស្លៀកលីអូ
សឹងតែមិនពាក់អាវ…តើនឹងវាជា
ប្រពៃណីខ្មែរឬ ?