ដោយ៖ កាន់ វិច្ឆិកា
ថ្ងៃអង្គារ ទី11 ខែកុម្ភៈ ឆ្នាំ2014
http://vodhotnews.com
ស្តាប់សំឡេង៖ |
ចម្លងទុក |
អ្នកជាប់ឃុំ៣នាក់ ដែលកំពុងជាប់ឃុំនៅពន្ធនាគារត្រពាំងផ្លុង បន្តធ្វើកូដកម្មអត់អាហារ នៅថ្ងៃអង្គារនេះ ខណៈអ្នកជាប់ឃុំ ១៨នាក់ផ្សេងទៀត ឆ្លាស់គ្នាអត់អាហារម្តងម្នាក់។
ប្រធានពន្ធនាគារត្រពាំងផ្លុង លោក គា សុវណ្ណ មានប្រសាសន៍ប្រាប់ VOD នៅរសៀលថ្ងៃអង្គារនេះថា អ្នកជាប់ឃុំ ៣នាក់ ក្នុងនោះមានលោកចាន់ ពុទ្ធិស័ក្ក សកម្មជនដីធ្លីនៅតំបន់បឹងកក់ និងកម្មករពីរនាក់ទៀត បាន បន្តធ្វើកូដកម្មអត់អាហារនៅថ្ងៃនេះ ដោយពួកគេទទួលទានតែទឹក ដោយឡែកអ្នកជាប់ឃុំ១៨នាក់ផ្សេងទៀត បានឆ្លាស់គ្នាអត់អាហារម្តងម្នា្កក់ ដោយអ្នកខ្លះអត់អាហារពេលថ្ងៃ ហើយខ្លះទៀតអត់អាហារនៅពេលល្ងាច។ តែទោះជាយ៉ាងណា លោកថា អ្នកទាំង២១នាក់នោះ មានសុខភាពធម្មតាទេ <<ហូបទៅ អ្នកអត់ផ្សេងគេរំលែកគ្នា អត់មានតែបីនាក់ទេ អត់សោះ ធម្មតា ផ្លាស់ប្តូរគ្នា។ ពេទ្យខ្ញុំឲ្យប្រចាំដែរហ្នឹង>>។
អ្នកស្រី ប្រាក់ សុវណ្ណារី ភរិយារបស់លោក វន់ ពៅ ដែលកំពុងមានជំងឺធ្ងន់ និងជិតដល់ពេលទៅពិនិត្យជំងឺផងនោះ ប្រាប់ VOD ថា អ្នកស្រីមានការបារម្ភពីសុខភាពរបស់ប្តីអ្នកស្រីណាស់ ដោយសារតែជំងឺរបស់ស្វាមីគាត់ពីមួយថ្ងៃទៅមួយថ្ងៃ កាន់តែធ្ងន់ជាងមុន។ អ្នកស្រី បានសំណូមពរឲ្យរដ្ឋាភិបាល ក៏ដូចជាស្ថាប័នដែលពាក់ព័ន្ធ ជួយអន្តរាគមន៍ឲ្យអ្នកទាំង២១នាក់បាននៅក្រៅឃុំ ជាពិសេសស្វាមីរបស់អ្នកស្រី អាចបានទៅពិនិត្យ និងព្យាបាលជំងឺផង <<គាត់កំពុងតែមានជំងឺធ្ងន់ធ្ងរខ្លាំងមែនទែន ហើយណាមួយគាត់ជិតដល់ថ្ងៃណាត់ជាមួយពេទ្យ នៅថ្ងៃទី១៨ខែ២ហ្នឹង ដើម្បីពិនិត្យសុខភាពរបស់គាត់ ពីព្រោះអ្វីដែលខ្ញុំបានទៅជួបគាត់នៅក្នុងពន្ធនាគារហ្នឹង គឺគាត់មានស្ថានភាពតឹងរឹង ហើយស្ថានភាពរបស់គាត់ រឹតតែខ្សោយទៅៗ ដោយសារតែទីមួយ គាត់អត់អាហារ ទីពីរ គឺគាត់កំពុងតែរាគផង ក្អួតផង ហើយអញ្ចឹងអ្វីដែលខ្ញុំព្រួយបារម្ភ គឺសុខភាពរបស់គាត់ ពីព្រោះខ្ញុំខ្លាចគាត់បាត់បង់ជីវិតនៅក្នុងពន្ធនាគារ>>។
អ្នកនាំពាក្យក្រសួងមហាផ្ទៃ លោក ខៀវ សុភ័គ មានប្រសាសន៍ថា លោកមិនទាន់បានទទួលរបាយការណ៍ពីខាងពន្ធនាគារ លើករណីធ្វើកូដកម្មអត់អាហាររបស់អ្នកទាំង២១នាក់នោះ នៅឡើយទេ ប៉ុន្តែលោកថា ពួកគាត់ទាំងនោះ គួរតែរក្សាសុខភាពឲ្យបានល្អ និងមិនគួរធ្វើកូដកម្មបង្អត់អាហារបែបនេះទេ <<បើសិនគាត់ធ្វើកូដកម្ម មានតែអង្វរគាត់ឲ្យទទួលទានអាហារទៅ ដូចគេដូចឯង។ ការដែលធ្វើកូដកម្មអត់អាហារហ្នឹង មិនមែនឋិតនៅក្នុងការដែលស្រលាញ់ខ្លួនទេ ហើយឋិតនៅក្នុងធម៌ព្រះពុទ្ធទៀតផង អ្នកដែលបង្អត់អាហារ ដែលខំរស់ខំអីមកជាមួយគេ គង់តែថ្ងៃណាមួយវាបានជោគជ័យ ឬក៏បានសម្រេច វាមិនមែនកើតមក គេមានការអត់ធ្មត់អត់អីអញ្ចឹង។ វាមិនដែលជាប់ពន្ធនាគារមួយជីវិតទេ>>។
អ្នកគ្រប់គ្រងបច្ចេកទេសឃ្លាំមើលការរំលោភសិទ្ធិមនុស្សនៃអង្គការលីកាដូ លោក អំ សំអាត ឲ្យដឹងថា សាលាឧទ្ធរណ៍គួរតែអនុញ្ញាតឲ្យអ្នកជាប់ឃុំទាំង២១នាក់នោះនៅក្រៅឃុំ ព្រោះថាបទល្មើសរបស់ពួកគាត់ គឺជាបទមជ្ឈិម និងមានការធានាយ៉ាងត្រឹមត្រូវ។
អ្នកជាប់ទាំង២១នាក់នៅពន្ធនាគារត្រពាំងផ្លុង បានធ្វើកូដកម្មបង្អត់អាហារតាំងពីថ្ងៃទី០៩ ខែមករាមក ដើម្បីទាមទារឲ្យមានការដោះលែងពួកគាត់នៅក្រៅឃុំ ប៉ុន្តែនៅព្រឹកថ្ងៃអង្គារនេះ សាលាឧទ្ធរណ៍ បានបដិសេធបណ្តឹងសុំនៅក្រៅឃុំរបស់ពួកគេ ដោយលើកហេតុផលថា ការដោះលែងនៅពេលនេះអាចនាំឲ្យប៉ះពាល់ដល់សណ្តាប់ធ្នាប់សាធារណៈ និងប៉ះពាល់ដំណើរការសវនការ ខណៈសុំណុំរឿងនេះកំពុងស្ថិតក្នុងដំណាក់កាលស៊ើបអង្កេតនៅឡើយ៕
សរសេរមកកាន់ កញ្ញា កាន់ វិច្ឆិកា តាមរយៈ vecheika@vodhotnews.com
ទង្វើជ្រុលនិយមមិនបានការអ្វីឡើយ។ទុក្ករកិរិយារបស់ព្រះសម្មាសម្ពុទ្ធបរមគ្រូនៃយើងរកនិព្វាន្តមិនឃើញ ទេ។មធ្យោបាយដ៍ល្អប្រសើរតែមួយគត់សម្រាប់យើងរាល់គ្នាជាបុថុជ្ជន គឺលះបង់គំនិតជ្រុលនិយមប្រកាន់ យកផ្លូវកណ្ដាល ទទួលស្គាល់នូវទោសកំហុសរបស់ខ្លួនរម្ងាប់អារម្មណ៍ផ្ងំទុកអំពើល្អដែលជាកុសលដល់ អ្នកផងទាំងពួងទៅអនាគតខាងមុខ។កុំសង្ឃឹមលើការបោកប្រាសពីសំណាល់មេបោកឲ្យសោះគ្មានបាន ប្រយោជន៍អាចម៍អីទេ លទ្ធផលឃើញច្បាស់នឹងភ្នែកស្រាប់ហើយ គឺអញ្ចឹងឯង។«អត្តាហិ អត្តនោនាថោ កោហិនាថោ បរោសិយា»។ចូរចំរើន!ចូរចំរើន!
ការខិតខំសម្តែងធ្វើជាអត់អាហាររបស់អស់លោក អ្នកទាំងអស់គ្នានេះ មិនផ្តល់លទ្ធផលទេ។ បើសិនជាផ្តល់លទ្ធផលនោះ ពុំមានអ្នកជាប់គុកនោះទេ! នោះអ្នកទោសទាំងអស់គ្នា នាំគ្នាអត់អាហារ ដើម្បីបានរួចខ្លួនអស់ហើយ។
ណ្ហើយ សាកល្បងជាមួយគុក បាន កន្លះឆ្នាំ ឬមួយឆ្នាំទៅ បំណាច់ថា យើងពូកែផ្លុំកញ្ចែរបញ្ជាក្រុមអនាធិបតេយ្យសម្រុកវាយបំផ្លាញរោងចក្រ និងទ្រព្រសម្បត្តិគេនោះ គឺវាអញ្ចឹង!