ដោយ៖ ឡាយ សាមាន និង ស៊ុន ណារិន
ថ្ងៃចន្ទ ទី3 ខែមិនា ឆ្នាំ2014
http://vodhotnews.com
ស្តាប់សំឡេង៖ |
ចម្លងទុក |
ប្រមុខរាជរដ្ឋាភិបាលកម្ពុជា នៅថ្ងៃចន្ទនេះ អំពាវនាវឲ្យកាត់បន្ថយការចម្លងវប្បធម៌ពីបរទេស និងចៀសវាងការលួចចម្លងកម្មសិទ្ធិបញ្ញា ដែលធ្វើឲ្យប៉ះពាល់ដល់វប្បធម៌កម្ពុជា ដោយដាក់អនុសាសន៍មួយចំនួនសម្រាប់ក្រសួងវប្បធម៌ វិចិត្រសិល្បៈ និងក្រសួងអប់រំ យុវជន និងកីឡា។
ការអំពាវនាវនេះធ្វើឡើង នៅក្នុងទិវាវប្បធម៌ជាតិលើកទី ១៦ នៅព្រឹកថ្ងៃទី០៣ ខែមិនា ឆ្នាំ២០១៤ នៅសាលសន្និសីទចតុមុខ។នាយករដ្ឋមន្ត្រី លោក ហ៊ុន សែន បានថ្លែងថា បច្ចុប្បន្ន សម្បត្តិបេតិកភ័ណ្ឌ បានចូលរួមចំណែកធ្វើឲ្យកេរ្តិ៍ឈ្មោះកម្ពុជា មានភាពល្បីល្បាញទូទាំងពិភពលោក។ ជាមួយភាពល្បីល្បាញរបស់កម្ពុជា លោកហ៊ុន សែន សើ្នឲ្យផលិតកម្មក្នុងស្រុក កាត់បន្ថយ និងជៀសវាងការលួចចម្លងវប្បធម៌ និងស្នាដៃបរទេស ដោយចាត់ទុកការលួចចម្លងជាទោសកំហុសមួយ នាំឲ្យមានភាពអាប់អោនមួយដល់ជាតិ «បង្កើតផលិតផលវប្បធម៌ថ្មី ឲ្យបានច្រើន ដែលនឹងបម្រើឲ្យផលប្រយោជន៍ ច្រើនថែមទៀតដល់សង្គមជាតិ និងប្រជាជន ប៉ុន្តែដាច់ខាតមិនអាចអភិវឌ្ឍវប្បធម៌សិល្បៈ ដែលប្រាសចាកពីទម្រង់នៃវប្បធម៌ជាតិ ប្រាសចាកពីសេចក្តីថ្លៃថ្នូរ និងគុណធម៌របស់មនុស្សជាតិបានឡើយ។ ទន្ទឹមនេះ សូមកាត់បន្ថយនិងចៀសវាងការលួចចម្លងទាំងដុល នូវស្នាដៃ នៃសិល្បៈរបស់បរទេស»។
លោកនាយករដ្ឋមន្ត្រី ហ៊ុន សែន ក៏បានស្នើឲ្យក្រសួងអប់រំ សហការជាមួយក្រសួងវប្បធម៌ ដាក់បញ្ចូលកម្មវិធីសិក្សាស្តីពីវប្បធម៌ សិល្បៈ ទៅដល់យុវជន និងក្មេងជំនាន់ក្រោយ ដែលជាអ្នកបន្តវេនក្នុងការការពារ និងថែរក្សាវប្បធម៌ និងសិល្បៈ។ លោកនាយករដ្ឋមន្ត្រី ជំរុញឲ្យក្រសួងវប្បធម៌ បង្កើតវគ្គបណ្តុះបណ្តាល ដើម្បីផ្តល់ជំនាញ និងចំណេះពិតប្រាកដដល់ពលរដ្ឋកម្ពុជា ដើម្បីឈានដល់ការបង្កើតស្នាដៃដោយខ្លួនឯង ដើម្បីរក្សាវប្បធម៌ និងសិល្បៈឲ្យស្ថិតស្ថេរប្រកបដោយចីរភាព។
ថ្មីៗនេះ ក្រសួងព័ត៌មាន បានចុះអនុស្សរណៈយោគយល់(MOU) ជាមួយវិស័យឯកជន ក្នុងនោះរួមមានក្រុមហ៊ុន Sabay Digital Corporation មជ្ឈមណ្ឌលតន្ត្រី Madison និង ក្រុមហ៊ុន TY KEA ដើម្បីសម្ពោធបើកកម្មវិធី “ស្ដាប់ចម្រៀងរបស់ខ្ញុំ”ជ្រើសរើសរកឲ្យបានអ្នកនិពន្ធថ្មី ក្នុងការផលិតបទចម្រៀងថ្មី គឺថ្មីទាំងទំនុកច្រៀង និងទំនុកភ្លេង។រដ្ឋមន្ត្រីក្រសួងព័ត៌មាន លោក ខៀវ កាញារីទ្ធ លើកឡើងថា ប្រភពទីផ្សារ និង សម្ពាធពាណិជ្ជកម្ម បានតម្រូវឲ្យមានការលួចចម្លង ព្រោះថា អ្នកនិពន្ធម្នាក់ មិនអាចនិពន្ធបទចម្រៀង ១០ បទ ក្នុង១ខែ គឺយ៉ាងច្រើនបាន ១ ឬ ២ បទប៉ុណ្ណោះ។
ប្រធានសមាគមសិល្បៈកម្ពុជា លោក សុះ ម៉ាច មានប្រសាសន៍ថា ការអំពាវនាវរបស់នាយករដ្ឋមន្ត្រី ជាចំណុចដែលសមាគមសិល្បៈខ្មែរ ចង់ឃើញ។ លោកបន្តថា កូនខ្មែរ គឺជាឈាមជ័រអ្នកសិល្បៈ ដូចនេះគួរតែមានគំនិតច្នៃប្រឌិតដោយខ្លួនឯង ដើម្បីរក្សាវប្បធម៌ខ្មែរឲ្យបានគង់វង្ស។ លោក ក៏បានអំពាវឲ្យប្រជាពលរដ្ឋមួយចំនួន ឈប់រើសអើងអ្នកសិល្បៈមួយចំនួន ដែលមាននិន្នាការខាងគណបក្ស ហើយគួរបន្តជំរុញ និងលើកទឹកចិត្តពួកគាត់បន្ថែមទៀតទាំងការសម្តែង ច្រៀង និងនិពន្ធផងដែរ «វាទំនើបជាងសម័យមុខទៅទៀត ដូច្នេះពួកគាត់ចេះដឹងច្រើនគ្រប់គ្រាន់ និងមានសមត្ថភាពនិងអាចអ្វីដែលគាត់អាចបង្កើតស្នាដៃខ្លួនឯងបាន ប៉ុន្តែដោយសារទំនោរ លើវប្បធម៌បរទេសហូរចូលញឹកខ្លាំងពេក អ្នកស្តាប់ ជាពិសេសយុវវ័យយើង គាត់ក៏មានទំនោរ ទៅខាងវប្បធម៌បរទេស ធ្វើឲ្យការផលិតបទចម្រៀងពីម្ចាស់ផលិតកម្ម គាត់គិតតែពីយកបទបរទេស ដើម្បីបំពេញតម្រូវការទៅលើអ្នកស្តាប់ ដែលគាត់ចង់បាន អ៊ីចឹងធ្វើឲ្យយើងមិនមានអ្វីបង្កើតស្នាដៃខ្លួនឯងក្រៅពីលួចចម្លងគេ»។
អ្នកនិពន្ធបទចម្រៀងនៅផលិតកម្មរស្មីហង្សមាស លោក សុខ ចាន់ផល មានប្រសាសន៍ថា ក្រសួងវប្បធម៌ និងវិចិត្រសិល្បៈ គួរតែមានវិធានការតឹងរឹងចំពោះផលិតកម្មណា ឬ បណ្តាក្រុមហ៊ុនណានាំចូលវប្បធម៌វបរទេស។ លោកបន្ត សព្វថ្ងៃនេះ លោកកំពុងនិពន្ធបទថ្មីៗដោយខ្លួនឯងជាច្រើន និងស្នើឲ្យអ្នកនិពន្ធផ្សេងទៀត កែច្នៃប្រឌិត និងបង្កើតគំនិតថ្មីៗដោយខ្លួនឯង «ខ្ញុំក៏កំពុងតែធ្វើបទថ្មីច្រើនដែរ ប៉ុន្តែគ្រាន់តែថា ក្រសួងហេតុអ្វីមិនបិទទាំងអស់តែម្តងទៅ នៅតែមានបទចម្លងអ៊ីចឹង ពិបាកណាស់។ យើងប្រកួតប្រជែងជាមួយបទចម្លង វាពិបាក បើគេបិទបទចម្លងអស់ទៅ បទថ្មីនឹងមានច្រើន។ អ្នកនិពន្ធគេមិនដែលចង់លួចចម្លងទេប្អូន ប៉ុន្តែដោយសារតែខាងក្រសួងហ្នឹង បើកដៃឲ្យផលិតកម្មធ្វើបទចម្លង អ៊ីចឹងបងគ្រាន់តែចង់ធ្វើម៉េចឲ្យខាងក្រសួង ចាំចាប់មានបទចម្លងធ្វើអ្វី បើបទតែម្តងទៅផលិតកម្មធ្វើបទចម្លងម៉េចចេញ»។
លោកនាយករដ្ឋមន្ត្រី ឲ្យដឹងទៀតថា ការបង្កើតស្នាដៃ និងផលិតផលសិល្បៈទស្សនីយភាពគ្រប់ប្រភេទ គ្រប់ទម្រង់ គឺមិនត្រឹមតែគិតឲ្យមានភាពល្អមើល និងពិរោះស្តាប់នោះទេ ប៉ុន្តែក្នុងនោះត្រូវមានបង្កប់នូវគំនិត និងទស្សនៈល្អៗ ដែលមានគុណប្រយោជន៍ក្នុងការលើកកម្ពស់នៃការអប់រំសិល្បៈធម៌ គុណធម៌ មនសិការស្នេហាជាតិ ក្នុងការអភិវឌ្ឍសង្គមផងដែរ៕
អត្ថបទទាក់ទង៖ អ្វីជាវាំងននខ្មៅ របស់សិល្បៈខ្មែរ?
សរសេរមកកាន់ លោក ឡាយ សាមាន តាមរយៈ samean@vodhotnews.com និងលោក ស៊ុន ណារិន តាមរយៈsun_narin@vodhotnews.com
Don’t say, just show. Don’t talk, just act. Don’t promise, just prove.
A JOY MRAY A JKORT ENG TROV TVE KUM ROUG MUNN KE PROS A JKORT HUN SEN TOV YOUN ORT NIYEARY KHMER 1 MUT SORS NIYEARY YOUN TING ORS A JOY MRAY TAM NANG OY KHMER TE TVE JKORT JKORT
បានតែថាទេ!