ដោយ៖ ឡុង គីមម៉ារីតា
ថ្ងៃអង្គារ ទី18 ខែមិនា ឆ្នាំ2014
http://vodhotnews.com
អាជ្ញាធរខេត្តរតនគិរី សន្យាថានឹងដោះលែងប្រជាពលរដ្ឋម្នាក់ដែលជាប្រធានសហគមន៍ព្រៃឈើ លោក ហាំង នឿ នៅថ្ងៃអង្គារនេះ បន្ទាប់ពីលោកត្រូវបានចាប់ខ្លួនកាលពីចុងសប្តាហ៍មុន រឿងទំនាស់ដីធ្លីជាមួយអ្នកមានអំណាច។
លោក ហាំង នឿ ត្រូវបានចាប់ខ្លួនកាលពីថ្ងៃសៅរ៍ សប្តាហ៍មុន ដោយសារទំនាស់ដីធ្លី នៅភូមិម៉ាស ឃុំប៉ូយ ស្រុកអូរជុំ ខេត្តរតនគីរី។ ការដោះលែងនេះ បន្ទាប់ពីពលរដ្ឋ បានចេញមុខតវ៉ានៅខាងមុខតុលាការខេត្ត ទាមទារឲ្យដោះលែងលោក ហាំង នឿ និងទាមទារដោះស្រាយទំនាស់ដីធ្លី។
អ្នកសម្របសម្រួលអង្គការអាដហុកប្រចាំខេត្តរតនគិរី លោក ឆាយ ធី មានប្រសាសន៍ថា សមត្ថកិច្ច សន្យាថានឹងដោះលែងនៅថ្ងៃអង្គារនេះ ក្រោយពេលបំពេញបែបបទរួចហើយ តែលោកមិនទាន់បញ្ជាក់ថា នឹងត្រូវដោះលែងនៅពេលណាឡើយ។
កាលពីថ្ងៃចន្ទ ប្រជាពលរដ្ឋនិយាយថា ប្រសិនបើគ្មានការដោះលែង លោក ហាំង នឿ ឲ្យមានសេរីភាពទេ ពួកគេនៅតែបន្តការតវ៉ា រហូតដល់មានការដោះលែង ។ប្រជាសហគមន៍ឲ្យដឹងទៀតថា ពួកគាត់នៅតែបន្តដាក់ពាក្យបណ្តឹងទៅតុលាការ លើសំណុំរឿងលោក សេង វិសិទ្ធ ពីបទឆបោកសហគមន៍ និង អ្នកស្រីលី សុខងីម កាប់ដីព្រៃសហគមន៍ជាង១៥ហិចតា នៅអូរច្រាំ ទល់ភ្នំម៉ូ។
ប្រជាសហគមន៍ជនជាតិភាគតិច អះអាងថា កាលពីពាក់ណ្តាលឆ្នាំ២០០៧ មន្ត្រីយោធានៅតំបន់ប្រតិបត្តិការសឹកខេត្តរតនគិរី ដែលជាតំណាងឲ្យក្រុមហ៊ុនអភិវឌ្ឍន៍យោធា បានសុំដីសហគមន៍ខាងលើដើម្បីដាំកៅស៊ូ ដោយសន្យាថានឹងអភិវឌ្ឍន៍ភូមិឃុំរបស់ពួកគាត់ និងឲ្យប្រាក់២០០០០ដុល្លារទៀត ប៉ុន្តែប្រជាសហគមន៍ពុំព្រម។
នៅក្នុងឆ្នាំ២០០៧ដដែល មន្ត្រីយោធាទាំងនោះ ក៏បានផ្ទេរសិទ្ធកាន់កាប់ទៅលោក សេង វិសិទ្ធ ដោយមិនមានការអភិវឌ្ឍន៍ដូចការសន្យាឡើយ រហូតមកដល់ពេលនេះ លោក សេង វិសិទ្ធបានផ្ទេរដីនេះទៅឲ្យអ្នកស្រី លី សុខងីម ធ្វើការកាប់រាន ទើបមានការតវ៉ានេះកើតឡើង៕
សរសេរមកកាន់កញ្ញា ឡុង គីមម៉ារីតា តាមរយៈ longkimmarita@gmail.com