ដោយ៖ បាន វិទ្យា
ថ្ងៃអង្គារ ទី18 ខែមិនា ឆ្នាំ2014
http://vodhotnews.com
លោក ឡាយ វណ្ណៈ អភិបាលរងខេត្តតាកែវ ត្រូវបានតែងតាំងជាអភិបាលខេត្តតាកែវ នៅថ្ងៃអង្គារនេះ ជំនួសលោក ស្រី បេន ដែលដល់អាយុចូលនិវត្តន៍ ខណៈដែលអភិបាលខេត្តរតនគិរី និងអភិបាលខេត្តព្រះសីហនុ នឹងចូលនិវត្តន៍នៅខែមេសា ខាងមុខនេះ។
ពិធីប្រកាសតែងតាំងអភិបាលខេត្តតាកែវថ្មីនេះ បានធ្វើឡើងនៅថ្ងៃទី១៨ ខែមីនានេះ ក្រោមអធិបតីភាព លោក ស ខេង ឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃ និងលោក សុខ អាន ឧបនាយករដ្ឋមន្ត្រី និងជារដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី។
អ្នកនាំពាក្យក្រសួងមហាផ្ទៃ លោក ខៀវ សុភ័គ បានឲ្យ VOD ដឹងនៅថ្ងៃអង្គារនេះថា លោក ស្រី បេន អភិបាលខេត្តតាកែវបច្ចុប្បន្ន នឹងត្រូវចូលនិវត្តន៍ ហើយលោក ឡាយ វណ្ណៈ អភិបាលរងខេត្តតាកែវ នឹងត្រូវឡើងកាន់តំណែងជាអភិបាលខេត្តជំនួស លោក ស្រី បេន។
លោកខៀវ សុភ័គ ធ្លាប់មានប្រសាសន៍ថា ក្រៅពីអភិបាលខេត្តតាកែវ លោកស្រី បេន ដែលត្រូវចូលនិវត្តន៍ នៅមានអភិបាលខេត្តពីរទៀត គឺអភិបាលរតនគីរី លោក ប៉ាវ ហមផាន និងអភិបាលខេត្តព្រះសីហនុ លោក ស្បោង សារ៉ាត នឹងត្រូវដល់អាយុចូលនិវត្តន៍ នៅខែមេសា ខាងមុខនេះ ប៉ុន្តែលោកមិនទាន់បានដឹងថា នឹងត្រូវមានពិធីប្រកាសផ្លាស់ប្តូរតំណែងនៅពេលណានោះទេ ដោយរងចាំព្រះរាជក្រឹត្យពីព្រះមហាក្សត្រ។
លោក ឡាយ វណ្ណៈ ដែលឡើងតំណែងជាអភិបាលខេត្តតាកែវថ្មីនេះ ជាកូនប្រសារបស់លោក ស៊ូ ភិរិន្ទ អតីតអភិបាលខេត្តសៀមរាប។ លោកឡាយ វណ្ណៈ និងមិត្តភ័ក្រ្តរបស់លោក ធ្លាប់រងនូវការចោទថា បានបង្កឲ្យផ្ទុះអាវុធ នៅក្នុងហាងខារ៉ាអូខេ យីហោ “រស្មីអង្គរ” កាលពីយប់ថ្ងៃទី៣ ខែកញ្ញា ឆ្នាំ២០១២ បណ្តាលឲ្យម្ចាស់ហាងរងរបួសជើង។
ករណីផ្ទុះអាវុធនោះ កើតឡើងនៅពេលក្រុមមន្ត្រីទាំងនោះ បានអួតកាំភ្លើងខ្លីដាក់គ្នា។ ប៉ុន្តែករណីនោះ គេមិនបានប្តឹងផ្តល់អ្វីទេ ហើយម្ចាស់ហាង អះអាងថា បានសម្រួលគ្នារួចហើយ៕
សូមសរសេរមកកាន់កញ្ញា បាន វិទ្យា តាមរយៈ vitcheaban@gmail.com
ចុំម៉េចមិនអោយកូនអាកឹម សុខាឡើងមួយផង, ព្រោះវាខំដើរធ្វើបាតុកម្ម
បុគ្គល ឡាយ វណ្ណៈ អភិបាលខេត្តតាកែវ ដែលទើបឡើងកាន់ដំណែងថ្មីនេះ ជាជនពាល ធ្លាប់ជាប់ពាក់ព័ន្ធនឹងរឿងបាញ់បោះសេរី ទៅលើថៅកែហាង រស្មីអង្គរ នៅខេត្តតាកែវ ដោយបញ្ហាជំលោះរឿងស្រីញី។ វាជារឿងមួយដ៏អាមាសបំផុតដែលបុគ្គលប្រភេទនេះមានឲកាសបានក្លាយជាថ្នាក់ដឹកនាំ ហើយមិនដឹងថាទៅថ្ងៃមុខ បុគ្គលម្នាក់នេះនិងប្រើអំណាចរបស់ខ្លួន ប្រព្រឹត្តិរឿងឧក្រិដ្ឋយ៉ាងណាទៀតទេ? មុខមាត់រដ្ឋាភិបាលខ្មែរយកទៅទុកនៅត្រង់ណា?