ដោយ៖ ពៅ មេត្តា
ថ្ងៃពុធ ទី19 ខែមិនា ឆ្នាំ2014
http://vodhotnews.com
តំណាងប្រព័ន្ធផ្សព្វផ្សាយ២០ស្ថាប័នកំពុងប្រជុំជជែកគ្នាអំពីការបញ្ជ្រាបគំនិតសន្តិភាពចូលក្នុងសារព័ត៌មាន (រូបភាព៖ពៅ មេត្តា)
ព័ត៌មានដើរតួយ៉ាងសំខាន់ក្នុងសង្គមប្រជាធិបតេយ្យ ក្នុងការនាំសារពីថ្នាក់ដឹកនាំទៅប្រជាពលរដ្ឋ និងនាំសារពីរប្រជាពលរដ្ឋមកអ្នកដឹកនាំវិញ។ លើសពីការនាំសារក្រុមអ្នកសារព័ត៌មានសន្តិភាពយល់ថា សារព័ត៌មានអាចនាំឲ្យសង្គមទទួលបានការអភិវឌ្ឍន៍ប្រកបដោយសន្តិភាព ដូច្នេះពួកគេប្តេជ្ញាបញ្ចូលគំនិតសន្តិភាពចូលក្នុងព័ត៌មានប្រចាំថ្ងៃដែលបានផលិត។
អ្នកសារព័ត៌មានមកពីស្ថាប័នមកពីស្ថាប័នចំនួន២០ផ្សេងៗ គ្នាបានប្តេជ្ញាបញ្ជូលគំនិតសន្តិភាពចូលក្នុងសារព័ត៌មានប្រចាំថ្ងៃរបស់ពួកគេ ដើម្បីចូលរួមជំរុញឲ្យសង្គមមានការអភិវឌ្ឍន៍ប្រកបដោយសន្តិភាព។
ការប្តេជ្ញានេះ ធ្វើឡើងក្នុងកម្មវិធីត្រួតពិនិត្យ និង វាយតម្លៃនៃការអនុវត្តន៍ព័ត៌មានសន្តិភាព រៀបកិច្ចពិភាក្សាដោយ ក្រុមការងារដើម្បីដោះស្រាយទំនាស់(ACT) និង មជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យ (CCIM) ធ្វើឡើងខេត្តមណ្ឌលគិរីពីថ្ងៃទី១៨ ដល់១៩ខែមីនា ដែលមានអ្នកសារព័ត៌មានមកពី២០ស្ថាប័នផ្សេងគ្នាចូលរួម។
នៅពេលបញ្ចប់កិច្ចពិភាក្សាត្រួតពិនិត្យ និងវាយតម្លៃលើការអនុវត្តព័ត៌មានសន្តិភាព លោក ហង្ស ចក្រា ជាចាងហ្វាងការផ្សាយរបស់ការសែត និង គេហទំព័រខ្មែរម្ចាស់ស្រុក មានអាជីពជាអ្នកសារព័ត៌មាន២១ឆ្នាំនិងធ្លាប់ជាប់ពន្ធនាគារដោយសារការផ្សាយព័ត៌មាន មានប្រសាសន៍ថា លោកបានបញ្ជ្រាបគំនិតសន្តិសភាព ក្នុងសារព័ត៌មានរបស់លោកជិត១ឆ្នាំហើយ។ លោកបន្តថា ព័ត៌មានសន្តិភាពអាចជួយឲ្យសង្គមមានសន្តិភាពដូច្នេះលោក បញ្ជូលគំនិតសន្តិសភាពទាំងការផ្សាយតាមកាសែត និង តាមគេហទំព័រ។
អ្នករាយការណ៍មកពីទូរទស្សន៍អាស៊ីអាគ្នេយ៍ លោក មករា មានប្រសាសន៍ថា គ្រប់ព័ត៌មានដែលក្រុមការងាររបស់លោកបានផ្សាយ សុទ្ធតែបានបញ្ជូលនូវខ្លឹមសារព័ត៌មានសន្តិភាព។
នាយិការប្រតិបត្តិក្រុមការងារដើម្បីដោះស្រាយទំនាស់ (ACT) កញ្ញា ស្រី សុធាវី មានប្រសាសន៍ថា សព្វថ្ងៃការផ្សាយព័ត៌មានបែបសន្តិភាពនៅមានកម្រិតទាបដោយសារ សេរីភាពព័ត៌មានមិនទាន់ទូលាយ និង ការយល់ដឹងរបស់អ្នកព័ត៌មានពីការបញ្ចូលខ្លឹមសារសន្តិភាពនៅមានកម្រិតទាប។ កញ្ញាបន្ថែមថា ប្រសិនបើការផ្សាយព័ត៌មានបែបសន្តិភាពបានទូលាយគឺជាកត្តាសំខាន់ក្នុងការនាំមកនូវសុខសន្តិភាពដល់សង្គម។
ក្នុងវគ្គបណ្តុះបណ្តាលពីសារព័ត៌មានសន្តិភាពមានការបង្រៀនពីររបៀបស្វែងរកបញ្ហា វិភាគលើបញ្ហា និង ការស្វែងរកដំណោះស្រាយ។ គោលដៅសំខាន់នៃព័ត៌មានសន្តិភាពគឺការផ្សាយព័ត៌មានពិតដល់សាធារណជន សមហេតុផលដែលភាគីពាក់ព័ន្ធអាចទទួលយកបាន ហើយសំខាន់នោះគឺបណ្តុះនូវគំនិតសន្តិសភាពដល់ អ្នកដែលទទួលព័ត៌មាន៕
សូមសរសេរមកកាន់លោក ពៅ មេត្តា តាមរយៈ minpov@vodhotnews.com