ដោយ៖​ ជន ស្រីណុច និង តាំង វីដា​
ថ្ងៃអាទិត្យ ទី30 ខែមិនា ឆ្នាំ2014
http://vodhotnews.com

មើលរូបភាពបន្ថែម

លោកស្រី លី សុធារី សាច់ញាតិជនរងគ្រោះក្នុងហេតុការណ៍វាយប្រហារគ្រាប់បែក មុខរដ្ឋសភាចាស់ (រូបថត៖ ជន ស្រីណុច)

​សាច់ញាតិ​ជនរងគ្រោះ​ក្នុង​ហេតុការណ៍​វាយប្រហារ​គ្រាប់បែក មុខ​មន្ទីរ​រដ្ឋសភា​ចាស់ នៅ​ថ្ងៃ​អាទិត្យ​នេះ ទទូច​ឲ្យ​រាជរដ្ឋាភិបាល​កម្ពុជា និង​ប្រព័ន្ធ​តុលាការ ពន្លឿន​ការស៊ើបអង្កេត​រកកា​រ​ពិត វែកមុខ​ជនល្មើស​ឲ្យបាន​ឆាប់រហ័ស ដើម្បី​យក​មក​ផ្តន្ទាទោស​។​

​ក្នុង​ពិធី​រម្លឹក​ខួប​១៧​ឆ្នាំ នៃ​ព្រឹត្តិការណ៍ ថ្ងៃទី​៣០ ខែ​មីនា ឆ្នាំ​១៩៩៧ លោកស្រី លី សុធា​រី សមាជិក​ព្រឹទ្ធសភា​មកពី​គណបក្ស​សម រង្ស៊ី និង​ជា​ម្តាយ លោក ចេត ចន្ទ​ដារ៉ាវុធ បាតុករ​ដែល​បាត់បង់​ជីវិត ថ្លែងថា លោកស្រី ខកចិត្ត​យ៉ាងខ្លាំង​ចំពោះ​អាជ្ញាធរ​កម្ពុជា ដែល​នៅ​មិនទាន់​អាច​រកឃើញ​ជនល្មើស​បាន​។ លោកស្រី ទទូច​ជាថ្មី​ដល់​រាជរដ្ឋាភិបាល​កម្ពុជា និង​តុលាការ ត្រូវ​មាន​ភាព​អព្យាក្រឹត្យ រក​យុត្តិធម៌​ឲ្យ​ជនរងគ្រោះ និង​សាច់ញាតិ ឲ្យបាន​ឆាប់រហ័ស​។ ទន្ទឹមគ្នានេះ សាច់ញាតិ​ដទៃទៀត ក៏​អំពាវនាវ​ដូចគ្នា ឲ្យ​សមត្ថកិច្ច ពន្លឿន​ការស៊ើបអង្កេត និង​ស្វែងរក​ការពិត​។​

ករណីនេះ អ្នកនាំពាក្យ​ក្រសួង​មហាផ្ទៃ លោក ខៀវ សុភ័គ ប្រាប់​VOD​ថា សមត្ថកិច្ច កំពុង​បន្ត​ការស៊ើបអង្កេត តែ​មិន​ទាន់​មាន​តម្រុយ​ថ្មី​នោះទេ​។​

លោក មឿន តុលា ប្រធាន​កម្មវិធី​សិទ្ធិ​ការងារ​មជ្ឈមណ្ឌល​អប់​រំ​ច្បាប់​សម្រាប់​សហគមន៍ និង​ជា​អ្នកតាមដាន​ហេតុការណ៍​នេះ យល់ថា អាជ្ញាធរ ហាក់​មិន​មាន​ឆន្ទៈ​ក្នុង​ការស្វែងរក​ការពិត​នោះ​ទេ ព្រោះ​កាល​នោះ ទីភ្នាក់ងារ FBI របស់​អាមេរិក បាន​បង្ហាញ​ឈ្មោះ​អ្នកពាក់ព័ន្ធ​មួយចំនួន តែ​មិន​ត្រូវបាន​អាជ្ញាធរ​កម្ពុជា អើពើ​នោះទេ​។ លោក ចាត់ទុក​ការអះអាង​បន្ត​ការស៊ើបអង្កេត​នេះ គ្រាន់តែ​ជា​លេស ពន្យារពេល ដើម្បី​បញ្ចប់រឿង​តែប៉ុណ្ណោះ​។​

​កាលពី​ថ្ងៃ​ទី ៣០ ខែ​មីនា ឆ្នាំ​១៩៩៧ ព្រឹត្តិការណ៍​វាយប្រហារ​ដោយ​គ្រាប់បែក ៤​គ្រាប់ លើ​ហ្វូង​បាតុករ​នៅ​មុខ​រដ្ឋសភា ដឹកនាំ​ដោយ​លោក​សម រង្ស៊ី ដែល​ពេលនោះ​ជា​ប្រធាន​គណបក្ស​ជាតិខ្មែរ និង​បច្ចុប្បន្ន​ជា​ប្រធាន​គណបក្ស​សង្គ្រោះ​ជាតិ បាន​បណ្តាលឲ្យ​មនុស្ស​ស្លាប់ ១៦​នាក់ និង​ជាង​១៥០​នាក់​ផ្សេង​ទៀត​រងរបួស​៕

សូមសរសេរមកកញ្ញា ជន ស្រី​ណុ​ច តាមរយៈ chornsreynoch@vodhotnews.com និងលោក តាំង វី​ដា​ តាមរយៈ vida@vodhotnews.com