ដោយ៖ ញឹម សុខន
ថ្ងៃព្រហស្បតិ៍ ទី3 ខែមេសា ឆ្នាំ2014
http://vodhotnews.com
ស្តាប់សំឡេង៖ |
ចម្លងទុក |
មើលរូបភាពបន្ថែម
ក្រុមបុគ្គលិកផ្នែកបើកបរ ក្រុមហ៊ុនភ្នំពេញសូរិយា (រូបភាព៖ ញឹម សុខន)
អ្នកបើករថយន្តក្រុង ប្រមាណជា១០០នាក់ របស់ក្រុមហ៊ុនភ្នំពេញ សូរិយា បានធ្វើកូដកម្មនៅថ្ងៃព្រហស្បតិ៍នេះ មិនចេញទៅដឹកភ្ញៀវ ដូចការគ្រោងទុក ដើម្បីដាក់សម្ពាធ ឲ្យភាគីក្រុមហ៊ុន គោរពសិទ្ធិបុគ្គលិក និងដំឡើងប្រាក់ខែ ដើម្បីឲ្យពួកគេរស់នៅសមរម្យបាន។
ការតវ៉ានេះធ្វើឡើងនៅចំណតរថយន្តក្រុងរបស់ក្រុមហ៊ុនសូរិយា ស្ថិតក្នុងភូមិបឹងសាឡាង សង្កាត់ឫស្សីកែវ ខណ្ឌឫស្សកែវ រាជធានីភ្នំពេញ។
លោក សម្បត្តិ វន ដែលអះអាងថា ជាតំណាងក្រុមអ្នកតវ៉ា ឲ្យអ្នកសារព័ត៌មានដឹងនៅកន្លែងធ្វើការតវ៉ា ថ្ងៃទី៣ខែមេសាឆ្នាំ២០១៤នេះថា ការផ្ទុះកូដកម្មនេះ ដោយសារភាគីក្រុមហ៊ុន បានរំលោភសិទ្ធិបុគ្គលិក ដូចជាឲ្យធ្វើការលើសម៉ោង មិនគិតប្រាក់ឈ្នួលបន្ថែម មិនគុណលុយ ពេលធ្វើការថ្ងៃបុណ្យ គ្មានប្រាក់ធានាសុខភាព ពេលរថយន្តខូច ថៅកែកាត់លុយជាដើម «សូមកុំឲ្យមានការកាត់លុយចំពោះតៃកុងឡាន ដែលដាក់ភ្ញៀវតាមផ្លូវ ព្រោះថាដាក់ កាត់លុយច្រើនពេក ដាក់ភ្ញៀវម្នាក់គេគិត១០ម៉ឺន គុណនឹង៣០ វាស្មើ៧៥០ដុល្លារហើយ»។
លោក សម្បត្តិ វន ឲ្យដឹងទៀតថា កូដកម្មនេះក៏ទាមទារឲ្យភាគីក្រុមហ៊ុនដំឡើងប្រាក់ខែពួកគេពី១២០ទៅដល់១៨០ដុល្លារ និងដំឡើងលុយថ្លៃចាយវាយប្រចាំថ្ងៃ ពី៥ម៉ឺន ទៅ៧ម៉ឺន ៥ពាន់រៀល ហើយបុគ្គលិកដែលអាចបញ្ឈប់ពីការងារបាន លុះណាតែពួកគេ ធ្វើខុស ៣ដងដូចៗគ្នា។
អ្នកតវ៉ាផ្សេងទៀតឲ្យដឹងថា ក្រុមហ៊ុននេះ បានតម្រូវឲ្យអ្នកបើកបរ ម្នាក់បង់ប្រាក់ពី៣០០ទៅ៥០០ដុល្លារ មុនបានចូលបម្រើការងារជាអ្នកបើកបរ ហើយប្រាក់តម្កល់នេះ នឹងត្រូវក្រុមហ៊ុនកាត់ ពេលមានកំហុសក្នុងបទបញ្ជាផ្ទៃក្នុងរបស់ក្រុមហ៊ុន «យើងថាប្តូរប្រេងម៉ាស៊ីន គេថាអត់ទេទៅសិនទៅ ឥឡូវកំពុងអត់សូវមានឡានប្រើ ឲ្យយើងទៅសិន តែដល់ពេលឡានហ្នឹងវាខូចទៅ វាគុពេម៉ាស៊ីនតាមផ្លូវទៅ គេអត់ទទួលខុសត្រូវទេ គេទម្លាក់កំហុសមកលើយើង គេគាត់ប្រាក់ខែយើង។ ថ្លៃម៉ាស៊ីនហ្នឹងគេកាត់១០០០ដុល្លារ។ ប៉ុន្មានថ្ងៃមុខនេះ អ្នកចូលលើស១នាទីពីរនាទី គឺកាត់១០ដុល្លារ តែបើការងារពួកខ្ញុំធ្វើដល់១២យប់ ម៉ោង១ ម៉ោង២យប់ ឬទល់ភ្លឺនោះ គាត់មិនដែលគិតលុយឲ្យខ្ញុំផង»។
តាមសេចក្តីជូនដំណឹងរបស់ក្រុមហ៊ុនភ្នំពេញសូរិយា ចុះថ្ងៃទី១១ខែមីនាឆ្នាំ២០១៤នេះឲ្យដឹងថា បុគ្គលិកគ្រប់ខេត្តក្រុង អ្នកបើកបរ ព្រូឡានទាំងអស់ មិនអនុញ្ញាតិផ្ញើឥវ៉ាន់ ដាក់ឥវ៉ាន់គ្មានវិក្ក័យប័ត្រ ឬវិក្ក័យប័ត្រសរសេរបន្លំ នៅពេលក្រុមហ៊ុនចាប់បាន នឹងពិន័យ១គុណនឹង៣០ដង ចំពោះភ្ញៀវម្នាក់ ដែលអ្នកបើកបរ ដាក់តាមផ្លូវ ដោយគ្មានការអនុញ្ញាត និងពិន័យជាប្រាក់៣លានរៀល ជាដើមខណៈប្រាក់ខែអ្នកបើកបរត្រឹមតែ១២០ដុល្លារក្នុងមួយខែ។
នាយកក្រុមហ៊ុន លោក ចាន់ សុផាន់ណា អះអាងថា ក្រុមហ៊ុនមិនបានកាត់លុយបុគ្គលិកដើម្បីជួសជុលរថយន្តទេ ។ ប៉ុន្តែលោកទទួលស្គាល់ថា បទបញ្ជាផ្ទៃក្នុង ដែលបានដាក់ឲ្យអនុវត្តន៍នាពាក់កណ្តាលខែមុន លោកចាត់ទុកថាការសិក្សាមិនបានច្បាស់លាស់ពីភាគីក្រុមហ៊ុន «ឥឡូវនេះ ខាងក្រុមហ៊ុន ចេញសេចក្តីជូនដំណឹង មួយទៀត បញ្ជាក់មោឃៈ នៃសេចក្តីជូនដំណឹង ចេញថ្ងៃ១១នេះ ដើម្បីបញ្ជាក់ប្រាប់គាត់ថា នេះមិនមែនពាក់ព័ន្ធនឹងផ្នែកខាងគាត់ទេ»។
មន្ត្រីចងក្រងសមាគម និងដោះស្រាយវិវាទនៅសហភាពការងារកម្ពុជា លោក ហៀង គឹមហ៊ុន ដែលតាមដានករណីនេះ យល់ថា បទបញ្ជាផ្ទៃក្នុងទាំងឡាយណា ដែលផ្ទុយពីគោលការណ៍ច្បាប់ គ្មានសុពលភាព សម្រាប់អនុវត្តទេ លោក ជំរុញឲ្យភាគីក្រុមហ៊ុនត្រូវពិនិត្យមើលករណីនេះឡើងវិញ ហើយត្រូវអនុវត្តច្បាប់ ការងារ។
យ៉ាងណាក៏ដោយ អ្នកតវ៉ាទាំងអស់បានសម្រេចចូលធ្វើការវិញនៅរសៀលថ្ងៃដដែលនេះ បន្ទាប់ពីនាយកក្រុមហ៊ុនឯកភាពជាផ្លូវការណ៍ព្រមដកបំរាមនៃបទបញ្ជាផ្ទៃក្នុងដ៏ចម្រូងចម្រាសនេះចេញ៕
អត្ថបទទាក់ទង ៖ ក្រុមហ៊ុនរថយន្តក្រុងភ្នំពេញសូរិយា ផ្អាកលក់សំបុត្រភ្លាមៗ ដោយសារអ្នកបើករថយន្ត ធ្វើកូដកម្ម
សូមសរសេរមកកាន់លោក ញឹម សុខន តាមរយៈ sokhorn@vodhotnews.com
ទាមទា៧ចំណុចអីគេសុំ១៥០$មិនបានផងកុំចងើឮ់មកសុំ