ដោយ៖​ តាំង វីដា​
ថ្ងៃព្រហស្បតិ៍ ទី3 ខែមេសា ឆ្នាំ2014
http://vodhotnews.com

មើលរូបភាពបន្ថែម

ចំណតរថយន្តក្រុងមួយ នៅជិតស្តុបបូកគោ

សាលា​រាជធានី​ភ្នំពេញ គ្រោង​ពង្រីក​ផ្លូវ​សាកល្បង​ដំណើរការ​រថយន្តក្រុង​សាធារណៈ លើ​បណ្តោយ​ផ្លូវ​ព្រះមុនីវង្ស ចាប់ពី​ស្ថានីយ៍​ប្រេងឥន្ធនៈ​សូគីម៉ិច ខណ្ឌ​ឫស្សីកែវ រហូត​ដល់​ក្រុង​តាខ្មៅ​។​

អ្នកនាំពាក្យ​សាលា​រាជធានី​ភ្នំពេញ លោក ឡុង ឌី​ម៉ង់ ប្រាប់​ VOD​ នៅ​រសៀល​នេះ​ថា គម្រោង​សាកល្បង​រថយន្តក្រុង​សាធារណៈ ដែល​បាន​ដាក់​ដំណើរការ​សាកល្បង​ពីរ​ខែ​មក​នោះ គឺ​នឹង​ត្រូវ​បន្ត​សាកល្បង​រយៈពេល​ ១​ខែ​ទៀត ចាប់ពី​ថ្ងៃ​ទី​៤ ខែ​មេសា រហូត​ដល់​ថ្ងៃ​ទី​៤ ខែ​ឧសភា ឆ្នាំ​២០១៤​។​

លោក​បន្តថា សាលា​រាជធានី ក៏​គ្រោង​នឹង​ពង្រីក​ផ្លូវ​ធ្វើ​ដំណើរ​ដែល​ចាប់ផ្តើម​ពី​រង្វង់​មូល​ស្តា​ត​ចាស់ រហូតដល់​ស្ពាន​ច្បារអំពៅ​នោះ​។ ដោយឡែក សម្រាប់​កិច្ចដំណើរការ​សាកល្បង​លើក​ទី​៣​នេះ គឺ​ស្ថិត​ក្រោម​ការគ្រប់គ្រង​ទាំងស្រុង​របស់​សាលា​រាជធានី​ភ្នំពេញ ដោយហេតុ​ថា មិនទាន់​មាន​ក្រុមហ៊ុន ដែល​មាន​លក្ខខណ្ឌ​គ្រប់គ្រាន់ សម្រាប់​វិនិយោគ​លើ​សេវា​នេះ នៅឡើយ​ទេ​។​

​គម្រោង​សាងល្បង​ដំណើរកា​រថយន្តក្រុង របស់​សាលា​រាជធានី លើ​បណ្តោយ​ផ្លូវ​ព្រះមុនីវង្ស ដែល​ចាប់ផ្តើម​ពី​រង្វង់​មូល​ស្តា​ត​ចាស់​រហូត​ដល់​ស្ពាន​ច្បារអំពៅ ក្រោម​កិច្ចសហការ​ជាមួយ​ទីភ្នាក់ងារ​សហប្រតិបត្តិ​ការ​អន្តរជាតិ​ជប៉ុន (JICA) មាន​រយៈពេល​២​ខែ​មក​ហើយ បាន​ចាប់ផ្តើម​ពី​ថ្ងៃ​ទី​៥ ខែ​កុម្ភៈ ដល់​ថ្ងៃ​ទី​៤ ខែ​មេសា ឆ្នាំ​២០១៤​។

រថយន្តក្រុង​សាធារណៈ​ចំនួន ១០​គ្រឿង ដំណើរការ​សាកល្បង លើ​កំណាត់​ផ្លូវ​មួយ​ខ្សែ​ប្រវែង​ប្រហែល ៧,៥​គីឡូម៉ែត្រ​។ តម្លៃ​សេវា​ធ្វើដំណើរ គឺ​១៥០០​រៀល សម្រាប់​ម្នាក់ ក្នុង​១​ជើង​៕

សូមសរសេរមកកាន់លោក តាំង វីដា តាមរយៈ vida@vodhotnews.com