ដោយ៖ តាំង វីដា
ថ្ងៃចន្ទ ទី5 ខែឧសភា ឆ្នាំ2014
http://vodhotnews.com
មើលរូបភាពបន្ថែម
គណបក្សសង្រ្គោះជាតិ ដង្ហែជាក្បួននៅរាជធានីភ្នំពេញ(រូបថតដោយតាំង វីដា)
សកម្មជនគណបក្សសង្គ្រោះជាតិ ប្រមាណ ១០០០នាក់ បានចាប់ផ្តើមបន្តហែក្បួនពីទីស្នាក់ការគណបក្ស ទៅកាន់ទីតាំងមួយចំនួន ក្នុងរាជធានីភ្នំពេញ នៅរសៀលថ្ងៃចន្ទនេះ ដែលជាយុទ្ធនាការឃោសនារកសំឡេងឆ្នោតក្រុមប្រឹក្សារាជធានីខេត្តក្រុងស្រុកខណ្ឌ។
យុទ្ធនាការហែក្បួនឃោសនាបោះឆ្នោតនេះ ចាប់ផ្តើមនៅម៉ោងជាង ៣រសៀលនេះ ហើយនឹងបញ្ចប់នៅម៉ោងប្រមាណ ៧ ទៅ៨យប់។
នៅមុនពេលហែក្បួន មន្ត្រីគណបក្សសង្គ្រោះជាតិ បានឲ្យដឹងថា យុទ្ធនាការឃោសនាបោះឆ្នោត នៅថ្ងៃចន្ទនេះ នឹងចែកជាពីរក្រុម ដែលមួយក្រុមដឹកនាំលោក កឹម សុខា អនុប្រធានគណបក្សសង្គ្រោះជាតិ និងមួយក្រុមទៀត ដឹកនាំដោយលោក យឹម សុវណ្ណ បេក្ខជនជាប់ឆ្នោតតំណាងរាស្ត្រមណ្ឌលភ្នំពេញ ជំនួសឲ្យលោកសម រង្ស៊ី ប្រធានគណបក្សសង្គ្រោះជាតិ ដែលកំពុងជាប់ឃោសនានៅខេត្តក្រចេះ។ មន្ត្រីរូបនោះ បន្តថា ក្រុមរបស់លោកយឹម សុវណ្ណ បានជួបជុំគ្នានៅទីស្នាក់ការគណបក្សសង្គ្រោះជាតិ ក្នុងសង្កាត់ចាក់អង្រែលើ ឆ្ពោះទៅកាន់មហាវិថីព្រះមុនីវង្ស បន្តទៅផ្លូវម៉ៅសេងទុង ឆ្ពោះទៅរករង្វង់មូលទួលគោក ដើម្បីជួបក្បួនលោកកឹម សុខា ហើយនឹងបន្តហែក្បួនឃោសនាជុំវិញរាជ ធានីភ្នំពេញ។
តែទោះជាយ៉ាងណា មន្ត្រីរូបនោះ មិនបានបញ្ជាក់ពីទីតាំងដែលត្រូវហែក្បួនឃោសនាបោះឆ្នោតនេះទេ។
យុទ្ធនាការឃោសនាបោះឆ្នោតក្រុមប្រឹក្សារាជធានីខេត្តក្រុងស្រុកខណ្ឌ របស់គណបក្សសង្គ្រោះជាតិនៅរាជធានីភ្នំពេញ នាថ្ងៃនេះ គឺជាយុទ្ធនាការមួយ ក្នុងយុទ្ធនាការឃោសនាបន្ថែម រយៈពេល៦ថ្ងៃ គឺនៅថ្ងៃទី០៥ ទី០៧ ទី១០ ទី១១ ទី១៤ និងទី១៦ខែឧសភា។ យុទ្ធនាការនេះ នឹងត្រូវដឹកនាំដោយប្រធានគណបក្សសង្គ្រោះជាតិ លោក សម រង្ស៊ី និងលោក កឹម សុខា ដែលចាប់ផ្តើមពីការជួបជុំនៅទីស្នាក់ការរបស់គណបក្ស នៅចាក់អង្រែលើ ចាប់ពីម៉ោង២រសៀល។
យុទ្ធនាការរកសំទ្បេងឆ្នោត សម្រាប់ការបោះឆ្នោតក្រុមប្រឹក្សារាជធានី-ខេត្ត-ក្រុង-ស្រុក-ខណ្ឌ អាណត្តិទី២ ឆ្នាំ២០១៤ នឹងប្រព្រឹត្តទៅចាប់ពីថ្ងៃទី២ ដល់ថ្ងៃទី១៦ ខែឧសភា នេះ។ ការបោះឆ្នោតក្រុមប្រឹក្សា នឹងធ្វើនៅថ្ងៃអាទិត្យ ទី១៨ ខែឧសភា ឆ្នាំ២០១៤ ដោយមានគណបក្សនយោបាយចំនួន៥ចូលរួម ក្នុងនោះមាន គណបក្សប្រជាជនកម្ពុជា គណបក្សសង្គ្រោះជាតិ គណបក្សហ្វ៊ុនស៊ិនប៉ិច គណបក្សសម្ព័ន្ធដើម្បីប្រជាធិបតេយ្យ និងគណបក្សសាធារណរដ្ឋប្រជាធិបតេយ្យ៕
សរសេរមកកាន់លោក តាំង វីដា តាមរយៈvida@vodhotnews.com