ដោយ សូត សុខប្រាថ្នា
2014-06-16
RFA
ស្ដាប់ ឬ ទាញយកសំឡេង
ប្រជាពលរដ្ឋនៅឃុំបល្ល័ង្ក និងឃុំចើងដើង ស្រុកបារាយ ខេត្តកំពង់ធំ បាននាំគ្នាទៅកាប់ឈើលើដីចម្ការយកមកប្រើប្រាស់ និងគ្រាន់លក់ដូរខ្លះ ត្រូវបានអាជ្ញាធររដ្ឋបាលព្រៃឈើចាប់រឹបអូសគោយន្ត និងរណាជាច្រើនគ្រឿងកាលពីថ្ងៃទី១០ មិថុនា។
ការចាប់នេះធ្វើឱ្យប្រជាពលរដ្ឋយល់ថា អាជ្ញាធរចាប់តែអ្នកក្រ ហើយចំពោះអ្នកមាន គឺលើកលែងមិនចាប់។ អាជ្ញាធររដ្ឋបាលព្រៃឈើបញ្ជាក់ថា ការអនុវត្តច្បាប់ គឺមិនប្រកាន់អ្នកមាន ឬអ្នកក្រនោះឡើយ ប៉ុន្តែគ្រាន់តែការធ្វើអាជីវកម្មឈើរបស់ប្រជាពលរដ្ឋនៅតំបន់នោះមិនមានលិខិតអនុញ្ញាតនោះទេ។
បន្ទាប់ពីមានការចាប់គោយន្ត និងម៉ាស៊ីនអារឈើជាច្រើនគ្រឿងរបស់ប្រជាពលរដ្ឋនៅឃុំចើងដើង និងឃុំបល្ល័ង្ក ស្រុកបារាយណ៍ ខេត្តកំពង់ធំ កាលពីថ្ងៃទី១០ មិថុនា ពីសំណាក់មន្ត្រីរដ្ឋបាលព្រៃឈើរួចមក ធ្វើឱ្យប្រជាពលរដ្ឋជាម្ចាស់គោយន្តបានលើកឡើងថា គឺជាការបំពេញការងារដោយគ្មានភាពស្មើគ្នា និងមិនត្រឹមត្រូវនោះឡើយ។ ពីព្រោះប្រជាពលរដ្ឋដែលទៅកាប់ឈើសម្រាប់លក់ដូរដើម្បីសម្រួលជីវភាពក្នុងគ្រួសារគឺត្រូវអាជ្ញាធរចោទប្រកាន់ថា ពួកគាត់ខុសច្បាប់ ប៉ុន្តែចំពោះឈ្មួញរកស៊ីឈើធំៗនៅតំបន់ដូចគ្នានោះ ហាក់មិនខុសច្បាប់នោះទេ។
ប្រជាពលរដ្ឋម្នាក់រស់នៅឃុំបល្ល័ង្ក ស្រុកបារាយណ៍ លោក ងិន ចន្ថា ឱ្យដឹងថា នៅក្នុងឃុំរបស់លោកមានប្រជាពលរដ្ឋមួយចំនួនបាននាំគ្នាទៅកាប់ឈើងាប់ៗ នៅក្នុងដីចម្ការរបស់គេដោយមានការអនុញ្ញាតត្រឹមត្រូវពីម្ចាស់ដីនោះ។
លោកបន្តថា ការកាប់ឈើងាប់ៗនោះ គឺដើម្បីយកមកប្រើប្រាស់ក្នុងគ្រួសារខ្លះ និងសម្រាប់លក់គ្រាន់សម្រួលជីវភាពក្នុងគ្រួសារមួយចំណែក ប៉ុន្តែរបររកស៊ីរបស់ពួកគាត់ត្រូវបានរំខានពីសំណាក់ខាងរដ្ឋបាលព្រៃឈើជានិច្ច ដោយបញ្ជាក់ថា ពួកគាត់ខុសទៅនឹងផ្លូវច្បាប់។ ចំណែកអ្នកមានឡានធំៗ ចូលដឹកឈើយ៉ាងគគ្រឹកគគ្រេងនោះ សមត្ថកិច្ចហាក់មិនចាប់អារម្មណ៍ឡើយ។
លោក ងិន ចន្ថា៖ «បាទ! អាឡានយីឌុប បងឯងចង់ដឹងមកមើលផ្លូវយើង១០២ ទៅបានដឹង សុទ្ធតែអាភ្លៅប្រាំ លេងសុទ្ធតែខ្ពស់ទៅលើបីម៉ែត្រអីហ្នឹង! សុទ្ធតែច្រូសថែម ហើយមើលមុខបងឯងមើលអុសវាសុទ្ធតែមុខ ៤០ មុខ ៥០។ បាទ! គេថាត្រូវច្បាប់វិញ គេថាមានដេសេដេញអីណាកាប់ពីព្រៃគុកមក។ ដល់ពេលប្រជាពលរដ្ឋទៅកាប់ទន្លេថង់បួនប្រាំគូប ដប់គូបយកលក់ហ្នឹងសុទ្ធតែខុសច្បាប់រហូត។ បានថាមិនចេះត្រូវទេប្រជាពលរដ្ឋខុសតែរហូតហ្នឹង។ ត្រូវច្បាប់នោះគឺលុយបង! និយាយចំបើឱ្យលុយរួចត្រូវច្បាប់តែម្ដង»។
ប្រភពដដែលបន្តថា ការបំពេញការងារដូចនេះគឺជារឿងមិនត្រឹមត្រូវនោះឡើយ ហើយវាជារឿងអយុត្តិធម៌សម្រាប់តែប្រជាពលរដ្ឋក្រីក្រ ចំណែកឯក្រុមអ្នកមានអំណាច មានលុយវិញ រកស៊ីដឹកឈើស្ទើរតែរូងផ្លូវទៅហើយ ក្នុងមួយថ្ងៃៗ ក៏គ្មានមន្ត្រីជំនាញណាចាត់វិធានការនោះដែរ។
ទាក់ទងនឹងបញ្ហានេះ នាយផ្នែករដ្ឋបាលព្រៃឈើ ស្រុកបារាយណ៍ លោក ហេង កាម៉ិច មានប្រសាសន៍ថា តំបន់ដែលប្រជាពលរដ្ឋធ្វើអាជីវកម្មកាប់ឈើមកលក់នោះ គឺតំបន់ដែលរដ្ឋហាមឃាត់ ពីព្រោះជាដីសម្បទានសេដ្ឋកិច្ចមិនស្របច្បាប់។ លោកបន្តថា មុនពេលឃាត់ឧបករណ៍នឹងវត្ថុតាង អាជ្ញាធរក៏បានជម្រាបជូនដំណឹង និងធ្វើកិច្ចសន្យាជាមួយប្រជាពលរដ្ឋជាច្រើនលើកមកហើយ ថាកុំឱ្យប៉ះពាល់ព្រៃតំបន់នោះ និងបញ្ឈប់ធ្វើអាជីវកម្មឈើតទៅទៀត ប៉ុន្តែពួកគាត់មិនព្រមស្ដាប់។
លោកអះអាងថា ចំពោះការចោទប្រកាន់ថា ខាងរដ្ឋបាលព្រៃឈើអនុវត្តច្បាប់បានតែប្រជាពលរដ្ឋនោះ គឺជារឿងមិនត្រឹមត្រូវនោះទេ ពីព្រោះរថយន្តដែលធ្វើអាជីវកម្មនៅតំបន់នោះភាគច្រើន ស្របច្បាប់ ដោយមានការបង់ពន្ធជូនរដ្ឋត្រឹមត្រូវ៖ «អាហ្នឹងគាត់យល់ច្រឡំបងៗ ទៅនឹងអាឡានដែលគេចេញពីដីសម្បទានសេដ្ឋកិច្ចសង្គមកិច្ច គឺគេមានលិខិតអនុញ្ញាត គេបង់ពន្ធស្របច្បាប់ទាំងអស់ ហើយគាត់មិនដឹងគាត់យល់ថា អ្នកទាំងអស់នោះមិនមានច្បាប់ ហើយយើងបកស្រាយជូនគាត់ហើយ គឺគេហ្នឹងមានច្បាប់បង់ពន្ធគ្រប់គ្រាន់កំប្លេទាំងអស់»។
លោកបញ្ជាក់ថា ការអនុវត្តច្បាប់គឺមិនចំពោះអ្នកមាន ឬអ្នកក្រនោះទេ ប៉ុន្តែអាស្រ័យលើភាពស្របច្បាប់របស់ពួកគាត់ក្នុងការធ្វើអាជីវកម្មឈើនោះ ពីព្រោះរដ្ឋបាលព្រៃឈើមានតួនាទីបង្ក្រាបនូវបទល្មើសខុសច្បាប់ដើម្បីថែរក្សាការពារធនធានធម្មជាតិឱ្យបានគង់វង្ស។
នាយកអង្គការការពារធនធានធម្មជាតិ លោក ឈឹម សាវុធ ធ្លាប់មានប្រសាសន៍ថា មិនមានច្បាប់ណាអនុញ្ញាតឱ្យមានការធ្វើអាជីវកម្មព្រៃឈើ ឬកាប់បំផ្លាញព្រៃឈើនោះទេ។ លោកបញ្ជាក់ថា ប្រជាពលរដ្ឋបច្ចុប្បន្ន ត្រូវក្លាយជាជនរងគ្រោះចំពោះបញ្ហាមួយនេះ។ ចំណែកឯមន្ត្រីឧកញ៉ាអ្នកមានអំណាចធំៗ វប្បធម៌និទណ្ឌភាព ឬភាពគ្មានទោសពៃនៅរុំស្រោបជាប់ជានិច្ច។ លោកបន្ថែមថា រាល់ការបង្ក្រាបបទល្មើសព្រៃឈើចំពោះប្រជាពលរដ្ឋនោះ គឺគ្រាន់ជាការធ្វើឱ្យល្អមើលតែប៉ុណ្ណោះ ហើយជាការលាក់បាំងនូវអ្នកប្រព្រឹត្តបទឧក្រិដ្ឋព្រៃឈើធំៗ របស់អ្នកមានអំណាចដោយមិនមានឆន្ទៈពិតប្រាកដណាមួយចង់ថែរក្សាព្រៃឈើនោះឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទដែលទាក់ទង
- អ្នកឃ្លាំមើលអំពាវនាវឲ្យតុលាការស៊ើបរកមេខ្លោងជួលកម្មករកាប់រានព្រៃខុសច្បាប់
- អ្នកការពារព្រៃឈើគ្រោងដាក់ញត្តិទៅស្ថាប័នពាក់ព័ន្ធរឿងកាប់ឈើនៅព្រៃឡង់
- ពលរដ្ឋនៅស្វាយរៀងត្អូញត្អែរពីក្រុមហ៊ុនដាំបង្គោលភ្លើងបង្កឲ្យប៉ះពាល់ទ្រព្យសម្បត្តិ
- បណ្ដាញសហគមន៍ការពារព្រៃឡង់រកឃើញគំនរឈើប្រណិតរាប់រយម៉ែត្រគូបនៅកំពង់ធំ
- ជនជាតិដើមភាគតិចចោទតុលាការខេត្តរតនគិរីថាមិនផ្ដល់យុត្តិធម៌ដល់អ្នកក្រីក្រ
- អាជ្ញាធរឃុំចោទក្រុមហ៊ុនសម្អាតផ្ទៃអាងស្តុកទឹកនៅស្ទឹងត្រែងថាកាប់ឈើក្រៅបរិវេណ
- អ្នកឃ្លាំមើលព្រៃឈើអំពាវនាវឲ្យអាជ្ញាធរស៊ើបអង្កេតករណីកាប់ឈើនៅតំបន់អភិរក្ស
- ពលរដ្ឋនៅក្រចេះបារម្ភពីសកម្មភាពដឹកឈើទៅវៀតណាមតាមច្រករបៀង
- សហគមន៍ជនជាតិនៅព្រះវិហារប្ដឹងក្រុមហ៊ុនចិនថាប្រព្រឹត្តឧក្រិដ្ឋកម្មប្រឆាំងមនុស្សជាតិ