ដោយ៖ ណាត សុភាព
ថ្ងៃចន្ទ ទី16 មិថុនា 2014
http://vodhotnews.com
មើលរូបភាពបន្ថែម
លោក អាត់ ធន់ ប្រធានសហភាពការងារកម្ពុជា
ប្រធានសហភាពការងារកម្ពុជា លោក អាត់ ធន់ អះអាងថា ចៅក្រមសាកសួរសាលាដំបូងរាជធានីភ្នំពេញ ដែលកោះហៅ លោកឲ្យចូលបំភ្លឺលើកទីពីរនេះ ពាក់ព័ន្ធនឹងបណ្តឹងរបស់ភាគីរោងចក្រអេសអិល(SL) មិនមានមូលដ្ឋានច្បាស់លាស់ សម្រាប់ដាក់បន្ទុកមកលើរូបលោកនោះទេ។
លោក អាត់ ធន់ ថ្លែងមុខសាលាដំបូងរាជធានីភ្នំពេញនៅរសៀលថ្ងៃចន្ទនេះថា ចៅក្រមសាលាដំបូង ដែលសាកសួបបន្ថែម មកលើរូបលោកពាក់ព័ន្ធនឹងករណីបណ្តឹងរបស់កម្មករ និងចៅកែរោងចក្រអេសអិល ដែលចោទរូបលោកថា បានញុះញង់ឲ្យមានអំពើហិង្សាកើតឡើង ក្នុងអំឡុងពេលកម្មករចេញតវ៉ាទាមទារប្រាក់ខែគោល ១៦០ដុលា្លរក្នុងមួយខែ កាលពីថ្ងៃទី១២ ខែវិច្ឆិកា ឆ្នាំ២០១៣ នៅមុខវត្តស្ទឹងមានជ័យ មិនមានមូលដ្ឋានច្បាស់លាស់ សម្រាប់ដាក់បន្ទុកមកលើរូបលោកនោះទេ។
ករណីនេះ លោក អាត់ ធន់ បញ្ជាក់ថា មេធាវីរបស់លោកបានដាក់ពាក្យបណ្តឹងទៅសាលាឧទ្ធរណ៍រួចហើយ ដើម្បីឲ្យស្ថាប័ននេះជួយរកយុត្តិធម៌ និងទម្លាក់បទចោទទាំងស្រុង។
លោក អាត់ ធន់ ត្រូវបានសាលាដំបូងរាជធានីភ្នំពេញ បង្គាប់ឲ្យដាក់ប្រាក់ធានានៅក្រៅឃុំចំនួន២ម៉ឺន៥ពាន់ដុល្លារ និងដាក់កម្រិតមិនឲ្យលោកចេញទៅក្រៅប្រទេស មិនឲ្យផ្លាស់ប្តូរទីលំនៅ ហាមធ្វើការជួបជុំជាមួយកម្មករ ហាមធ្វើសកម្មភាពប្រមូលផ្តុំជាដើម៕
សូមសរសេរមកលោក ណាត សុភាព តាមរយៈ sopheap@vodhotnews.com